Luka 6 - AKITUTUKET NAKITETET (NEPEPEKA ISABULIN KA AWARAGASIA)

Aking'isetait kuju ka Esabato

¹ Alosi Yesu komanikor kaloka engano apaaran nake Esabato. Kogeunete ikiyakia keng' akirutu akwes nuka engano, ka anina kakanin kes ka akinyama.

² King'itata Ifarisayon ice, “Inyo isomata osi nu eng'erit Ekisil wok asoma naka Esabato?”

³ Kobong'okini Yesu kesi ebe, “Mam osi kisomato nu kebu Daudi kisoma na aritere nesi eteng'e ka itung'a keng'?

⁴ Kolomi nesi Otogo ka Akuju, kolemari emugati lo adusite Akuju, konyemi nesi, kosodi ainakin itung'a keng' de. Konye mam Ekisil wok kecamakiit itwan ipede akinyam emugati ng'olo adepar isaseredootin.”

⁵ Kong'etakini Yesu ebala ebe, “Okoku ka Etwan nes Lokapolon ke Esabato.”

Etwan lo iteregegiara akan

⁶ Naka Esabato ace koloto Yesu osinagogi ka akisisianakin. Ajii etwan neni lo eteregegiara akan keng' na koteten.

⁷ Akotosi Lukesisianakinak kikisila ice ka Ifarisayon ice akirot naka akiwosa Yesu kanuka asoma nukarokok. Kosodete kesi akitere nesi kama api anyun kitang'aleu ka apak kanake Esabato.

⁸ Konye ajeni Yesu awomowomosia kes kosodi alimokin etwan, “Koguo, kobu king'aren ne.” Konyouni etwan, koguoi kaneni.

⁹ Kosodi Yesu alimokin kesi, “Eng'isi eong' osi: Inyena ecamakiit Ekisil wok oni asoma ka apak kanake Esabato? Aking'arakin kere akikang'as? Ayuun akijar ka itwan kere amudiar?”

¹⁰ Kong'olekini nesi kesi kere; kolimokini nesi etwan, “Korua akani kon.” Kikokini nesi neni, kong'aleuni akan keng' bobo.

¹¹ Kokadakinete kesi noi, kogeunete akitemetem nu isomakinete kesi Yesu.

Eseuni Yesu Ikiyakia Itomonkaare

¹² Akolong' ng'in koikari Yesu moru akilip. Kitosoma nesi akware kajokis ilipi Akuju.

¹³ Kiwala akwap, konyarauni nesi lukesisiak nama keng' kaseun itomonkaare kama kes, lu anyarauni nes ikiyakia:

¹⁴ Simon (lo abu nesi konyarak Petero) nepepe ka onac keng' Anderea; Yakobo ka Yoana, Pilipo ka Batolomayo,

¹⁵ Matayo ka Tomas, Yakobo okoka Alfayo, ka Simon (lokenyarite lo emina akwap keng')

¹⁶ Yuda okoku ka Yakobo, ka Yuda Iskariot lo abu kogwela Yesu.

Isisianakini Yesu ka Akitang'aleun

¹⁷ Kebu Kristo kwap alomun komoru nepepe ka ikiyakia, koguoi nesi kalaro kana epesiara nepepe ka lukesisiak keng' lu epu noi. Ajii ekanyabar ka itung'a alomun ko Yudea, Yerusalem ka ireria lukapolok luko Tiro ka Sidoni luka ariri ka akare;

¹⁸ abuto kesi apupun nesi ka akitang'aleuno kadekasia kes. Kobunete lu kisialete ipara de kodumunete akitang'aleuno.

¹⁹ Kotamakinete itung'a kere ajorori nesi, naarai alomanari apedor kama keng' ka akitang'aleunun kesi kere.

Alakara nepepe ka Akituur

²⁰ Kong'olekini Yesu lukesisiak keng' kotemari, “Irereng' ijo ni ipalipalit; naarai Ajakanut naka Akuju erait nakon!

²¹ Irereng' ijo ni arit eteng'e kipokona; kilelebikino ijo! Ileli ijo ni imonyi kipokona; ikwenikini ijo!”

²² “Irereng' ijo kireito itung'a ijo, king'erito ijo, kirasete ijo kobalasi ebe irono ijo, kanuka Okoku ka Etwan!

²³ Kolakara kisomakinosi ng'unu, kileji kalakara naarai epolo aropetait na igwaikite ijo kokuju. Naarai imojong' kes abutu kisomakisi ikadwarak iboro bala lu pelu.”

²⁴ “Konye ikoni eronari ai kama kus lu ibarito kipokona; naarai idumutu osi akilesikina kus.

²⁵ Ikokini eronar ai kama kus lu imokosi kipokona; irarete osi eteng'e! Ikokini eronar ai kama kus kalu ikwenasi kipokona; ibworoete osi nepepe ka akimony!”

²⁶ “Ikokini eronar ai inerasi itung'a kere nukajokak kuju kon; imojong' kes abutu kotemasi iboro lupe ng'ulu kuju ka ikadwaraka luka aliokonu.”

Amina Ipading'atin

²⁷ Konye kalimokini eong' osi lu ipupete eong': Kominasi ipading'atin kus, kisomakisi nukajokak ng'ulu lu kireito osi,

²⁸ kisulwanyik ng'ulu lu kilamete osi, ka akilipanakin ng'ulu lu kisicanete osi.

²⁹ Kibap itwan ijo ekitinyot epe, kojalak kibap loce de; keya itwan akoti kon, koinak esati kon de.

³⁰ Koinaki itwan kajokis ni kilipi ijo ibore. Konye keyaa itwan ibore kon, mam aking'it kinyakak ijo.

³¹ Kisomak luce nu peng'unu nu ikote ijo kesi kisomakisi ijo.

³² “Kimina ijo itung'a lu kiminasi ijo, anyena atenikina idumuna ijo asulwany? Lukarokok de eminasi ng'ulu lu eminasi kesi!

³³ Bobo kisomanakini ijo nukajokak ng'ulu bon lu kisomanakinete ijo nukajokak anyena atenikina idumuna ijo asulwany? Lukarokok de isomaete kong'in!

³⁴ Kikopak ijo ng'ulu bon lu imunokiit ijo kinyakinete ijo, anyena atenikina idumuna ijo asulwany? Lukarokok de ikopanakinete lukarokok tetere edumunete etiae lope ng'olo!

³⁵ Mam! Kominasi ipading'atin kus ka akisomanakin kesi nukajokak; kikopakisi komam akidarite kinyakakisi kesi osi ibore ipede. Idumunete osi aropetait na epolo noi, kosodete osi araun idwe ka Akuju lo eliliara. Naarai ejokuna nesi kamaka ng'ulu lu mam kiyalamasi kiton lukarokusio.

³⁶ Kojaasi ka asianut kwape esianare Papa kus.”

Atubonokin luce

³⁷ “Mam atubokin luce, mam Akuju kitubokini ijo; mam akitoron luce; mam Akuju kitoroni ijo; kitimi luce, kitimi Akuju ijo.

³⁸ Koinak luce, kosodi Akuju ainakin ijo. Teni idumuni ijo akitemesit na ileleba, ibamite, ijang'jang'akite, ekobukonor, ipiakino amuruoi kon. Naarai akitemesit na iinakini ijo nes erauni akitemosit na idumuni ijo.”

³⁹ Kolimokini Yesu kesi awaragan na: Ebeikini emuduk ayait emuduk? Mam kesi kere kibirokinosi toma adwi?

⁴⁰ Mam nikesisian kilanyit lokesisianakinan keng'; konye kedau nikesisian kere akisisia keng' erauni bala lokesisianakinan keng'.

⁴¹ “Inyo ito ijo ibore ka akong'u konaci kon, konye mam ijo kitee apung'ure na ejii akong'u kon?

⁴² Ikoni ijo ibeikini alimokin onac kon ebe, ‘Okwai onac, kinyek kalema eong' ibore ka akong'u kon,’ konye mam bere ijo kitee apung'ure ka akong' kon kilope? Ijo nikemole! Koge kolema apung'ure ka kong'u kon kilope tetere ibeikini ijo anyun kojokan alemar ibore ka akong'u konaci kon.”

Ekitoi ka Araito keng'

⁴³ Ekitoi lo elae mam kirae araito nukarokok, kere ekito lo erono akira araito nukajokak.

⁴⁴ Ng'olo ekitoi ejenuno ka araito kanu irae; mam ijo kideng'uni araito ka ekaereret kokokwa, kere imusabibun kokitwi kimukarambi.

⁴⁵ Itwan ni ejokuna eyauni ajokun alomun kama igwaitere iboro lu ejoka kotau keng'; itwan nikaronon eyauni nukarokok alomun kama igwaitere nesi iboro lukarokok. Naarai akituk inera nu ileleba otau.

Lukadukok iare luka etogo

⁴⁶ “Inyo inyaritotor osi eong', ‘Lokapolon, Lokapolon,’ konye mam osi kisomaete nu alimokini eong' osi?

⁴⁷ Ng'ini kere ni ebuni nama kang' ka akipup akiro kang' ka asoma nu ebalasi, etodikini eong' osi eputosi nesi ka ng'ai.

⁴⁸ Eputosi nesi ka etwan lo aduk etogo keng', kobok nama euja kakipiakin apetetait na ataba. Kilelebun akao ko nang' etogo ng'olo konye mam akijang'akin, naarai adukite tena.

⁴⁹ Konye ng'ini kere ni epupuni akiro kang' kong'eri ayong'it kesi eputosi ka itwan ni keduki etogo keng' mam kepesikiiti apetatait; kenang' akale etogo ng'olo, ibiror atipet-anyena akibiror nakaronon noi na abu kojaikin!”