Luka 8 - AKITUTUKET NAKITETET (NEPEPEKA ISABULIN KA AWARAGASIA)

Aberu nu aupanarosi ka Yesu

¹ Ketubor apak adiosi koloto Yesu itorit otaunin nepepe ka aduketa, isiarisiari akiro nukajokak nuka Ajakanut ka Akuju. Alosenenete Ikiyakia itomonkaare ka nesi,

² nepepe ka aberu ace nukitang'aleute ipara nepepe ka adekasia: Maria (nakenyarite Magdalena) nake pon kireng'iera ipara ikanykaare kama keng';

³ Yoanna aberu ka Kusa lo arait lokejaanakinan ka Erod, Susanna ka aberu kace nu epu nu abutu kitosomata iboro kes aking'arakin Yesu nepepe ka ikiyakia keng'.

Awaragan ka Ekayaan

⁴ Abutu itung'a kitolototo abunene namaka Yesu alomun kotaun etupasi; na ketukokinere akwap ka itung'a, kolimokini Yesu kesi awaragan na.

⁵ “Ajii etwan lo abu koloto ayaare ikinyom keng'. Eyee nesi ikinyom mana, kebutu ice kodacakinosi orot, nama apon kipudai, konyemete ikwenyi.

⁶ Abutu ice kodacakinosi amoru, na kelomunata iraan, abutu kowokoto naarai amam alipo kiinauto.

⁷ Ikinyom ice abutu kodacakinosi okokwa, lu abutu kopoloutu nepepe ka iraan ka akimied kesi.

⁸ Ikinyom ice abutu kodacakinosi alipo nu ejoka kosodete apoloun, ka akiraikin araito akwatat ape.” Kosodi Yesu ang'etakin ebala, “Ng'ini ni ejaasi ka akii nuka akipupu, kiny nesi kopupu!”

Apolou ka Awaragasia

⁹ King'itata ikiyakia keng' Yesu apolou ka awaragan kana,

¹⁰ kosodi nesi abong'okin ebe, “Ainakin osi akijene nu imunonite nuka Ajakanut ka Akuju, konye kamaka luce ebuni kokipone kaloka awaragasia, tetere kesi iteete konye mam kanyunete, bobo epupete konye mam kiirarete.”

Itetemikini Yesu awaragan naka ekayaan

¹¹ Na nes apolou ka awaragan: Ekinyomit erait akirot ka Akuju.

¹² Ikinyom lukedacakinosi oroto erait ng'ulu lu epupete; konye kobuni Asetanit alemar akirot kotawon kes tetere emam kesi kemunokinete ka akiyuun.

¹³ Ikinyom lukedacakinosi amoru nes erait ng'ulu lukepotu kiirasi akirot kalakara. Konye mam kelomi toma kes cut; iyuuto kesi kapaki kana edit konye na ebunia apak naka atamisio, ibirorosi kesi.

¹⁴ Ikinyom lukedacakinosi okokwa nes erait ng'ulu lu epupete; konye akiyalolong'osia ka abara ka alelesia nuka akijar kana etukokinosi ka akimiede kesi, kong'erete araito kes akokore.

¹⁵ Ikinyom lukedacakinosi alipo nu ejoka eraito ng'ulu lu iirarete akirot kosodete akirum ka atipete kopone kalo eyong'ara bobo ka etau kalo ejokuna, kosodete kesi ayaun araito katitinyu.

Atara na erapakite ka acuran

¹⁶ “Mam itwan kinokokini atara ka arapakin ka acuran kere de akipiakin kwap ka apetat. Konye ipiakinete kesi kuju ka aguoetait ka atara, tetere lu elomete iteete acaus.

¹⁷ “Ng'in kere ni igwaite eyauno nama etakani, ng'in kere ni erapakiite edumuno koyaunete acaus.

¹⁸ “Kocoikina, ekipone lo ipupia ijo; naarai ng'ulu lu ejaasi ka ibore iyatakino, konye ng'ulu lu emam ibore ipede edemario kama kes atikere idis lu ituto kesi ebe ejatatar.”

Toto keng' ka Yesu kiton ikanacan keng'

¹⁹ Kobunete toto keng' ka Yesu ka ikanacan keng' nama keng', konye mam kesi abeikinete akimorikikin ka nesi kanuka akwap ka itung'a.

²⁰ Kolimokini itwan ice Yesu, “Egwoete toto kon ka ikanacan kon koking'a ekotosi anyun ijo.”

²¹ Kolimokini Yesu kesi kere, “Toto kang' ka ikanacan kang' nes ng'ulu lu epupete akirot ka Akuju ka akiyong'.”

Isinapikini Yesu Ekuwam

²² Apaaran ape abu Yesu kolom ataker ka ikiyakia keng' kosodi alimokin kesi ebe, “Katuborosi waije kang'olol.” Kogeunete kesi alosite.

²³ Itolosito kesi kelotete ejaasi ataker, kojotoor Yesu. Kong'esun ekuwam lo ecasit ekusi kwap ka akare, kogeunete akipi akilom toma ataker, kanuka ng'unu akuriaka kesi ebe aput kesi akilum.

²⁴ Kolosete ikiyakia nama ka Yesu ka akitekenyun nesi ebalasi, “Lokapolon, Lokapolon! Apu oni atwanare!” Konyouni Yesu ka akiretakin ekuwam kiton akipi nu enyaluna; kinapakinosi; kojaikin ainapakina na epolo.

²⁵ Kosodi nesi alimokin ikyakia, “Ani akiyuun kus?” Konye abutu kesi koumokisi kakurianari, ka alimonokin ikulopek, “Ng'ai etwan lo? Iretakin ekuwam ka ikokoron kakipi, kosodete akipup nesi.”

Itang'aleuni Yesu Etwan loka ipara

²⁶ Kosodete kesi adolun akwap nako Gerasin, na iteosi ka Galilalia.

²⁷ Edokuni Yesu okitolimo, kisiriami nesi etwan alomun kotaun lo ajaasi ka ipara. Kapak kana euja abu etwan lo koloto emam inagai, mam eboe kore, konye eboe kabwai kanuka tesin.

²⁸ Na anyuna nesi Yesu, kodelori nesi koporoto kaloko kuju, kadacakin nesi elope kwap akejen ka Yesu, kosodi acelun, “Yesu, Okoku ka Akuju kalo Eliliara Noi! Inyena ikote ijo kama kang'? Kelipit eong' ijo, mam akitisilaar eong'!”

²⁹ Ketemari nesi nu naarai kedaut Yesu akiretakin eparait koloma kama keng'. Irwana ipu kikamuut nesi, kong'in de ayenite nesi bala emabusut. Atikere na keyenitere atokitete akanin nepepe ka akejen keng' kirikoi, abeikini nesi aking'ed irikoi kosodi eparait ayaari nesi moding'.

³⁰ King'isi Yesu nesi, “Ng'ai ekiror kon?” Kinyakuni nesi ebe, “Ekiror kang' erait, ‘Lukegalak,’ ” Naarai kelomito ajokin nu ipu nama keng'.

³¹ Kimaimata ipara Yesu mam acakakin kesi adwi naka aujan.

³² Ajii esipan lokapolon loka ipegei arir neni, edakasi karir kemoru. Kosodete ipara akimaima Yesu kojalak kesi kolomata opegei, kosodi nesi ajalakin kesi.

³³ Kolomarete kama ke etwan ka akilom opegei. Abu esipan kajokis komotar kwap kemoru eleliarito akare ka acakin toma akare katwakare.

³⁴ Kwanyunete lukajokok ipegei nu abutu kisomakinosi, kosodete amotari ka akisiarakin akiro kotaun kiton aduketa.

³⁵ Kolomarete itung'a anyun nuke potu kisomakinosi, kebutu namaka Yesu, kodumunete kesi etwan lokedautu ipara alomar iboe ka akejen ka Yesu enapit inagai eng'alete adama; konye akuriaka kesi kere.

³⁶ Abutu ng'ulu lukanyuto kolimokis itung'a ekipone lo kitang'aleunere etwan.

³⁷ Kosodete itung'a kere luka alaro kang'in akilip Yesu koika, naarai akuriaka kesi noi. Kolomi Yesu ataker koikari.

³⁸ Kimaima etwan lokedautu ipara alomar Yesu, “Kocamakine eong' kalototo ka ijo.” Konye kijukiari Yesu nesi ore, ebala,

³⁹ “Kobong'o ore kolimo nu esomaki Akuju ijo.” Kitoro etwan otaun, elimonori nu kebu Yesu kisomak nesi.

Akoku ka Jairo kitoni aberu na ajorori enaga ka Yesu

⁴⁰ Kebong'o Yesu okitala loce loka akare, kidiaunete itung'a nesi, naarai edarito kesi kere nesi.

⁴¹ Kosodi etwan lokenyarite Jairo adolun; kerait nesi ofisa ko osinagogi kaloka aduket. Kocakakin nesi elope kwap ka akejen ka Yesu ka akimaima nesi alosit ore keng',

⁴² naarai akoku keng' ape bon, na ajaasi ka ikaru itomonkaare, apuut atwanare. Elosi Yesu koroto kotukokinosi itung'a nama keng' kang'olo wai.

⁴³ Bobo ajii aberu na aie noi ikaru itomonkaare bobo komam ipede ni itang'aleuni,

⁴⁴ Kobuni nesi, kokau ka Yesu kojorori ereret kenaga keng', kosodi akii keng' apalikin atipet.

⁴⁵ King'isi Yesu, “Ng'ai kajoro eong'?” Kong'eri ng'in itwan, kosodi Petero atemar, “Lokapolon, kimanakito ijo itung'a kang'olo wai ijukuna nama kon.”

⁴⁶ Konye kotemari Yesu, “Kajororit itwan eong', naarai ajenuni eong' na alomaria apedor kama kang'.”

⁴⁷ Kwanyuni aberu ebe adumuni nesi, kosodi nesi abunore iceki ka akibirokin akejen ka Yesu. Koking'aren kang'in itwan kaneni, kolimokini nesi Yesu inyo kejororo nesi bobo ekipone lo kitang'aleunere nesi atipet.

⁴⁸ Kolimokini Yesu nesi, “Akoku kang' etang'aleu akiyuun kon ijo. Koloto kotoma aipuc.”

⁴⁹ Inera Yesu nu, kobuni ekiyakia alomun ko otogo ka ofisa. “Atwana akoku kon,” Kolimokini nesi Jairo, “Atwana akoku kon; mam akisiala lokesisianakinan bobo.”

⁵⁰ Konye kopupuni Yesu kosodi alimokin Yairo, “Mam akurianu; kojaasi ka akiyuun bon eng'aleuni nesi.”

⁵¹ Edoluni nesi otogo, mam nesi abu kojalak itwan ipede akilom ka nesi adepar Petero, Yoana ka Yakobo, ka papa keng' kiton toto keng' ka ikoku.

⁵² Ng'in itwan kaneni amonyi kanuka ikoku. Kotemari Yesu, “Mam akimonyo. Mam ikoku ketwaanit. Ejotoe nesi along'u!”

⁵³ Kokwenatatar kesi kere nesi, naarai ajenete kesi ebe etwanit nesi.

⁵⁴ Konye kirumi Yesu akan keng' ka anyaraun, “Ikoku konyou.”

⁵⁵ Kojaruni, konyouni nesi atipet, kicorakini Yesu kesi ainakin nesi ibore ni nyamata.

⁵⁶ Koumokisi imojong' keng', konye kicorakini Yesu kesi mam alimokin itwan ipede nu abutu kisomakinosi.