Mariko 6 - AKITUTUKET NAKITETET (NEPEPEKA ISABULIN KA AWARAGASIA)

Ang'eri Yesu ko Nasaret

¹ Kolomari Yesu ka alaro kang'in, kobong'ori ore kes, etupito ikiyakia keng' nesi.

² Apaaran naka Esabato, kogeuni nesi akisisianakin kotoma osinagogi. Abu koumok ng'ulu lu ipuaka lu apotu kiirasi nesi enera, “Ai kedumuna etwan lo nu kere?” “Anyena acoa na einakiite nesi? Ekipone ali isoma nesi aumosia nu isomae nesi nu?

³ Mere lo lokakeon abawoi, okoku ka Maria, onaci ka Yakobo, Yosef, Yudas nepepe ka Simon? Mam akanacan keng' kejaasi ne ka oni?” Kosodete kesi aking'ere Yesu.

⁴ Kolimokini Yesu kesi ebe, “Ekadwaran eyong'ite kang'olo wai adepar otaun loko ore kes, kiton opajanitin keng' kiton otung'a luko ore kes.”

⁵ Mam Yesu abu kisoma aumosit apede kang'ina, adepar abu nesi kidokoki akanin keng' nama kalu adekasi idis ka akitang'aleun kesi.

⁶ Koumokini Yesu noi, naarai amam itung'a ajaasi ka akiyuun. Abu Yesu kitoloto akisisianakin kaduketa.

Iyakiari Yesu lukesisiak itomonkaare

⁷ Konyarauni nesi ikiyakia itomonkaare nenipe, kosodi akiyakiar kesi iare iare. Koinakini nesi kesi apedor naka akireng'iar ipara lukarokok.

⁸ Kicorakini nesi kesi ebe, “Mam akidaka ibore ipede kolotote kus adepar ebela, mere inyamata, mere ecue, mere ikabel kocwei kus.

⁹ Konapitete asapatu konye mam akidaka inagai ice.”

¹⁰ Kolimokini Yesu kesi bobo, “Ng'in alaro na idiaunere osi, kiboto ko otogo kang'olo akitodolo nama ilomarata osi ka alaro kang'in.

¹¹ Keng'eri akidiaun osi kalaro, kong'eroto itung'a apupun osi, kolomasi kaneni, kitutuosi apua nuka akejen kus kaneni. Erauni ng'ini akikwenyaret kama kes!”

¹² Kolomarete kesi, kogeunete akisiarasiara ebe itemokina itung'a akinyekin arokusio kes.

¹³ Kosodete kesi akireng'inar ipara lu ipu noi, ka anyonyoinikin lukadekak lu ipu akinyet naka olif ka akitang'aleun kesi.

Atwanare ka Yoana Lokebatisan

¹⁴ Kiirari ejakait Erode kuju kanu kere, naarai kedauti ekiror ka Yesu akisiarakin ng'olo wai. Abalasi itung'a ice ebe, “Etajarun Yoana Lokebatisan kamaka lukatwak! Ng'in nes atenikina ejaatatar nesi ka agogong'u naka asoma aumosia.”

¹⁵ Konye kotemarete ice ebe, “Erait Eliya.” Kotemarete ice, “Erait nesi ekadwaran, bala epe kamaka ikadwarak lusek.”

¹⁶ Konye nakiirara Erode ng'unu, kotemari ebe, “Kitajarun Yoana lo abu eong' katubo akou keng'.”

¹⁷ Kokau kaneni kebu Erode elope kicoraki akikamuno ka Yoana, kosodi akiyene nesi kaenis kanuka Erodia, aberu konaci keng', Filipo na abu nesi komanya.

¹⁸ Naarai kelimokiit Yoana sek Erode ebe, “Mam ekisil kecamakiit ijo akimanya aberu konaci kon!”

¹⁹ Kereit Erodia nesi noi. Emaniti akiyara nesi konye mam abeikin,

²⁰ naarai kekurianit Erode noi Yoana kanu ajenia nesi ebe kerait Yoana etwan lokalaunan nepepe kalo adolit. Kosodi nesi akidara Yoana kotenan. Amina Erode akipup Yoana. Konye ecananakin nesi ng'in paki kedau nesi akipup Yoana.

²¹ Kosial, kodumuni Erodia apak keng'. Arait apaaran naka akidouno ka Erode na etenitere nesi epucit kanuka ijakaa kijokin luka apugan, lukapolok ka ajore, kiton lukapolok luko Galilaya.

²² Kolomi apese ka Erodia toma kilejakini, kosodi akitalakaar Erode nepepe ka ipejok keng'. Kolimokini ejakait apese ng'ini ebe, “Kilipi eong' ibore kere ni ikote ijo, kainakini eong' ijo?”

²³ Kiyapokini Erode apese ebe, “Kainakini eong' ijo ibore kere ni ilipi ijo kama kang', atikere atutubet ka ajakaanut kang'!”

²⁴ Kosodi apese alomar king'a ka aking'it toto keng', “Inyena elipi eong'?” Kinyakakini toto keng' nesi, “Akou ka Yoana Lokebatisan.”

²⁵ Atipet kolomi apese toma namaka ejakait kakiburuburu ka akilipi ebala, “Akote eong' koinaki eong' atipet akou ka Yoana Lokebatisan ejii asinia!”

²⁶ Abutu nu kitakadikisi ejakait, konye kanuka eyapo keng' kiton ipejoko keng' kere, amam nesi akote akibelokin nukisumunikiit nesi apese.

²⁷ Atipet kosodi ejakait Erode akijukiar loka ajore ekedaran ka akicorakin koyau akou ka Yoana. Koikari ekedaran, kosodi akitub akou ka Yoana ejii aenis,

²⁸ koyauni akou ka Yoana ejii asinia koinakini apese, koinakini apese de toto keng'.

²⁹ Nakiirarata ikiyakia ka Yoana nu, kobunete koyarete akwana keng', konukete kates.

Itani Yesu Akwap ka itung'a na epolo noi

³⁰ Kobong'unete ikiyakia itomonkaare namaka Yesu ka alimokin nesi ng'unu kere nukepotu kesi kisomata ka akisisianakin.

³¹ Kolimokini Yesu kesi ebe, “Kaikasi nama ijaikinosi oni bon, nama ibeikinete oni akiyeng'un nedio.” Naarai abunenete itung'a nama keng' ka alomanar kama keng' kakipuakus bobo mam kesi adumun apak naka akinyama.

³² Koikarete ejaasi toma ataker alaro na ajaikinosi kesi bon.

³³ Koanyunete itung'a lu ipu kesi eikarete, kojenunete kesi, kosodete kesi akerite ng'ina alomun kotaunin kere, ka akigee kama kes.

³⁴ Na alomuna Yesu kataker, koanyuni nesi akwap ka itung'a nakapolon noi, kisonie Yesu kesi, naarai araito kesi bala amerekekin nu mam kejaasi ka lokejokon. Kogeuni Yesu akisisianakin kesi akiro nu ipu.

³⁵ Elosi akwap akiwara, kobunete ikiyakia keng' nama keng' kotemarete, “Erait ne moding' bobo adaun akolong'.

³⁶ Kojalaki itung'a lu koikasi, kolototo omankoria kiton aduketa kogwelata ikulopek ibore ni enyemete.”

³⁷ Kinyakakini Yesu kesi ebala, “Koinakisi kesi ibore konyamata.” King'isete kesi Yesu ebe, “Ikote ijo siong' kalototo akitosoma adinarin akwatai aare agwela emugati ka ainakin kesi konyamata?”

³⁸ Kosodi Yesu aking'it kesi ebe, “Imugatin ekosai ejaasi ka osi? Kolototo koanyutu.” Nakejenunata, kinyakakinete kesi Yesu ebe, “Imugatin ikany kiton ikole iare.”

³⁹ Kosodi Yesu alimokin ikiyakia keng' kisiboikisi itung'a onya ejaasi atukon.

⁴⁰ Kosodete akiboikin katukon akwata kiton akaisakany.

⁴¹ Kosodi Yesu alemun imugaatin ikany kiton ikole iare, kong'oliari kuju, kisulwanyikini. Kobilibili nesi imugatin, koinakini ikiyakia keng' kokorakisi itung'a. Kosodi nesi akorakin kesi kijokin ikole iare.

⁴² Konyemete kesi kijokin ka akimonikin.

⁴³ Kirarunete ikiyakia ibukito itomonkaare ileleba ararasia nuka emugati kiton nuka ikole.

⁴⁴ Ng'ulu lu apotu konyamata emugati arait ikiliok ilukumin ikany.

Elosi Yesu kokuju ka akipi

⁴⁵ Atipet kitolomi Yesu ikiyakia keng' toma ataker kogeata kama keng' alosite Betsaida, kitala je loka akare, ering'a nesi isidari akwap ka itung'a.

⁴⁶ Kedau nesi akisidar itung'a, kolosi nesi moru akilip.

⁴⁷ Nakewaria akwap, kejii ataker kiding' ka akare, konye ajii Yesu bon okitala.

⁴⁸ Koanyuni nesi ikiyakia keng' igurete akipi kang'olia bobo ikunyete kocan, naarai edirarito kesi nama alomuter ekuwam. Apiarit akolong'ia akanykawong'on nuka akware kolosi nesi nama kes, elosi ka akare. Akote nesi atubor kama kes,

⁴⁹ konye na anyunata kesi nesi elosi ka akare. Kowomowomoete kesi ebe kerait eparait, kilulukinete

⁵⁰ naarai apotu kesi kere kwanyutu nesi kakuriakaar. Konye atipet kinerakinete Yesu ka kesi ebala, “Kojaasi ka atitinyu. Erait eong'. Mam akurianu.”

⁵¹ Kolomi Yesu ataker na ajaasi kesi, kosodi ekuwam asipun. Koumokinete ikiyakia noi,

⁵² naarai kering'a kesi kikamuna apolou naka imugatin aritai akany. Aring'a itawon kes icasito.

Itang'aleuni Yesu lukadekak ko Genesaret

⁵³ Kilamarosi kesi wai loce loka akare, kodolete kesi akwap nako Genesaret nama ayenikinete kesi ataker kes.

⁵⁴ Kedokutu kesi kataker, kojenunete itung'a Yesu atipet,

⁵⁵ kosodete kesi akerite aduketa kere ka ageun ayaunun itung'a lu adekasi eperete komukekai ng'ini ilaro nama kiirarito kesi ebe kejii Yesu.

⁵⁶ Ng'in alaro na abu Yesu koloto - aduketa, koreria lukapolok, kere de kaduketa, egwaanikinete itung'a luce lu adekasi nama isomaere ebele ka akimaima Yesu kocamaki lukadekak kojorosi enaga keng' bon. Abutu ng'ulu kere lu apotu kojorosi enaga keng' kong'aleutu.