Luka 3 - AKITUTUKET NAKITETET (NEPEPEKA ISABULIN KA AWARAGASIA)

Alimonor ka Yoana Lokebatisan

¹ Arait ekaru lo kitomonet kikany loka akipuga naka Kaisari Tiberio; arait Ponto Pilato egavana loko Yudea, arait Erode lokepugan ko Galilaya, arait onac keng' Pilipo lokepugan loko Iturea nepepe ka Trakonitis; Lisanias nes episi Abilene,

² araito Anas nepepe ka Kaiafas isaserdotin lukapolok. Kapaki kang'in kobuni akirot ka Akuju nama ka Yoana okoku ka Sakaria ejii moding'.

³ Kanuka ng'un kolosi Yoana ng'ini laro nako Yordan, elimonori ebe, “Kinyekisi arokusio kus, kibatisai osi, erimakini Akuju arokusio kus.”

⁴ Kwape igiritere kokitabu ka ekadwaran Isaya: “Iworo itwan komoding': ‘Kitenakisi erot ka Lokapolon; koruasi esokot kitor nesi!

⁵ Itemokina akileleb ng'in ajelukot, karuarosi aukon kere nepepe ka imoru. Itemokina aruar irotin lu ekudikudito, kakitalaun isokon lu icuguranara.

⁶ Anyuni etung'anan kere alakuno ka Akuju!’”

⁷ Kolot akwap ka itung'a namaka Yoana kibatisa nesi kesi. Kolimokini nesi kesi ebe, “Osi imunuo lu!” “Ng'ai kikwenyari osi akerite kamaka anyunyura kana ebut?

⁸ Kisomata iboro ng'ulu lu itodiarito ebe inyekisi osi arokusio kus. Mam ageun ejori ebe Abraam erait loka ekitekere kus. Alimokini eong' osi ebeikini Akuju alemun amoru nu akitaraun ipajanitin ka Abraam!

⁹ Elokokina ayepe akitubu ekitoi kamori keng' ka akibirokin kwap. Ekitoi kere lo mam keyauni araito nu ejooka etubokino kwap ka acakakin toma akimi.”

¹⁰ King'itata itung'a nesi, “Inyena isomakinete siong'?”

¹¹ Kobong'ok nesi kesi, “Ni ejaasi ka asatin aare koinak ape ng'in eni emamatatar, ng'ini ni ejatatar ka inyamen komorata kaluce.”

¹² Kobunete lukerarak emusolo ice akibatisao, kosodete kesi aking'it nesi ebe, “Lokesisianakinan, inyena itemokina siong' asoma?”

¹³ Kolimokini nesi kesi ebe, “Mam akidiare adepar nu itemokiit ekisil osi,”

¹⁴ King'isete luka ajore de nesi ebe, “Abo siong'? Inyena itemokina siong' asoma?” Kobong'okini nesi kesi ebe, “Mam ademun itwan ipede ikabel kere akiwosa kaliokonu. Kilesikinosi kanu itaco osi.”

¹⁵ Kogeuni amuno ka itung'a akiyata, kogeunete kesi apodonokin kerait Yoana nes Kristo.

¹⁶ Kosodi Yoana alimokin kesi kere ebe, “Ebatisae eong' ka akipi, konye ebuut lo epolo noi kama kang'. Mam eong' kelesikina alacun aunoi ka amukan keng'. Ibatisai nesi osi ka Emoyo ka Lokalaunan ka akimi.

¹⁷ Irumit nesi ekideru, epiari nesi epijal, kosodi atukokin engano odula, konye icweikini nesi agugu ka akimi kana emam kedaun.”

¹⁸ Korotin kalu ipu, abu Yoana kolimonok itung'a akiro nukajokak ka akimaima kesi kibelokisi irotin kes.

¹⁹ Konye kiretakini Yoana Erode, egavana, kanu amanya nesi Erodia, aberu konac keng', esomat iboro de ice lukarokok.

²⁰ Bobo kisomakini Erode nukarokok noi akipiakin Yoana aenis.

Akibatisao ka Yesu

²¹ Kedaun akibatisa itung'a kere, kibatisaete Yesu de. Ering'a nesi ilipi, kong'aar kuju,

²² kosodi Emoyo Lokalaunan akijesakin nama keng' kokipone kaloka ajele. Kolomuni eporoto kokuju ebala ebe, “Irai ijo Okoku kang' lominat. Alakara eong' ka ijo.”

Ajena ka Yesu

²³ Egeuni Yesu asoma keng', kejaasi nesi ka ikaru akaisauni. Kemunito itung'a erait nesi okoku ka Yosef, lokerait okoku ka Eli,

²⁴ okoku ka Mataat, okoku ka Lebi, okoku ka Melki, okoku ka Yanai, okoku ka Yosef,

²⁵ okoku ka Matatias, okoku ka Amos, okoku ka Naum, okoku ka Esli, okoku ka Nagai,

²⁶ okoku ka Maat, okoku ka Matatias, okoku ka Semein, okoku ka Yosek, okoku ka Yoda,

²⁷ okoku ka Yoanan, okoku ka Resa, okoku ka Serubabel, okoku ka Sealtiel, okoku ka Neri,

²⁸ okoku ka Melki, okoku ka Adi, okoku ka Kosam, okoku ka Elmadam, okoku ka Er,

²⁹ okoku ka Yosua, okoku ka Eliesa, okoku ka Yorim, okoku ka Matat, okoku ka Lebi,

³⁰ okoku ka Simeon, okoku ka Yuda, okoku ka Yosef, okoku ka Yonam, okoku ka Eliakim,

³¹ okoku ka Melea, okoku ka Mena, okoku ka Matata, okoku ka Natan, okoku ka Daudi,

³² okoku ka Yese, okoku ka Obed, okoku ka Boas, okoku ka Salmon, okoku ka Nasion,

³³ okoku ka Aminadab, okoku ka Admin, okoku ka Arni, okoku ka Esiron, okoku ka Peres, okoku ka Yuda,

³⁴ okoku ka Yakobo, okoku ka Isaka, okoku ka Abraam, okoku ka Tera, okoku Naor,

³⁵ okoku ka Serug, okoku ka Reu, okoku ka Peleg, okoku ka Eber okoku ka Sela,

³⁶ okoku ka Kanan, okoku ka Arifakisad, okoku ka Sem, okoku ka Noa, okoku ka Lamek,

³⁷ okoku ka Metusela, okoku ka Enok, okoku ka Jared, okoku ka Maalaleel, okoku ka Kenan,

³⁸ okoku ka Enos, okoku ka Set, okoku ka Adam, okoku ka Akuju.