Mariko 7 - AKITUTUKET NAKITETET (NEPEPEKA ISABULIN KA AWARAGASIA)

Akisisianakino kaluka Asonya

¹ Apotu Ifarisayon ice kiton lukesisianakinak ikisila lukelomuto ko Yerusalem kotukokinosi king'aren ka Yesu.

² Koanyunete kesi ikiyakia ice enyemete kakanin kanukarokok, nu mam kilosite.

³ (Naarai Ifarisayon kiton Iyaudin kere mam kenyemete emam kilosito akanin kes atupa ka ekitok loka imojong' kes;

⁴ Na elomunata kesi kama isomaere ebele mam kesi kenyemete emam kesi kitalauna ikulopek. Bobo ejaasi ikitokin ice lu ipuaka lu ericito kesi: akiloto ikikopoi, amotio kiton ibwoketa lu itenite kicumai.)

⁵ Kosodete Ifarisayon kiton lukesisianakinak ikisila aking'it Yesu ebe, “Inyo emam ikiyakia kon kericito ekitoki kimojong', konye konyemete kakanin kanukarokok?”

⁶ Kinyakakini Yesu kesi ebe, “Kideere Isaya noi edwaruni nesi kuju kus! Iraito osi luka esoswai kwape kigiritere nesi ebala ebe, ‘Itung'a lu eyong'ito eong' kakituke kes. Konye itawon kes elwaka noi kama kang'.’

⁷ ‘Akimaa kes eong' erait along'u. Naarai isisianakinete kesi ikisila luka etung'anan usa bala ikisila ka Akuju.’ ”

⁸ “Inyekinete osi acorasia ka Akuju, ka akirumite baaba ekitoki ka etung'anan.”

⁹ Kolimokini nesi kesi, “Ijaasi osi ka ekipone loka acoa loka aking'ere ekisil ka Akuju kanuka aricakiite ekitoki kus.

¹⁰ Naarai abu Musa kicoraki, ‘Koyong'ite papa kon kiton toto kon. Etwani ng'in kere ni erasi papa keng' kere toto keng'.’

¹¹ Konye isisianakinete osi ebe, ‘Kejaasi itwan ka ibore kani ebeikiit nesi aking'arakin papa keng' kere toto keng', konye kotemari ebe erait ibore ng'ini Ekorbani,

¹² kanuka ng'un mam osi kicamakinete nesi kisomaki papa keng' kere toto keng' ibore ipede’.

¹³ Ekipone lo nes inwang'iteter osi akirot ka Akuju akitoro okitok kus lo inyanakinanata osi auri kus. Bobo isomaete osi iboro lu ipu bala ng'ulu.”

Iboro lu itoronitosi itwan

¹⁴ Kosodi Yesu anyaraun akwap ka itung'a nama keng' bobo ka alimokin kesi, “Kopupokisi eong' osi kere, bobo kojenutu,

¹⁵ emam ibore ni ejii king'a ka itwan ni ebeikini akitoron nesi kelomo toma. Konye iboro lu elomunete kotoma kitwaan nes itoronete nesi.”

¹⁶ Ni ejaasi ka akii, kiira!

¹⁷ Na kinyekina nesi akwap ka itung'a ka akilomo toma otogo, king'isete ikiyakia keng' nesi kitemotemoki nesi kesi kuju ka awaragan kana.

¹⁸ Kolimokini Yesu kesi, “Mam osi de kijenete? Mam osi kijenete ebe ibore ni elomi otung'anan elomun koking'a ka itwan mam kebeikini akitoron nesi,

¹⁹ naarai mam kelomi otau keng', konye toma akooki keng' kosodi alomar king'a kakwan keloto aking'arakin.” (Kopone kalo, kitalauna Yesu inyamata kere.)

²⁰ Kosodi akitolot ebala, “Ibore ni elomuni king'a kamaka itwan nes itoroni nesi.

²¹ Naarai alomun kotoma ketau kitwaan nes elomunata awomowomoosia nukarokok - adoteu kidwe, akokoo, aaron,

²² adoteu kitung'a kalu emanyakina, ang'obel, aronus, aliokonu, eding', akigama, epogi, awolite.

²³ Iboro lu kijokin lukarokok elomuto kotoma kitwaan ka akitorono nesi.”

Akiyuun naka aberu

²⁴ Kolomari Yesu kaneni koikari akwap nako Tiro. Kolomi otogo emam kekote kojenu itwan ipede ebe ejii nesi neni, konye amam nesi abeikini aking'op.

²⁵ Kiirari aberu nakikamuto ipara akoku keng' kuju ka Yesu. Kosodi abunore ka akibirokin kwap akejen keng'.

²⁶ Arait aberu along'ait, na kidoute ka alaro kanako Foenisia ko Siria. Kimaimai nesi Yesu kireng'ia eparait lokaronon kamaka akoku keng'.

²⁷ Kinyakakini Yesu nesi ebala, “Kocamakisi bere idwe kitanai. Naarai mam kidere alemun inyamene kidwe ka acakakin ing'okwo.”

²⁸ Konye kinyakakini nesi Yesu ebala, “Ebo, Lokapolon, konye atikere ing'okwo de lu ejaasi kwap kamesa enyemete ararasia kidwe!”

²⁹ Kolimokini Yesu nesi, “Kanuka akinyakasait kon kang'in, koika, aloma eparait kotoma akoku kon!”

³⁰ Koikari nesi ore, kodumuni ikoku eperi kapetat, keika eparait.

Itang'aleuni Yesu ekiming' lobang'

³¹ Kosodi nesi abong'un kakwap kanako Tiro, kitori Sidon ka anang'akin akare nako Galilaya, itorit alaro nako Dekapoli (Oreria itomon).

³² Koinunete itung'a ice nesi etwan lo ekiming'ana komam kebeikini ejori. Kosodete akilipi nesi kidokoki akan keng' namaka ekiming'.

³³ Kosodi Yesu agitar nesi awai, kipiakini ibokor keng' toma akii ka etwan, kimwakini, kojorori ang'ajep ka etwan.

³⁴ Kong'oliari Yesu kuju, kiyeng'ari nesi, kolimokini nesi, “Efata,” apolou keng', “Kong'aarosi!”

³⁵ Atipet kosodete akii keng' ang'aar, kosodi ang'ajepe de alakakin, kogeuni etwan ejori kojokan.

³⁶ Kicorakini Yesu itung'a mam ejori akiro nu kamaka itwan kipede. Konye nakitolositetere nesi akicoro kesi ebe mam ejori, nes kitolositetere kesi ejori cut.

³⁷ Abu koumoki itung'a noi. Kotemarete, “Esoma ng'in ibore kojokan. Ainaki ikiming'aikis apedor naka akipup. Ainaki ibang'aikisi ejori!”