Mariko 16 - AKITUTUKET NAKITETET (NEPEPEKA ISABULIN KA AWARAGASIA)

Ajarun ka Yesu

¹ Kedaun Esabato, kogwelunete Maria Magdalena, ka Maria toto keng' ka Yakobo, ka Salome akinyete na ekukuny kanuka akinyonyoikin akwaan ka Yesu.

² Taparucu cut naka esabiti, kolosete kesi ates elomuni akolong'.

³ Eng'itanakinosi kesi ebalasi, “Ing'ai ing'arakini oni akikokoroor amoru ko okek kates?”

⁴ Konye eng'oliarete kesi, koanyunete ebe kedaun akikokoroor amoru awai. (Kepolo amoru noi.)

⁵ Kelomata kesi toma ates, koanyunete kesi esapata iboe koteten, enapit enaga lokakwang'an, koumokinete kesi.

⁶ Kolimokini kesi, “Mam ariang'uni. Ikotosi osi Yesu loko Nasareti lo apon kibubukine omusalaba. Ajaru, mam kejii ne. Koanyutu nama anukakiite nesi.

⁷ Konye kolototo, kolimokisi ikiyakia keng' nenipe ka Petero ebe egei nesi kama kus Galilaya. Anyunete osi nesi kang'ina, kwape kelimokitere nesi osi.”

⁸ Kosodete alomar king'a ka amotar kates. Akuriaka bobo abu koumok kesi. Mam kesi alimun ibore ipede ka itwan ipede, naarai apotu kesi kokuriakarosi noi.

Atakaniki Yesu Mariam Magdalena

⁹ Kedau Yesu ajaruni kama kalu katwaka taparacu naka esabiti, kogei nesi atakanuni kamaka Maria Magdalena, nakireng'iarit nesi iparaa ikanykaare kama keng'.

¹⁰ Kolomari nesi king'a ka alimokin ng'ulu lu aupasi ka nesi, ituriete ka akimonyo.

¹¹ Konye na eirarata kesi ebe kejari Yesu, bobo kanyuti nesi Yesu, mam kesi amunokin nesi.

Atakaniki Yesu Ikiyakia iare

¹² Ketuborosi nu, kosodi Yesu atakanuun kamaka ikiyakia keng' iare kokipone kece kalo agelakina elosete kesi idirarito aduket.

¹³ Kobong'orete kesi alimokin luce, konye mam apotu komunokisi kesi.

Atakaniki Yesu Itomonkape

¹⁴ Kosial cut, kotakanuni Yesu kamaka ikiyakia itomonkape enyemete. Kiretakini nesi kesi kanu amamare kesi ajaatatar ka akiyuun ka akicasite kitawon kes, naarai amam kesi apotu komunokisi ng'ulu lukanyuto nesi kedau ajarun.

¹⁵ Kolimokini nesi kesi, “Kolototo akwap kere kisiarasiarata akiro nukajokak kamaka itung'anan kere.

¹⁶ Ng'ini kere ni emunokini kosodete akibatisa nesi eyuuno nesi. Konye ng'ini kere ni emam kimunokini etubokino nesi.

¹⁷ Ebunete aumosia nu akigwapa ng'ulu lu emunokinete. Ebunete kesi akireng'ianar ipara ko okiror kang', ebunete kesi ejori ka ang'ajepa kanu egelegela kanu itetiaka,

¹⁸ ebunete kesi akirum imunwo, kere de kematata kesi ibore nikaran, mam kikang'asi kesi, idokokinete kesi akanin kes kuju kalu edekasi, kong'aleunete.”

Ayari Yesu Kuju

¹⁹ Kedau Lokapolon Yesu ejori ka kesi, koyarete nesi kuju, kosodi akiboikin teten ka Akuju.

²⁰ Koikarete ikiyakia akisiarasiara ng'olo wai. Abu Lokapolon kisomata ka kesi, ka akitodiar nukisiarisiaro kopone kaloka aumosia kanu esomaete kesi.