Mariko 1 - AKITUTUKET NAKITETET (NEPEPEKA ISABULIN KA AWARAGASIA)

Akisiarasiara ka Yoana Lokebatisan

¹ Nu nes Akiro Nukajokak kuju ka Yesu Kristo, Okoku ka Akuju.

² Ageunete kwape kigiritere ekadwaran Isaya: “Kotemari Akuju ebe, ‘Ejukuni eong' ekiyakia kang' kogee kama kon, kanuka akitemokin erot kanu kon.’

³ Ilong'oe eporoto kitwaan komoding' ebala, ‘Kitemokisi Lokapolon eroto keng'; koruasi erot lo itori nesi!’”

⁴ Kotakanuuni Yoana Lokebatisan komoding' isiarisiari ebala ebe, “Kibeleunosi nama ka Akuju kibatisai osi. Ebuni Akuju arimakin arokusio kus.”

⁵ Koikarete itung'a ipu ko profins kaloko Yudea nepepe ka ere lokapolon loko Yerusalem apupun Yoana. Kisilarete itung'a arokusio kes, kibatisae Yoana kesi kang'olol kanako Yordan.

⁶ Anapit Yoana inagai lu etenite ka ajulo ka akaal, eyenit arokoba naka emukule ang'abet keng'. Inyamata keng' arait emaase nepepe ka asiki nako okitwi.

⁷ Esiarisiari nesi ebala ebe, “Ebuuti kokau kang' je lo epolo noi akilanya eong'. Mam eong' kilesikina atikere de akukum kwap alacar aunoi nuka amukan keng'.

⁸ Kebatisae eong' osi ka akipi, konye ebuni nesi akibatisa osi ke Emoyo Lokalaunan.”

Akibatisao nepepe ka atamio ka Yesu

⁹ Kapaarasia kang'unu, kodoluni Yesu alomun ko Nasareti ko profins kaloko Galilaya, kibatisae Yoana nesi ko Yordani.

¹⁰ Napekelomuna Yesu ka akipi, koanyuni nesi akuju eng'aari, ijesuna Emoyo nama keng' bala ajele.

¹¹ Kobuni eporoto alomun kokuju ebala, “Irait ijo Okoku kang' lo ominat, italakarit ijo eong' noi.”

¹² Atipet, koyaari Emoyo Yesu moding',

¹³ kosodi nesi akiboi kang'ina kapaarasia akaisawong'on etamitami Asatanit nesi. Ajaasi ityeng' luko moding' de ng'ina, konye kobunete imalaikan aking'arakin nesi.

Enyarauni Yesu lukeinyok iwong'on

¹⁴ Kedaun akiyene Yoana, kolosi Yesu Galilaya akisiarasiara Akiro Nukajokak nuka Akuju

¹⁵ ebala, “Adolo apak naketiakuute, apu Ajakaanut naka Akuju. Kinyekisi arokusio, komunokisi Akiro Nukajokak.”

¹⁶ Nakitoritere Yesu arir ka akare nako Galilaya, koanyuni nesi Simon nepepe ka onaci keng', Andrea, ecakakinete eregi akare, naarai keraito kesi ikeinyok.

¹⁷ Kolimokini Yesu kesi, “Kotupata eong'. Etarauni eong' osi ikeinyok itung'a.”

¹⁸ Atipet kinyekinete kesi iregia kes, ka akitup Yesu.

¹⁹ Na ekunyakina nesi king'aren nedio, koanyuni nesi Yakobo, okoku ka Sebedayo nepepe ka Yoana, onaci keng' lu ajaasi toma ataker itenete iregia kes.

²⁰ Atipet konyarauni Yesu kesi. Kinyekinete kesi papa kes Sebedayo kotoma ataker ejaasi nepepe ka lukejaanakinak lukitemokina ataco. Kotupete kesi Yesu.

Etwan lo ajaasi ka Eparait

²¹ Kolosiete Yesu ka ikiyakia keng' Kapernaum. Naka Esabato kolomi Yesu toma Osinagogi akisisianakin.

²² Koumokini itung'a akisisianakino keng' naarai esisianakini nesi kesi kwape kalo ajaasi ka apedor, mere kwape ka ikesisianakinak ikisila.

²³ Atipet Kanepe kaneni kobuni etwan lo ajaasi ka eparait lokaronon osinagogi, kilulukini ebala,

²⁴ “Inyena ikote ijo kama kosi, Yesu loko Nasaret? Ibuuti ijo amudiar siong'? Ajeni eong' irait ijo ng'ai. Irait ijo Lokalaunan loka Akuju!”

²⁵ Kiretakini Yesu eparait ebala, “Kotau tii, koloma kama keng'!”

²⁶ Kijang'akini eparait etwan kagogong'u, koinakini nesi eluluu, kolomari kama keng'.

²⁷ Koumokinete itung'a kere, kogeunete aking'itanakin, “Anyeka nu? Akisisianakino nukitetiak? Ejaasi etwan lo ka apedor naka akiretakin ipara, koyong'ete nesi!”

²⁸ Atipet ka akisiarakin akiro kuju ka Yesu ng'in ilaro ko Galilaya.

Itang'aleuni Yesu itung'a lu ipu

²⁹ Atipet kolomari nesi ko osinagogi, kosodi akilomo otogo ka Simon nepepe ka Andrea, Yakobo nepepe ka Yoana.

³⁰ Aperi akamuran ka Simon kapetat emwanikina akwaan. Atipet kolimokinete kesi Yesu kuju keng'.

³¹ Kirumi Yesu akamuran ka Simon akani, kitonyouni nesi. Komamuuni amwanus. Kogeuni akijaanakin kesi.

³² Atabong' ng'ini kelomo akolong', koinunete itung'a Yesu lukadekak kere nepepe ka ng'ulu lu ajaasi ka ipara.

³³ Kotukokinosi itung'a kere luko otauni kang'olo king'a ka etogo.

³⁴ Kitang'aleuni Yesu itung'a ipuaka lu adekasi adekasinoi nu agelagela, kireng'iari nesi ipara lu ipu. Mam nesi acamakin ipara ejori, naarai ajenete kesi nesi.

Isiarisiari Yesu ko Galilaya

³⁵ Taparacu cut na atupakini, ering'a kiwalara, konyouni Yesu kolomari ka aikar nama ajii nesi bon akilip.

³⁶ Konye kolomarete Simon nepepe ka ipoupatin keng' akote Yesu,

³⁷ Nakedumunata nesi, kotemarete, “Ekote ng'in itwan ijo.”

³⁸ Kinyakakini Yesu kesi ebala, “Kaloto oreria lu ejaasi king'aren, kesiarasiara eong' kang'ina de, naarai ng'ini nes atenikina abunia eong'.”

³⁹ Kolosi Yesu Galilaya kere, isiasiari kosinagogin ka akireng'ianar ipara.

Itang'aleuni Yesu etwan

⁴⁰ Kobuni etwan lo adeka eng'ulo nama ka Yesu, ka akukokin ka akilip ebala, “Kikote ijo, ibeikini ijo akitalaun eong'.”

⁴¹ Kisonie Yesu nesi, korwaari akani keng', kojorori Yesu nesi kotemari ebe, “Akote eong', kolau!”

⁴² Atipet, kinyekini eng'ulo etwan, kolauni.

⁴³ Kosodi Yesu alimokin nesi kagogong'u ka akicorakin nesi koika atipet,

⁴⁴ ka alimokin nesi, “Mam alimokin itwan ipede akiro nu. Konye koloto namaka esaserdotit. Kolemu idutan lu abu Musa kotemarite, kanuka akitodikin itung'a kere ebe etang'aleun ijo.”

⁴⁵ Konye koikari etwan kogeuni akisiarasiara akiro ng'unu ng'in ilaro. Teni, abu nesi kinere nu ipuaka noi, na amamare Yesu abeikiitere alosite ko otaun iteete itung'a. Abu Yesu kideun kama ing'adaara, kobunete itung'a nama keng' alomun kang'olo wai.