Luka 24 - AKITUTUKET NAKITETET (NEPEPEKA ISABULIN KA AWARAGASIA)

Ajarun

¹ Nakesabiti taparacu sek, kolosete aberu ates edakito iboro lu ekukunyu lukitenito kesi.

² Kodumunete kesi kikokoror amoru kokek ka ates,

³ kosodete kesi akilom toma; konye mam kesi adumun akwana ka Lokapolon Yesu.

⁴ Kogwoete kesi kaneni esurorito akwesi. Kanepe kaneni kogwoete ikiliok iare idunyasi ka kesi enapito igoyen lu ecaete.

⁵ Kolurete aberu ileleba akurianu. Kolimokinete ikiliok kesi ebe, “Inyo ikototoro osi lo ejari kamaka lukatwak?

⁶ Mam nesi kejii ne; etajaruun nesi. Kitutu nu kelimokiit nesi osi na ajaare nesi Galilaya:

⁷ ‘Tar koinakine lukarokok Okoku ka Etwan, kibubukine omusalaba ka ajarun kedaunosi apaarasia auni.’ ”

⁸ Kosodete kesi akiitun akiro keng',

⁹ nake bong'unata kesi kates kolimokinete kesi ikiyakia itomonkape kiton itung'a kere akiro nu kajokis.

¹⁰ Kerait Maria Magdalen, Yoanna, Maria toto keng' ka Yakobo kiton aberu ace nu kejaasi ka kesi nes kelimokinete ikiyakia nu;

¹¹ konye akiro nu asit bala akapolok mam kesi akiyuun.

¹² Konye konyouni Petero kamotari ates; kokukumi nesi, kwanyuni isukai bon emam ibore ice. Kobong'ori nesi ore eumokiit nu kepotu kisomakinosi.

Alosite Emaus

¹³ Apaaran ng'ipe ng'in, alosete iare kama kes adukete na kenyarite Emaus, etiai loka akilomitai akanykaare alomun ko Yerusalem,

¹⁴ inerasi kesi kuju ka iboro kalu kisomakinosi.

¹⁵ Ering'a kesi inerasi ka akinamanama nenipe, kwapuni Yesu elope kosodi alosite ka kesi.

¹⁶ Konye mam akonyen kes asesenun nesi.

¹⁷ Kosodi nesi aking'it kesi ebe, “Inyena inerasi osi ilosete?” Kogwoete kesi ekadakito.

¹⁸ Kosodi epe kama kes lo enyarite Kleopas akinyakakin nesi ebe, “Ijo bon nes irait epejonon ko Yerusalem lo mam kejeni iboro lu esomakinosi kang'ina kapaarasia kanu?”

¹⁹ King'isi nesi kesi, “Iboro lunyena?” Kobong'okini kesi ebe, “Iboro lu kisomakinosi kamaka Yesu loko Nasareti. Arait nesi ekadwaran lo ejaasi ka apedor naka asoma akisisianakin koking'aren ka Akuju kiton itung'a kere.

²⁰ Abutu lukapoloko ka isaseredootin kiton lukapugan wok kolemutu nesi kotubokine atwanare, kibubukinete nesi omusalaba.

²¹ Konye amunito siong' ebe nesi ebuni akiyuun Israel. Kuju kang'un kere lolo nes apaaran nakiuniet ape kisomakinetotor nu.

²² Abutu aberu ace nu aupasi ka siong' kisiriaputu siong'; alosito kesi ates taparacu sek,

²³ mam kesi adumun akwana keng'; kobong'unete kesi ebalasi ebe kanyuto kesi imalaikan lu atemarete ebe ejari nesi.

²⁴ Abutu ice lu ajaasi ka siong' kolototo ates, kadumun kwape kebalatatar aberu; konye mam kesi anyun nesi.”

²⁵ Kosodi Yesu alimokin kesi ebe, “Inyo ibang'aka osi kong'in kolang'ir itawon kus kong'in amunokin ng'unu kere nu kinerito ikadwarak?

²⁶ Kemam Kristo kibusakinit adumun ican luka akilomo toma akibusesu keng'?”

²⁷ Kosodi Yesu alimonokin kesi nu ketemarite kuju keng' kotoma agirasia kere, ageun kamaka ikitaboi ka Musa kiton nukigirito ikadwarak kere.

²⁸ Kosodete kesi apun kaduket kana kelosete kesi. Kosubuni nesi itolosit alosit,

²⁹ konye kirebokinete kesi nesi, ebalasi ebe, “Kiboto ka siong', naarai awara akwap, adaun apaaran.” Kosodi nesi alosite akiboi ka kesi.

³⁰ Ejii nesi ka kesi enyemete ka acede, kolemuni nesi emugati ka akisulwanyikin ka akibil ka ainakin kesi.

³¹ Kosodete akonyen kes ang'ari kojenunete kesi nesi; kosodi nesi awoli ka akonyen kes.

³² Kolimonokinosi kesi ebe, “Amam itawon wok kepotu kineputu apak na alimonokina nesi oni koroto Agirasia Nukalaunak?”

³³ Konyounete kesi akolong' ng'ipe ng'ini ka abong'or Yerusalem; kosodete kesi adumun ikiyakia itomonkape etukokina nenipe kiton ng'ulu lukejaasi ka kesi,

³⁴ lu abutu kotemasi, “Teni ajaru Lokapolon, atakanik Simon!”

³⁵ Kosodete kesi de alimor nu kepotu kisomakinosi ko oroto kiton ekipone lo kitejenuner nesi kama kes ka akibil emugati.

Etakanikini Yesu lukesisiak keng'

³⁶ Ering'a kesi inerasi nu, kogwoi Yesu elope kokiding' kes.

³⁷ Konye abutu kesi koriang'utu emunito ebe aanyutu kesi eparait.

³⁸ Kolimokini nesi kesi, “Inyo ipodosi osi, inyo ipuakatatar ang'itasia kotawon kus?

³⁹ Kwanyutu akanin kang' ka akejen kang', erait eong' elope; kirumata eong', kwanyutu; naarai eparait emam akiring' ka akojo kwape iteoto osi ejaasi ka eong'.”

⁴⁰ Nakedauna nesi alimun nu, kitodikin kesi akanin keng' ka akejene keng'.

⁴¹ Ering'a kesi kemunokina, eleleba kesi alakara kiton aumokin; kosodi nesi aking'it kesi, “Ijaasi osi ka ibore ipede ni nyamata kane?”

⁴² Koinakinete kesi nesi atutubet ka ekoleit kalo ipoite,

⁴³ kidiauni, konyemi itete kesi.

⁴⁴ Kosodi nesi alimokin kesi ebe, “Nu nes akiro kang' nu abu eong' kalimok osi ering'a eong' ajaasi ka osi, ebe ng'in ibore ni igirite kuju kang' kokisil ka Musa kiton ikadwarak nepepe ka isabulin ejii akisomakin.”

⁴⁵ Kong'ari nesi adama kes kojenutu agirasia,

⁴⁶ kosodi alimokin kesi, “Ebe igirite, ejii Kristo akicanakin kajarun kamaka lukatwak ka apaaran kanakiuniet.

⁴⁷ Ejii alimonokin kokiror keng' akwapin kere kuju ka akisilar nepepe ka arimakino ka arokusio ageun ko Yerusalem.

⁴⁸ Iraito osi lukajenak ka iboro kalu.

⁴⁹ Kitete, ejukuuni eong' nama kus lo isumunikiit Papa kang'; konye kiboto kore ka Lokapolon, akitodolo na idumunata osi agogong'u alomun kokuju.”

Eyaro Yesu kuju

⁵⁰ Kosodi nesi ayar kesi Betani, kikiari akanini keng' ka akisulwanyikin kesi.

⁵¹ Ering'a nesi isulwanyi kesi, koikari kama kes, koyarete nesi toma kuju.

⁵² Kobong'orete kesi Yerusalem elakara noi,

⁵³ kosodete kesi akitolosite ajaus Otogo ka Akuju ng'ini pak iturete Akuju.