Mariko 5 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu etwan lo ejaasi ka ipara lukarokok

¹ Koikarete kesi okitala jowai kakare kanako Galilaya, akwap nako Gerasa.

² Nape alomara Yesu ka ataker, kosodete nesi akiriamakin ka itwan ni ajaasi ka ipara elomuni katesin.

³ Kiboenene nesi katesin, bobo kemam itwan ipede ni kebeikiit akiyen nesi atikere kenyoror.

⁴ Irwana ipu aenio nesi kipingoi kiton inyororon. Konye ng'ini paki ebesibesi nesi iping'oi ka inyororon kang'ulu. Amam itwan ipede ni abeikiit akirebokin nesi.

⁵ Akware ka apaaran emanimani nesi atesin ka omoru iluluye, etubitube akwaan keng' kamoru.

⁶ Na anyuna nesi Yesu kalwanus, kosodi nesi alepor nama kejii, ka akimaa nesi.

⁷ Kilulukini koporoto kaloko kuju ebala, “Inyena ikote ijo kama kang' Yesu, Okoku ka Akuju kalo Eliliara Noi!? Ko okiror ka Akuju kemaimait eong' ijo mam akitisilaar eong'!”

⁸ Alimuni nesi nu naarai kebala Yesu, “Eparait lokaronon, kolomu king'a kamaka etwan kalo!”

⁹ King'isi Yesu nesi ebala, “Ng'ai ekiror kon?” Kinyakuni etwan ebala, “Ekiror kang' erait ajore, naarai ipuaka siong' noi.”

¹⁰ Kitolosite nesi akimaima Yesu mam akireng'iar ipara kakwap kang'in.

¹¹ Ajii esipan loka ipegei lo apolo noi lu adakasi kaleles kimoru.

¹² Kosodete ipara lukarokok akilipi Yesu, “Kireng'ia siong' opegei, kojalak siong' kalomata nama kes.”

¹³ Kojalakini Yesi ipara koikasi. Kolomarete ipara kamaka etwan, kolomete toma opegei. Kosodi esipan lo apiarit aritai aare aleliar kwap kemoru ka akilom akare, kosodi akare akilikor kesi kere.

¹⁴ Kokerata lukejokok, kosodete alimokin itung'a ko ore ka lokapolon ka aduketa nukepotu kisomakinosi. Kobunete itung'a anyun nukisomakina.

¹⁵ Kobunete kesi namaka Yesu, koanyunete kesi etwan lokejaasi ka ajore kipara, iboe kaneni, enapit inagai, ideerete adama keng', kakuriakaar kesi.

¹⁶ Kosodete ng'ulu lu kaanyuto nu, alimokin itung'a nukisomakina kamaka etwan kalo kejaasi ka ipara, kiton nukisomakina kamaka ipegei.

¹⁷ Kogeunete kesi akimaima Yesu koloma ka alaro kes.

¹⁸ Elomi Yesu toma ataker, kosodi etwan lokejaasi ka ipara akilipi nesi ebe, “Kinyeki eong' kalototo kajo.”

¹⁹ Konye kong'eri Yesu, Kosodi alimokin nesi ebe, “Koloto ore namaka itung'a kon, kolimok kesi etyae kanu esomaki Lokapolon ijo, ka ekipone kalo esonia nesi ijo.”

²⁰ Koikari etwan ng'olo ka akitor otaunin itomon, elimonori etyae kanu kebuu Yesu kisomaki nesi. Koumokini itung'a kere.

Akoku ka Jairo kitoni aberu nakejorori enaga ka Yesu

²¹ Kedau Yesu adokar kitala je loka akare ejii ataker, katukun akwap ka itung'a igalikiitosi nesi. Ajii nesi wai ka akare.

²² Kosodi Jairo, epe kamaka lukepolokiito esinagogi abunore ka akibirokin akejen ka Yesu na anyuna nesi Yesu.

²³ Kimaimai nesi Yesu ebala, “Ejii ipese kang' oreret loka atwanare. Kobu kidokok akanin kon nama keng', tetere eng'aleuni nesi ka akijar!”

²⁴ Koikarete Yesu ka nesi. Kotupi akwap ka itung'a nesi igalikiito nesi.

²⁵ Ajii aberu na adekit adeka naka akibuk awokot ikaru itomonkaare.

²⁶ Kicanakina nesi noi kakanin kalukemadaka kalu ipu. Kebu nesi kitosoma ng'in ibore nikejaatatar. Bobo atiare nesi ang'eleun kosodi ejautene keng' akitolosite amunaun noi.

²⁷ Kiirarit nesi kuju ka Yesu, ka akipelun nesi kokau ka akwap ka itung'a kosodi ajoror enaga keng'.

²⁸ Kotemari kotau keng', “Kajoro eong' along'u inagai keng', ang'aleuni eong'.”

²⁹ Atipet kinyekinete awokot abukunun. Kiirari nesi kotoma akwana keng' adau nesi ang'aleun.

³⁰ Atipet kojenuni Yesu ebe keloma apedor mutan kotoma keng'. Kosodi nesi akibong' kotung'a, king'isi ebala, “Ng'ai kejorori inagai kang'?”

³¹ Kinyakakinete ikiyakia keng' nesi ebe, “Itee ijo ekipone lokilukakiitetere itung'a ijo kode ijo aking'isite bobo, ‘Ng'ai kajorori eong'?’ ”

³² Kosodi Yesu akirer ekote anyun nikisomakini nu.

³³ Kojenuni aberu nukebutu kikokinosi kama keng', kosodi abunore iceki kakurianu, kakukon akejen ka Yesu, kolimokini nesi abeite kere.

³⁴ Kolimokini Yesu nesi ebe, “Akoku kang', akiyuun kon nes etang'aleu ijo. Koloto ka aipuc, kong'aleu cut kadeka kon.”

³⁵ Ering'a Yesu inera, kobunete itung'a ice lukijukute alomun ko otogo ka Jairo ka alimokon nesi, “Atwana akoku kon. Inyo itolositere ijo akisiala Lokesisianakinan?”

³⁶ Konye mam Yesu apupuni nukebalasi kesi. Kolimokini Yesu lokepolokiit esinagogi ebe, “Mam akurianu, kojaasi ka akiyuun bon.”

³⁷ Mam nesi acamakini itwan ipede kolototo ka nesi adepar Petero, Yakobo kiton Yoana, onac ka Yakobo.

³⁸ Kedoloto kesi otogo ka Jairo, kiirari Yesu itung'a ecelasi, iluluyete bobo emonyete koporotoi kaluko kuju noi.

³⁹ Kolomi nesi toma kosodi alimokin kesi, “Inyo icelasi osi ka akimonyo kona? Mam ikoku ketwanit, ejotoe along'u!”

⁴⁰ Kosodete itung'a ng'ulu ageun akwenare Yesu. Konye kosodi nesi akireng'iar kesi kijokin king'a, koyari nesi papa keng' ka toto keng' kikoku nepepe ka ikiyakia keng' iuni. Kolomete kesi toma otogo nama keperia ikoku.

⁴¹ Kirumi nesi akani keng' ka alimokin nesi, “Talita kum,” apolou keng' erait, “Ipese, konyou!”

⁴² Konyouni ipese atipet, kogeuni alosite (Ajaasi nesi ka ikaru itomonkaare). Atipet koumokinete kesi noi.

⁴³ Konye kicorakini Yesu kesi mam alimokin itwan ipede nukepotu kisomakinosisi. Kolimokini nesi kesi ebe, “Koinakisi ipese inyamat konyama.”