Luka 4 - AKITUTUKET NAKITETET (NEPEPEKA ISABULIN KA AWARAGASIA)

Atamio ka Yesu

¹ Kobong'uni Yesu kocor kaloko Yordan ileleba Emoyo Lokalaunan. Koyari Emoyo nesi moding',

² nama atamia Asatanit nesi ka aparasia akaisawong'on. Kapaki kang'in kere mam nesi akinyam ibore ipede, abu nesi kiira eteng'e.

³ Kolimok Asatanit nesi, “Kirait ijo Okoku ka Akuju, kolimok amoru nu korautu inyamat.”

⁴ Konye kobong'okini Yesu, “Ebalasi akigirasia nukalaunak ebe, ‘Mam itung'a kejarete kinyamata bon.’ ”

⁵ Kosodi Asatanit ayari nesi kuju ka akitodikin nesi ka apak kana edit akwapin nuka akwap.

⁶ Kolimokini Asatanit nesi ebe, “kainakini eong' ijo apedor na kere nepepe ka abara na.” “Adaun akibakin eong' kere, konye abeikini eong' ainakin ng'in kere ni aseuni eong'.

⁷ Eraunete lu kere lukon kiluruok ijo eong'.”

⁸ Kobong'okini Yesu ebe, “Ebalasi akigirasia nukalaunak, ‘Kimaa Lokapolon Akuju kon nepepe ka akijaanakin nesi bon!’ ”

⁹ Koyari Asatanit nesi Yerusalem ka akipiakin nesi kuju cut ka Etogo ka Akuju, kalimokin nesi ebe, “Kirait ijo Okoku ka Akuju, kocakar kwap alomar kane.

¹⁰ Naarai ebalasi akigirasia nukalaunak ebe, ‘Elimokini Akuju imalaikan keng' kidarata ijo kotenan.’

¹¹ Bobo ebala, ‘Kikamunete kesi ijo ka akanin kes tetere emam akejen kon kejororete amoru.’”

¹² Konye kobong'okini Yesu ebe, “Ebalasi akigirasia nukalaunak, ‘Mam akitam Lokapolon Akuju kon.’ ”

¹³ Kedau Asatanit akitam Yesu korotin kere, kinyekini nesi nedio.

Egeuni Yesu Asoma keng' ko Galilaya

¹⁴ Kosodi Yesu abong'ori Galilaya, ejaasi nesi ka apedor naka Emoyo Lokalaunan. Kisiarakinosi akiro ikamuto nesi alaro ng'in kere.

¹⁵ Kisisianak nesi ko otogoi luka alipasia ka Iyaudin, kituruoto itung'a kere nesi.

Eng'erio Yesu ko Nasaret

¹⁶ Koloto Yesu Nasaret, nama etopolounere nesi. Apaaran nake Esabato, koloto nesi osinagogi. Koguoi nesi akisoma akigirasia nukalaunak,

¹⁷ kibakinete nesi ekitabo ka ekadwaran Isaia. Kong'ari nesi ekitabo kosodi adumun nama igirite:

¹⁸ “Ejii Emoyo ka Lokapolon kuju kang', Naarai aseu nesi eong' ayaun akiro nukajokak namaka lukapalapalak. Ejukia nesi eong' alimor alakakino nama kalu eyenite nepepe ka abong'uni naka akitere kama kimudukaisik; ka alakakin ng'ulu lu imakiite,

¹⁹ Kalimor ebe adol apak na eyuuna Lokapolon itung'a keng'.”

²⁰ Kogolokini Yesu ekitabo kosodi akinyakakin lokejaanakinan, kakiboikin. Itung'a kere ko sinagogi etete nesi.

²¹ Kogeuni nesi alimonokin kesi ebe, “Lolo etodolikin akigirasia nukalaunak nu kakii kus.”

²² Kolakarosi kesi kere kanu keng', koumokisi akiro nukasianut nu kebu nesi kinere. Kotemarete, “Mere nesi okoku ka Yosef?”

²³ Kolimokini nesi kesi, “Amunokiit eong' ebe ibuto osi alimokin eong' awaragan na ebala ebe, ‘Emuruon, kitang'aleuni ijo elope. Bobo ilimokinete osi eong' ebe kesomak eong' kore kane iboro apotu osi kiirasi kisomakin ko Kapernaum.’”

²⁴ Kosodi nesi atemar ebe, “Teni, kalimokini eong' osi, mam ikadwarak kidiaute kakwap keng'.”

²⁵ “Kopuputu eong': Abeite epuak apuseru ko Israel apak ka Elia, emam akiru ikaru iuni ka atutubet. Kolom eteng'e lo apolo noi kakwap kang'in kere.

²⁶ Konye mam ajukiar Elia namaka itwan kipede ko Israel, adepar namaka apuserut nako Sarefat kalaro kanako Sidon.

²⁷ Ajaasi itung'a lu ipuaka lukeng'ulo aparasia ka ekadwaran Elisha; konye amam ipede kama kes apon kitang'aleune adepar Namam bon loko Siria.”

²⁸ Na eirarata itung'a ko osinagogin nu kilelebun kesi anyunyura.

²⁹ Konyounete, ka arikor Yesu king'a ketaun. Koyarete nesi kuju cut kemoru nama adukokite etaun kes. Akotosi kesi acakar nesi kwap,

³⁰ konye kitoro nesi kiding' kes koikari.

Etwan lokejaasi ka eparait

³¹ Kosodi Yesu alosite Kapernaum, etaun ko Galilaya, nama esisianakina nesi itung'a kaparan kanake Esabato.

³² Abutu kesi kere koumokisi ekipone lo esisianakina nesi, naarai enera nesi kapedor.

³³ Kotoma osinagogi ajii etwan lo ajaasi ka eparait lokaronon; kilulukini nesi koporoto kaloko kuju,

³⁴ “Okwai! Inyena ikote ijo kama kosi, Yesu loko Nasaret? Ijii ijo ne amudiar siong'? Ajen eong' ijo: Irait ijo ekiyakia Lokalaunan loka Akuju!”

³⁵ Kolimokini Yesu eparait, “Kililing', koloma kama keng'!” Kocakini eparait etwan kwap koking'aren kes, kalomar kama keng' mam kikang'asit nesi.

³⁶ Abutu itung'a kere koumokisi kalimonokinokinosi ikulopek, “Akiro nunyeka nu? Ireng'iari etwan lo ipaara kapedor kagogong', kolomarete!”

³⁷ Kisiarakinos akiro ikamuto Yesu ng'olo wai kalaro kang'in.

Itang'aleuni Yesu Itung'a lu Ipu

³⁸ Koloma Yesu ko osinagogi kolosi otogo ka Simon. Amwanikina noi akwana ka akamuran ka Simon. Kolimokinete kesi Yesu ejautene keng'.

³⁹ Kolosi Yesu, kogwoi kawai kapetat keng' kosodi alimokin amwanus kinyek nesi. Kinyekini amwanus nesi, konyouni nesi atipet akijaanakin kesi.

⁴⁰ Kedau akolong' akilom ng'ulu kere lukejaatatar ka ipoupatin lukedekasi abutu koyautu kesi nama ka Yesu; kidokonokini nesi akanin keng' nama kes kere kakitang'aleun kesi kere.

⁴¹ Kolomarete ipara de kamaka itung'a iluluyete, “Irait ijo Okoku ka Akuju!” Abu Kristo kireng'ia ipara, mam ajalakin kesi ejori naarai ajenete kesi ebe erait nesi Kristo.

Isisianakini Yesu Kosinagogin

⁴² Iwalari akwap, kolomari Yesu kotaun koi kari alaro na esil. Kogeunete itung'a akote nesi, na adumunata kesi nesi, kotamakinete akirebokin nesi aikar.

⁴³ Konye kolimokini nesi kesi ebe, “Ejii eong' alimonor akiro nukajokak nuka Ajakanut ka Akuju kotaunin kice de, naarai nu nes kejukuut Akuju eong' asoma.”

⁴⁴ Kanuka ng'un abu nesi kolimono ko otogoi luka alipasia ka Iyaudin kere ka akwap nako Yudea.