Mariko 13 - AKITUTUKET NAKITETET (NEPEPEKA ISABULIN KA AWARAGASIA)

Inera Yesu kuju ka atijaar Etogo ka Akuju

¹ Na alomaria Yesu ko otogo ka Akuju, kotemari ekiyakia keng' epe ebe, “Lokesisianakinan, kong'olek kwape ejokatatar amoru nu kiton itogoi lu!”

² Kinyakuni Yesu ebe, “Itee ijo itogoi lukapolok lu? Emam amoru atikere apede kane na inyekino egwoi kokuju kanace. Etijakino kwap ng'in ibore.”

Ican kiton Akisicanio

³ Na eboya Yesu komoru kaloko Olif, iteosi ka etogo ka Akuju, kobunete Petero ka Yakobo, ka Yoana ka Anderia nama ka Yesu emam itwan itee.

⁴ King'isete nesi ebe, “Kolimoki siong' iwori isomakinototor nu, bobo inyena ebuni akisomakin akitodiar apu apak naka iboro kalu kere akisomakin.”

⁵ Kolimokini Yesu kesi ebe, “Kocoikinosi, mam acamakin itwan ipede aking'alakin osi.

⁶ Ebunete lu ipu ko okiro kang' ebalasi, ‘Eong' nes nesi!’ Kosodete akitapaa lu ipu.

⁷ Na iirarata osi kuju kejie nepepe ka elodo kuju kejie, mam ariapun. Ejii nu akisomakin, konye mam kitodikiito ebe adolo esial kakwap.

⁸ Ebuni akwap akitijii nace, apugan ebuni akitijii apugan nace. Ejaikin akijang'ajang'a ka akwap kiton eteng'e ng'in ilaro. Akiro nu kijokin eraito bala ageunet ka ariebon kana aberu kana ekote akidoun.”

⁹ “Konye kocoikinasi naarai kiyaro osi nama etubonokinere itung'a. Kibung'ao osi kosinagogin, kitogwoo osi koking'aren kalu ipugaete kiton ijakaa kanu kang' tetere itodiarete osi kuju kang' koking'aren kes.

¹⁰ Konye ejii kisiarasiarai akiro nukajokak akwapin kere.

¹¹ Kikamuno osi ka ayaar osi nama etubonokinere itung'a, mam apodo kuju kanu itemarete osi. Konye kolimutu nukiinakino osi kakolong' kang'in naarai mere osi kes inerasi adepar Emoyo Lokalaunan

¹² Ebuni onaci agwelar onaci keng' kwarai, ebuni papa agwelar ikoku keng'. Idwe de ebunete akitijii imojong' kes ka akiyara kesi.

¹³ Ekadakiniso ng'in itwan ka osi kanu kang'. Konye ng'in ni ikanyakini adolore osial eyuuno.”

Ican lu Ipu

¹⁴ “Konye na iyanyunata osi ibore nikaronon nikamunaunan egwoi kalaro kana emam nesi kitemokina agwoya.” Aputo kasurup erait aputo nakaronon ka itung'a lu emam kitopolorito Akuju. Aputo nakitogwoite ko Otogo ka Akuju ko Yerusalem. Aputo kasurup itokokoli Akuju konye emudiar itung'a kamaka Akuju ayar aronus. Kanuka ng'unu, ng'ulu lu ejaasi Yudea ejii akerite omoru.

¹⁵ Ng'in ni ejii kuju ka etogo keng' mam kitemokina adokun kwap kere de akilomo otogo kanuka alemun ibore ipede.

¹⁶ Ng'ini ni ejii mana mam kitemokina abong'or otogo keng' alemun enaga keng'.

¹⁷ Erauni aronus kamaka aberu kanu epotiete kiton kes ka toto nu itanakete!

¹⁸ Kilipete Akuju mam iboro lu akisomakin apakio nuka akiru eta akwap ci!

¹⁹ Naarai ican luka apaarasia kang'unu erokarosi noi adepar ng'ulu kere lu ajenu akwap ageuni apelem kesubia Akuju akwap adolore akolong' na. Bobo emam ibore ice bala ng'ini ebuni ajaikin.

²⁰ Konye epiang'a Lokapolon etiae kapaarasia kang'unu. Kere kemam nesi kipiang'arit, tin emam itwan ipede ejari. Konye kanuka itung'a keng' kalu eseute, epiang'a nesi apaarasia ng'unu.

²¹ “Kelimok itwan kere ijo ebe, ‘Kong'olek, ejii Kristo ne!’ Kere de, ‘Kong'olek, nesi je!’ Mam amunokin.

²² Naarai etakanunete kes ka Kristo kiton ikadwarak luka aliokonu asoma aumosia tetere itapaete kesi itung'a, kepedorosi lu eseuti Akuju.

²³ Konye kocoikinasi! Alimoki eong' osi iboro kere ering'a akolong' kedolo.”

Abunore ka Okoku ka Etwan

²⁴ “Konye kapaarasia kang'unu kedaunosi icani ng'ulu, irionor akolong', mam elapa kecauni,

²⁵ edacunosi akanyer alomun kokuju, ijang'ajang'akino agogong' nako kuju.

²⁶ Ebunete kesi anyun Okoku ka Etwan ijesuna kodowon ka apedor nakapolon kiton akibusesu.

²⁷ Ijukiari nesi imalaikan owaitin iwong'on luka akwap atukokin itung'a ka Akuju lu eseute alomun kalaro kape kanaka akwap adolore nace.”

Nu isisiauno ko okaireret

²⁸ “Kisisiautu kamaka ekaereret. Nape enonokatatare ateniek keng' ka alibun akwi keng', ijenunete osi ebe apu akamu.

²⁹ Kokipone kalo kiyanyutu osi isomasi iboro lu, kojenete ebe apu Okoku ka Etwan adolun.

³⁰ Abeite, kalimokini eong' osi ebe mam auri na kebuni adaun ering'a iboro lu kere kisomakina.

³¹ Etuborosi kuju ka akwap konye mam akiro kang' ketuborosi.”

Emam ni ejeni Apaaran kere Akolong'

³² “Konye ikamuut apaaran ng'ini kere de akolong' ng'ini emam itwan ipede ejeni atikere imalaikan kokuju kere de Okoku adepar Papa bon.

³³ Kocoikinasi bobo kokwenyete, naarai mam osi kijenete iwori edolia akolong' ng'ini.

³⁴ Erauni bala etwan lo elomari ko ore keng' ka aikari olotote ka akinyekin lukejaanakinak keng' egwoikiito, ng'ini ipe ka asoma keng' ka alimokin lokedaran erute kidara.

³⁵ Kanuka ng'un, kocoikinasi naarai mam osi kijenete akolong' na ebunia ejakait elope etogo. Kere erauni ebong' kere de kiding' ka akware kere ering'a kiwalara kere de ering'a akolong' kelomuna.

³⁶ Kilipete tetere kebu nesi atipet, komam nesi kedumuni osi ijotoete.

³⁷ Nu alimokini eong' osi, kalimokini eong' osi kijokini: Kilipete!”