Luka 5 - AKITUTUKET NAKITETET (NEPEPEKA ISABULIN KA AWARAGASIA)

Enyarauni Yesu Ikiakia Lu sodit

¹ Apaaran ape agwoi Yesu Kong'eleja ka akare kanako Genesaret ijukasi itung'a adolore nama keng' apupun akirot ka Akuju.

² Koanyuni nesi atakeren aare nu ajaasi okitolimo loka akare; kelomarito lukeinyok ilosete inetin kes.

³ Kolomi Yesu toma ataker ape naka Simon kilipi nesi kijukare nedio alomar kotolim. Kiboikin Yesu atakere kosodi akisisanakin akwap ka itung'a.

⁴ Kedau nesi ejori, kolimokini nesi Simon, “Koremo ataker nama iduloro kocakakisi inetin kus kanuka akiinyun.”

⁵ Kobong'okini Simon ebe, “Ejakait, esomata siong' akware kere, mam akikamun ibore. Konye kanuka akirot kon, acakakini eong' inetin.”

⁶ Kocakakinete kesi inetin kikamunete ikole lu ipu noi akibuc inetin kes ang'eda.

⁷ Kokwetunete kesi ipoupatin kes ka ataker kanace abunore aking'arakin kesi. Kosodete kesi abunore, kilelebata ikole atakeren aare akibuc atakeren akilum.

⁸ Na anyuna Simon Petero nukepotu kisomakinosi, kibirokin nesi akong'in keng' koking'aren ka Yesu ka atemar ebe, “Koika kama kang', Lokapolon! Arait eong' etwan loka arokusio!”

⁹ Koumokisi nesi nepepe ka ipoupatin keng' kere akipuakus kikole kalu apotu kesi kilang'utu.

¹⁰ Koumokisi Yakobo ka Yoana de, isapa ka Sebedayo. Kolimokini Yesu Simon, “Mam akurianu; ageun kipokona irauni ijo lokeinyon itung'a.”

¹¹ Kiriunete kesi atakeren okitolimo, kinyekinete ng'ini iboro, kotupete kesi Yesu.

Itang'aleuni Yesu etwan

¹² Ering'a nesi ejii ore lokapolon epe, kobuni etwan lo kileleba eng'ulo nama keng'; na kanyuna nesi Yesu, kibirokin nesi kwap kilipi nesi, “Lokapolon, kikote ijo ibeikini ijo akitang'aleun eong'!”

¹³ Koruari Yesu akan keng' kirumi nesi ebala ebe, “Akote eong'; kolau.” Atipete kinyekini eong'ulo nesi.

¹⁴ Kicorakini Yesu nesi ebe, “Mam alimokin itwan ipede, koloto kitoduun kamaka esaserdotit bobo kolem idutata kanuka alauno kon; konye kanuka akitodikin itung'a kere ebe ing'aleu ijo, kolem idutan kwape kicorakitere Musa.”

¹⁵ Konye kisiarakinosi akiro ikamuto Yesu nama elala noi. Kobunete akwap ka itung'a apupun nesi nepepe ka akitang'aleuno kamaka adekasinei kes.

¹⁶ Konye abeikini nesi aikar nama etati, akilipi.

Itang'aleuni Yesu etwan lo iteregegiara

¹⁷ Apaaran ape isisianakini Yesu, eboete Ifarisayon ice ka lukesisianakinak ikisila lukelomuuto kotaunin kere kaluko Galilaya, Yudea, ka Yerusalem. Ajii agogong' ka Lokapolon nama ka Yesu naka akitang'aleun lukadekak.

¹⁸ Kobunete ikiliok ice edakito etwan lo iteregegiara kapetat, kotamakinete ayar nesi otogo ka akipiakin nesi king'aren ka Yesu.

¹⁹ Kanuka akipuakus ka itung'a, mam kes adumun erot loka ayar nesi toma. Kosodete kesi adakar nesi kuju ka etogo, kong'arete amategula kosodete kesi akijesar nesi kwap kapetat keng' kiding' ka akatong'otong'it koking'aren ka Yesu.

²⁰ Na anyuna Yesu akiyuun na ajaasi ka kesi, kolimokini nesi etwan ebe, “Arimakin arokusio kon, opoupa kang'.”

²¹ Kogeunete lukesisianakinak ka ikisila nepepe ka Ifarisayon alimonokin, “Ng'ai etwan lo ikoni ikena ne! Akuju bon nes ebeikini arimakin arokusio!”

²² Kejeni Yesu awomowomosia kes, kosodi alimokin kesi ebe, “Inyo iitunanata osi iboro bala ng'ulu?

²³ Ebenen atemar, ‘Arimakin arokusio kon,’ kere atemar, ‘Konyou koloto’?

²⁴ Konye ketodikini eong' osi ebe Okoku ka Etwan ejaasi ka apedor kakwap naka arimakin arokusio.” Kolimokini nesi etwan lokiteregegiara ebe, “Kalimokini eong' ijo, konyou, kodaku apetetait kon koloto ore!”

²⁵ Atipete konyouni etwan koking'aren kes kere, koyari apetat na aperianana, koikari ore, ituri Akuju.

²⁶ Koumokinete kesi kere! Ileleba ayong'it, kituruoto kesi Akuju ebalasi ebe, “Inyena iboro luka aumokina lu iyanyutu oni lolo!”

Enyarauni Yesu Lebi

²⁷ Kedaunosi nu, koikari Yesu king'a koanyuni lokeraran emusolo lokenyarite Lebi, iboe ko ofis keng'. Kolimokini Yesu nesi ebe, “Kotup eong'.”

²⁸ Konyouni Lebi, kinyekini ng'in ibore kotupakinini nesi.

²⁹ Kosodi Lebi akitenakin Yesu epucit lo epolo noi ko otogo keng'. Kotoma opejok, epuaka lukerarak emusolo nepepe ka itung'a ice.

³⁰ Kosodete Ifarisayon ice nepepe ka lukesisianakinak ikisila ice lukejaasi atukot kes aking'urung'ura kamaka ikiyakia ka Yesu. King'isete kesi ebe, “Inyo inyemata osi ka amata kalukerarak emusolo kiton lukarokusio?”

³¹ Kinyakakini Yesu kesi ebe, “Itung'a lu eng'alete mam kekotosi emuruon, konye ng'ul lu edekasi.

³² Mam eong' kabuut anyaraun lu edolito, konye lukarokusio kinyekisi arokusio.”

Ang'isetait kuju ka akikanya eteng'e

³³ Kolimokinete itung'a ice Yesu ebe, “Ikiyakia ka Yoana ikanyenenete eteng'e, luka Ifarisayon de ikonanakinete nepeneni; konye lukon enyemete ka amata.”

³⁴ Kobong'okini Yesu, “Iituto osi ibeikinete osi akisikany eteng'e ipejok ejaasi eteran ka kesi? Mam kebeikinosi!

³⁵ Konye ebuut apaaran na elemarere eteran kama kes, kosodete kesi akikanya eteng'e.”

³⁶ Kolimokini Yesu kesi awaragan na de: “Emam itwan eciluni apugot naka akoti kana itet ka adapakin akoti na mojong'it. Kisomaki nesi kong'in, ecili nesi akoti nakitetet, kosodi apugot kakoti kanakitetet mam kiriamarosi kana mojong'.

³⁷ Kere de mam itwan ebukokini ebino lokitetet omukulei lu mojong', naarai ebino lokitetet ebuang'i icwei lu kimukulei, kobukor ebino kosodete icwei lu kimukulei amunaun.

³⁸ Konye ejii abukokin ebino lokitet omukulei lu kitetiak!

³⁹ Emam itwan ekote ebino lokitetet kedau akimat ebino lomojong'it. Naarai ebala nesi, ‘Ejokuna lo emojong'it.’”