Mariko 11 - AKITUTUKET NAKITETET (NEPEPEKA ISABULIN KA AWARAGASIA)

Akilomo ka Yesu Yerusalem naka akilanya

¹ Apiarito kesi Yerusalem, akidunya ka etaun loko Betfage, nepepe ka Betani, kobunete kesi omoru loka emuseituni. Kijukiari Yesu ikiyakia keng' iare kogeata

² ka acorasia nu, “Kolototo ocalo lo iteosi ka osi. Na ilomiata osi along'u ng'ina, idumunete osi isigiria ni emam itwan ipede edokit apelem. Kolacutu, koyautu ne.

³ King'iti itwan osi atenikina na isomaate osi nu, kolimokisi nesi ebe ekote Lokapolon, konye inyakuni atipet.”

⁴ Koikarete kodumunete isigiria koking'a, eyenikiite okeki ka etogo. Itolosito kesi akilaca isigiria,

⁵ king'isete itung'a ice lu agwoete kaneni kesi ebe, “Inyo ilaciata osi, isigiria?”

⁶ Kinyakunete kesi kwape kelimokiitere Yesu kesi. Kosodete itung'a ng'ulu ajalakin kesi koikasi.

⁷ Koinarete kesi Yesu isigiria, kopesikinete inagai kes kuju kisigiria, kosodi Yesu akiboikin kuju kisigiria.

⁸ Kopesikinete itung'a lu ipu inagai kes oroto, kogwenyunete luce akwi akipete oroto.

⁹ Acelasi itung'a lu ageito koking'aren nepepe kalu egwapito kokau ebalasi ebe, “Keturwoto Akuju! Isulwanyikiite ng'ini ni ebuni ko okiror ka Lokapolon!

¹⁰ Isulwanyikiite ajakaanut naka papa wok Daudi na ebuuti! Kiturwoi Akuju!”

¹¹ Kolomi Yesu Yerusalem, kolomi toma Otogo ka Akuju. Abu nesi komoo ng'ini ibore kojokan. Konye kanu adaunare akolong', kolomari nesi aikar Betani nepepe ka ikiyakia keng' itomonkaare.

Ilami Yesu Ekaereret

¹² Apaaran na atupakini, ebong'uto kesi ko Betani, eirarit Yesu eteng'e.

¹³ Koanyuni nesi kama elwana ekaereret erapiarito akwii. Kolosi nesi ang'olekin kebeikini nesi adumun araitoit apede. Konye kedoloki, mam adumun araitoit apede adepar akwii bon naarai kemam kerait apak naka araito.

¹⁴ Kolimokini Yesu ekaereret, “Ageun lolo aikar king'aren, emam itwan ebuni akinyama bobo araito alomun kama kon!” Apotu ikiyakia keng' de kiirasi nesi.

Elosi Yesu Otogo ka Akuju

¹⁵ Kodolete kesi Yerusalem. Kolomi Yesu Otogo ka Akuju kogeuni akireng'ete itung'a lu kitegwelete kiton lukagwelak kotogo ka Akuju. Kibelonori nesi acelei kang'ulu kalu kibeleete abolai ka icolong'o kang'ulu kalu kitegwelete ajelei.

¹⁶ Mam nesi acamakin itwan ipede kodaka ibore kere kotogo ka Akuju.

¹⁷ Kosodi nesi akisisianakin itung'a ebe, “Mam kigirite ebe, ‘Etogo kang' enyarauno etogo lo ilipiata itung'a luka akwapini kere?’ Konye itarautu osi nama eng'opitetere ikokolak!”

¹⁸ Kosodete lukapolok ka isaserdotin nepepe ka ikesisianakinak ikisila akiirar nu, kogeunete akote ekipone loka akiyar Yesu. Kekuriakito kesi nesi, naarai kebu koumoki atukot kere naka itung'a akisisianakin keng'.

¹⁹ Kewara akwap, kolomarete Yesu nepepe ka ikiyakia keng' ko ore ka lokapolon.

Nu isisiauno kamaka ekaereret

²⁰ Ketuborosi kesi taparacu, kwanyunete kesi ekaereret erinyit akitodolo amori keng'.

²¹ Kiituni Petero nu esomakina kolimokini nesi Yesu ebe, “kong'oleki, lokesisianakinan, keriny ekaereret lo kilami ijo!”

²² Kinyakuni Yesu ebe, “Kojaasi ka akiyuun kotoma Akuju.

²³ Kalimokini eong' osi abeite ebe ng'ini kere ni elimokini emoru lo, ‘Koukun kane kodacakin toma akare,’ komam apega kotau keng', konye komunokiite ebe nu elimuni nesi isomakinosi, isomakino nesi'.

²⁴ Kanuka nu kalimokini eong' osi ebe, ibore kijokin ni ing'isi ijo kalipasia, komunoki ebe idumu ijo, isomakinosi.

²⁵ Ng'ini paki igwoete osi akilipi, korimanarosi kang'in itwan ni isomakiit ijo arokusio kere, tetere erimakini Papa kus loko kuju osi arokusio kus nu isomata osi.

²⁶ Kimam osi kirimanarosi, atikere Papa kus lo ejii kuju, mam kirimakini osi arokusio kus.”

Ang'itasait kuju ka apedor ka Yesu

²⁷ Koikarete kesi bobo Yerusalem. Elosi Yesu ko Otogo ka Akuju, kobunete lukapolok ka isaserdotin, ka lukesisianakinak ikisila kiton imojong' nama keng',

²⁸ king'isete kesi Yesu ebe, “Akitoro apedor ani isoma ijo akiro nu, kere de ng'ai kiinakini ijo apedor naka asoma nu?”

²⁹ Kinyakakini Yesu kesi ebe, “Eng'isi eong' osi ang'isetait ape bon, kinyakakisi eong', kasodi eong' alimokin osi akitoro apedor kang'ai esomaa eong' akiro nu.

³⁰ Kinyakakisi eong', kelomuni apedor ka Yoana naka akibatisa kokuju kere kelomuni kotung'a?”

³¹ Kogeunete ikulopek apeganakin ebe, “Kitemasi oni ebe, ‘Alomuni kokuju,’ etemari nesi ebe, ‘Inyo konye mam osi amunokin Yoana?’

³² Konye katemasi ebe, ‘Alomuni kotung'a’?” Kekuriaka kesi itung'a, naarai amunokiito kesi kere ebe kerait Yoana ekadwaran loka abeite.

³³ Kanuka ng'unu kinyakakinete kesi Yesu ebe, “Mam siong' kijenete.” Kolimokini Yesu kesi ebe, “Bobo mam eong' de kalimokini osi apedor ani esoma eong' iboro lu.”