Luka 7 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu lokejaanakinan ka Ofisa loko Roma

¹ Kedau Yesu alimonokin itung'a iboro lu kere koikari nesi Kapernaum.

² Kejaatatar Ofisa loko Roma ka lokejaanakinan lo amina nesi noi; kedeka etwan apuut atwanare.

³ Na apupuna ofisa kuju ka Yesu, kijukiari nesi imojong' ice luka Iyaudin akilip Yesu abunore akitang'aleun ekejaanakinan keng'.

⁴ Na adolunata kesi namaka Yesu kimaimaete kesi nesi cut, ebalasi “Etwan lo teni ilesikina adumun aking'arasit kon.

⁵ Emina nesi itung'a wok bobo nesi elope abu kodukoki oni esinagogi.”

⁶ Koikarete Yesu ka kesi. Amam nesi aluana ko otogo nakijukiari ofisa ipoupatin keng' nama keng' alimokin nesi ebe, “Lokapolon, mam akicanakin. Mam eong' keleskina akidiaun ijo toma otogo kang',

⁷ bobo mam eong' keleskina abunore nama kon elope. Kolim usa akirot kong'aleuni ekejanaakinan kang'.

⁸ Eong' de arait etwan lo ipiakite kwap ka ofisas lu epoloko kama kang', ajaasi eong' kaluka ajore lu ejaasi kwap kang'. Alimokini eong' epe, ‘Kolot’ koikari nesi; alimokini eong' ng'olo, ‘Kobuni!’ Kobuni nesi; alimokin eong' ejolot kang', ‘Kisomaki nu!’ Kisomakini nesi!”

⁹ Koriang'uni Yesu na apupuna nesi nu; kibong'i nesi kalimokin akwap ka itung'a lu atupito nesi, “Alimokini eong' osi, mam eong' apekolong' kadumuut akiyuun bala na, atikere ko Israel!”

¹⁰ Kobong'orete ikiyakia otogo ka ofisa kadumun ekejaanakinan keng' keng'aleu.

Itang'aleuni Yesu Okoku ka Apuserut

¹¹ Kokau nedio kolot Yesu otaun lokenyarite Nain, eupasi ka ikesisiak keng' nepepe ka akwap ka itung'a.

¹² Edoluni nesi along'u orute ketaun, kolomuni asiirit naka itung'a edakito ates. Etwan lo atwanit arait okoku ka apuserut lotelit, ajaasi nesi ka akwap ka itung'a alomun kotaun.

¹³ Na anyuna Lokapolon nesi, kisoni nesi nesi, kolimokini nesi, “Mam akimony.”

¹⁴ Kosodi nesi alosit ng'ina kajoror ates, koguoete itung'a lu adakito. Kotemari Yesu ebe, “Esapata kalimokini eong' ijo, Konyou.”

¹⁵ Kosodi etwan loketwaanit akiboikin ka ageun ejori, koinakini Yesu nesi toto keng'.

¹⁶ Kikamuni kesi kere akurianu kosodete akitur Akuju ebalasi, “Atakanu ekadwaran lokapolon noi kokiding' wok!” Bobo, “Epejok Akuju itung'a keng'!”

¹⁷ Kisiarakinosi akiro nu ikamuto Yesu Yudea kere nepepe ka alarosinoi nu imanakiito Yudea.

Ikiyakia alomun kamaka Yoana Ekebatisan

¹⁸ Kolimokinete ikiyakia ka Yoana nesi iboro lu kere.

¹⁹ Kosodi Yoana anyaraun iare kamaka ikiyakia keng', kiyakiari kesi nama ka Lokapolon ebalasi, “Irait ijo nesi lo ebuuti, kere idaraunete siong' ece?”

²⁰ Bobo na adolunata itung'a nama keng', kotemarete kesi, “Irait ijo nesi lo ibuuti, kere kedarautu siong' ece?”

²¹ Akolong' nipeng'ini kitang'aleuni Yesu itung'a lu ipu adekasia kes, ariebasinei kes nepepe kalu ikamuto ipara ka ainakin imudukaisik lu ipuaka apedor naka akitere.

²² Kobong'okini nesi ikiyakia ka Yoana ebe, “Kobong'osi kolimokisi Yoana nu anyutu osi ka apupun: Imudukaisik iteete, ing'walaisik elosete, lu icanasi adekasinei nuka amunyo etalaun, ikiming'aisik epupete, ikatwak itajaruno, akiro nukajokak elimonokino ikapalapalak.

²³ Erereng' nesi ni emam kang'erit eong'.”

²⁴ Kedautu ikiyakia ka Yoana aikar, kogeuni Yesu ejori kuju keng' kamaka akwap ka itung'a: “Na kilosiata osi nama ka Yoana komoding', inyena kikotosi osi anyun? Anyait ijang'ijang'i ekuwam?

²⁵ Inyena kilosete osi anyun? Etwan lo enapit inagai lu imilimilete? Itung'a lu enapito kong'ini ka akiboi kotoma abara edumuno kesi ko oreria kijakaa!

²⁶ Kolimokisi eong', inyena kilosete osi anyun? Ekadwaran? Ebo teni, konye abutu osi kwanyutu lo ilanyit ekadwaran.

²⁷ Naarai Yoana nesi ebalasi akigirasia nukalaunak: ‘Kebala Akuju, ejukiyari eong' ekiyakia kang' king'aren kon ang'akin ijo eroto.’

²⁸ Kalimokin eong' osi, kamaka ng'ulu kalu idout aberu emam ipede epolo akilanya Yoana; konye nesi lo edite kajakanut ka Akuju epolo akilanya nesi.”

²⁹ Na eirarata nu itung'a kere nepepe ka lukerarak emusolo koinakisi kesi Akuju adolite edaute akibatisa kesi ka ebatisim ka Yoana;

³⁰ Konye kong'eret Ifarisayon nepepe ka lukesisianakinak ka ikisila nukitemitemit Akuju kanu kes ka king'ere kibatisa Yoana kesi.

³¹ “Inyena etupusia eong' itung'a luka apakio kanu? Eputosi kesi ka inyena?

³² Eputosi ka idwe lu iboete kosokoni. Akatong'otong'ot ape ecelakini nace, ‘Abutu siong' karamakisi osi ekosio loka emanyit, konye mam osi akileje! Kerukokisi siong' osi ikirukesinoi luka akio, konye mam osi akimonyo!’

³³ Kobuni Yoana Lokebatisan, kikanya nesi eteng'e, mam nesi akimat ebino, kosodete osi atemar ebe, ‘Ejaasi nesi keparait!’

³⁴ Kobuni Okoku ka Etwan enyemi komata kosodete osi atemar, ‘Kiteete etwan lo! Enyamana bobo ematana, opoupa kalukerarak emusolo kalukarokusio.’

³⁵ Konye acoa ka Akuju itoduno ebe erait abeit ng'ulu kere lu idiaunete nesi.”

Yesu kore ka Simon Efarisayot

³⁶ Konyarauni Efarisayot Yesu akinyama ka nesi. Kosodi Yesu alosit ore keng' ka akiboikin kwap akinyama.

³⁷ Kotaun kang'olo ajii aberu na ajari ejaret loka adiakanar. Kopupuni nesi ebe enyemi Yesu ko otogo ka Efarisayot, kosodi nesi ayaun amot ileleba akinyet na ekukunyu

³⁸ kosodi akigwo kokau ka Yesu, ka akejen, emonyi ka akitapapal akejen keng' ka akio keng'. Kosodi konye akitowon akejen keng' ka itima keng', ka anuikin kesi, ka abukokin akinyet na ekukunyu kuju kes.

³⁹ Nakanyuna Efarisayot nu, kotemari ko otau keng', “Kerait etwan lo teni ekadwaran, tin nesi ejenuni ng'ai aberu na irumirumi nesi. Bobo, tin nesi ejeni akijar nakaronon naka aberu kana!”

⁴⁰ Kolimokini Yesu nesi ebe, “Simon, ejii ibore akote eong' alimokin ijo.” Kotemari, “Ebo, Lokesisianakinan, kolimok eong'.”

⁴¹ Kogeuni Yesu ebala, “Ajaasi itung'a iare lu ajaasi kapesen kalo ikopanakini itung'a ikabel. Epe ajaasi ka apesen keng' idinarin akwatai akany loce akaisakany.

⁴² Kikarik kesi akitaca, korimakini nesi kesi iare. Ng'ai kama kes ebuni aminun nesi noi?”

⁴³ Kinyakuni Simon, “Amunit eong' ng'olo lo kerimakino apesen na epolo noi.” Kolimokini Yesu nesi, “Ideri ijo.”

⁴⁴ Kibong'i nesi nama ka aberu kosodi alimokin Simon ebe, “Itee ijo aberu na? Abu eong' kabu otogo kon, mam ijo ainakin eong' akipi nukiloset akejen kang', konye elot nesi akejen kang' ka akio keng' ka akitowon kitima keng'.

⁴⁵ Mam ijo akidiaun eong' kanuikin, konye mam nesi kepalikit anuinikin akejen kang' ape kabunia eong'.

⁴⁶ Mam ijo akinyonyoikin akou kang', konye enyonyoik nesi akejen kang' kakinyet kana ekukuny.

⁴⁷ Kalomokini eong' ijo ebe, amina na epolo noi na etoduu nesi itodiarit ebe arokusio keng' nu ipu arimakin. Konye ng'ini kere ni arimakin nama edit itodiarit amina na edit bon.”

⁴⁸ Kosodi Yesu alimokin aberu, “Arimakin arokusio kon.”

⁴⁹ Luce lukenyemete ka nesi kogeunete alimonokin, “Ng'ai lo, lo erimanakini atikere arokusio?”

⁵⁰ Konye kolimokini Yesu aberu, “Akiyuun kon nes kitajara ijo; kolot ka aipuc.”