Mariko 10 - AKITUTUKET NAKITETET (NEPEPEKA ISABULIN KA AWARAGASIA)

Isisianakini Yesu kuju ka Elakit

¹ Kosodi Yesu alomari ka alaro kang'ini, koikari wai loko Yudea ka adepar Yordani. Kobunete atukon ka itung'a nama keng' bobo. Atupa ka ekitoki keng', kosodi nesi akisisianakin kesi bobo.

² Kobunete Ifarisayon akitama nesi ekotosi alokun nesi. King'isete nesi ebe, “Ecamakiit Ekisil ekiliokit akilaka aberu keng'?”

³ Kinyakakini nesi kesi ebala, “Inyena kicorakini Musa osi?”

⁴ Kinyakunete kesi ebe, “Acamakiit Musa ekiliokit kigir asatifiket naka elakit, ka akireng'iar konye aberu keng'.”

⁵ Konye kolimokini Yesu kesi ebe, “Egirakini Musa osi ekisil lo kanuka akicasite kitawon kus.

⁶ Konye ape kisabere akwap, ‘Kosubi Akuju kesi eraito ekiliokit kiton aberu.’

⁷ ‘Kanuka atenikina kana, inyekini ekiliokit papa keng' kiton toto keng' ka akimorikikin ka aberu keng',

⁸ kosodete iare araun ibore ipe.’ Kanuka ng'un mam bobo kesi keraito iare, konye ibore ipe.

⁹ Kanuka ng'un, ibore ni emorikiki Akuju, emam etung'anan itemokina akitiaka.”

¹⁰ Ejaasi kesi toma otogo, king'isete ikiyakia Yesu bobo kuju ka akiroto kana.

¹¹ Kolimokini nesi kesi ebe, “Itwan kere ni elaki aberu keng' ka akimanya aberu ace, esomaki aberu keng' adoteu.

¹² Aberu na elaki okilen keng' kosodi amanyakin ka ekiliokit ece, isomae adoteu.”

Isulwanyikini Yesu Idwe Lucicik

¹³ Koyaunete itung'a idwe namaka Yesu tetere ejorori nesi kesi, konye kiretakinete ikiyakia kesi.

¹⁴ Konye na anyuna Yesu kong'in, kanyunyurari nesi kolimokini ikiyakia keng' ebe, “Kinyekisi idwe kobutu nama kang', mam akirebokin kesi, naarai Ajakaanut naka Akuju erait naka ng'ulu kalu eraito bala idwe lu.

¹⁵ Abeite alimokini eong' osi ebe, ng'ini kere ni emam kidiauni Ajakaanut ka Akuju bala ikoku, mam kelomi toma ajakaanut ng'ini.”

¹⁶ Kidiauni nesi idwe kakanin keng', kisulwanyikini nesi kesi, ka akidokonokin akanin keng' kuju ka ng'ini ikoku.

Etwan lo abarit

¹⁷ Na ageuna Yesu bobo elotote keng', kosodi etwan amotun nama keng' ka akukum koking'aren keng', ka aking'it nesi ebe, “Lokesisianakinan Lokajokan, inyena itemokina eong' asoma tetere adumuni eong' akijar na emam kedaun?”

¹⁸ King'isi Yesu nesi ebe, “Inyo inyaritere ijo eong' lokajokan? Emam itwan ejokuna emam kerait Akuju bon.

¹⁹ Ijeni ijo ikisila: ‘Siri iari, siri idote; siri ikokoe; siri igamanakini; siri ing'alae; koyong' papa kon nepepe ka toto kon.’”

²⁰ Kinyakuni etwan ebe, “Lokesisianakinan, ape kakiditeu kang', ayong' eong' ikisila lu kere.”

²¹ Kong'olekini Yesu etwan, kominuni nesi kosodi Yesu alimokin nesi ebe, “Ejii ibore ipe ni mam kejaasi ka ijo. Koloto, kogwela ng'in ibore ni ejaasi ka ijo, koinak lukapalapalak ikabel. Ijaikinosi ijo ka abara kuju. Kobuni, kigwap eong'.”

²² Na eirara etwan akiro nu, kisinyiri akonyene keng' noi, koikari ekadakiit, naarai abariti nesi noi.

²³ Kong'olekini Yesu ikesisiak keng' ka alimokin kesi ebe, “Ekekesari ekipone ali kamaka itung'a kalu ebarito akilomo toma Ajakaanut ka Akuju!”

²⁴ Koumokini ikiyakia akiro ka Yesu. Konye kolimokini Yesu kesi bobo ebe, “Idwe kang', ikoni ekekes ai akilomo toma Ajakaanut ka Akuju!

²⁵ Etapana akaale akitor apedot naka esindan akilanya ni ebarit akilomo toma Ajakaanut naka Akuju.”

²⁶ Koumokini ikiyakia noi, kosodete alimokin nesi, “Ng'ai konye eyuuno?”

²⁷ Kong'olekini Yesu kesi ka atemar ebe, “Ekekes nu kamaka itung'a, konye mere kamaka Akuju. Naarai ebeikinosi iboro kere kamaka Akuju.”

²⁸ Kosodi Petero alimokin Yesu ebe, “Kitee, enyekisi siong' ng'in ibore ka akitup ijo.”

²⁹ Kotemari Yesu ebe, “Abeite, kalimokini eong' osi ebe emam itwan ipede ni enyeki ere kere de ikinacan kere de akanacan, kere toto, kere papa, kere idwe, kere de amaata kanu kang' kiton akiro nukajokak,

³⁰ ni emam kedumuni aropetaet irwana akwatat kapaki kana itogoi, ikinacan, akanacan, ka toto kes, ka idwe nepepe ka amaata kiton icani de kiton akijar na emam esial kapaki kana ebuuti.

³¹ Konye lu ipu lusodit eraunete lukesial. Lukesial eraunete lusodit.”

Apak nakiuniet Inera Yesu kuju ka Atwanare keng'

³² Ajaasi kesi oroto elosiorito Yerusalem. Ageit Yesu koking'aren kes. Koumokini kesi. Kosodete ng'ulu lu egwapito kesi akuriakaar. Koyaari Yesu ikiyakia keng' itomonkaare awai bobo, kogeuni alimonokin kesi nu apuut akisomakin kama keng',

³³ ebala ebe, “Kiteete, ilosiorito oni Yerusalem. Igwakino kang'ina Okoku ka Etwan akanin ka isaserdotin lukapolok nepepe ka ikesisianakinak ikisila. Ebunete atubokin nesi atwanare ka akigwakin nesi akanin ka Ilong'au,

³⁴ bobo ebunete akwenare nesi, ka akimwanakin nesi akimwal, alecelece nesi, ka akiyara nesi. Konye ketuborosi apaarasia auni ejaruni nesi.”

Akilipasait ka Yakobo kiton Yoana

³⁵ Kobunete Yakobo kiton Yoana isapa ka Sebedayo namaka Yesu. Kotemarete ebe, “Lokesisianakinan, ejii ibore ikotosi siong' kisomaki ijo siong'.”

³⁶ King'isi Yesu kesi ebe, “Inyena.”

³⁷ Kinyakunete ebe, “Kocamaki siong' keboikinosi ipe akani kon nako teten ipe akani kon nakokedieny kotoma akibusesu kon.”

³⁸ Kolimokini Yesu kesi ebe, “Mam osi kijenete ibore ni ilipito osi. Ibeikinete osi akimata kokikopot kaloka icani kalo itemokina eong' amasia? Ibeikinete osi akibatisao kokipone kalo itemokinar eong' akibatisao?”

³⁹ Kinyakunete ebe, “Ibeikinete siong'.” Kolimokini Yesu kesi ebe, “Ibunete osi teni akimata kokipot kalo itemokina eong' akimata ka akibatisao kokipone kalo itemokinar eong' akibatisao.

⁴⁰ Konye emam eong' adolite naka atiakun ng'ai iboikin teten kang' kere de kedieny kang'. Konye eraito alarosinoi ng'unu nuka ng'ulu kalu itenakiite kesi.”

⁴¹ Na eirarata ikiyakia luce itomon kuju kanu, kosodete anyunyurar kanuka Yakobo kiton Yoana.

⁴² Konyarauni Yesu kesi ka alimokin kesi ebe, “Ijenete osi ebe ng'ulu lu itemokina akipuga ilong'au ipugaete katurubes, bobo itung'a lu eyong'ite itodiarito apolou kama kes.

⁴³ Konye mam kerauni kona kama kus. Ng'ini kere ni ekote apolou kama kus itemokina araun nikejaanakinan kaluce,

⁴⁴ ng'ini kere kama kus ni ekote araun nisodit, ejii nesi araun ejolot kaluce kere.

⁴⁵ Naarai Okoku ka Etwan mam abuni kijaanakine nesi, konye abuni nesi kanuka akijaanakin kitoni alemun akijar keng' kanuka ayuuni itung'a lu ipu.”

Itang'aleuni Yesu Batimayo Emuduki

⁴⁶ Kobunete kesi Yeriko. Elomari nesi ko Yeriko ejaasi ka ikiyakia keng' nepepe ka akwap ka itung'a, ajii emuduki lo elipanar, okoku ka Timayo lo anyarite Batimayo. Eboe kawai keroto.

⁴⁷ Nakiirara nesi ebe kerait Yesu loko Nasaret nes ketubitoi, kogeuni anyara ebala, “Yesu, Okoku ka Daudi, kitim eong'!”

⁴⁸ Kiretakinete itung'a ipu nesi kotau ti. Konye kiyatakini nesi eporoto iworo, “Okoku ka Daudi, kitim eong'!”

⁴⁹ Kogwoi Yesu kotemari, “Konyarautu nesi.” Konyaraunete emuduki kolimokinete ebe, “Kolakar, konyou, enyariti Yesu ijo.”

⁵⁰ Kocakari nesi enaga keng', ka aporun kuju ka abunore nama ka Yesu.

⁵¹ King'isi Yesu nesi ebe, “Inyena ikote ijo kesomaki eong' ijo?” Kinyakuni emuduki ebe, “Lokesisianakinan, akote eong' anyuni bobo.”

⁵² Kolimokini Yesu nesi ebe, “Koika, etang'aleu akiyuuni koni ijo.” Atipet, koanyuni emuduki bobo, kosodi atupite Yesu koroto.