Luka 23 - AKITUTUKET NAKITETET (NEPEPEKA ISABULIN KA AWARAGASIA)

Eyauno Yesu namaka Pilato

¹ Konyou atukot kere ka ayar Yesu namaka Pilato,

² nama ageunata kesi akiwosa nesi ebe: “Ekamunete siong' etwan lo itapait itung'a wok, elimonokini kesi mam akitaca Kaisari emusolo kobala ebe nesi elope erait Kristo, Ejakait.”

³ King'isi Pilato nesi, “Irait ijo ejakait loka Iyaudin?” Kobong'okini Yesu, “Ijo ibala.”

⁴ Kosodi Pilato alimokin lukapolok ka isaserdotin kiton akwap ka itung'a ebe, “Mam eong' kadumuti aronusu kamaka etwan kalo.”

⁵ Konye kitekekesarosi kesi noi ka agogong' ebalasi, “Ka akisisianakin keng' egeuti nesi akinyalun itung'a kere ko Yudea. Ageuni nesi ko Galilaya konye kipokona abu ne.”

Eyaro Yesu namaka Erode

⁶ Na apupuna Pilato nu, king'isi kesi, “Erait etwan lo Egalilayata?”

⁷ Na ajenuna nesi ebe elomuti Yesu kalaro kana ipisi Erode, kijukiyari nesi Yesu nama ka Erode, lo ajii nesi de Yerusalem apak ng'ini.

⁸ Na anyuna Erode Yesu, abu kolakari noi, emuit nesi anyun Yesu, naarai kedauti nesi akiirari kuju keng'. Amunokiit nesi anyuni nesi aumosit na isomakini Yesu.

⁹ Kosodi Erode aking'iting'it Yesu ka apak kana euja; konye mam Yesu abong'okin.

¹⁰ Kitolototo lukapolok ka isaserdotin kiton lukesisianakinak ka iksilia akiwosa nesi ka apedor kere.

¹¹ Kosodi Erode kiton luka ajore keng' akitisilikin ka akwenare nesi; kedautu akitanap nesi enaga loka ajakanut, ka kinyakar nesi namaka Pilato.

¹² Kosodete Erode kiton Pilato araun ipoupatin apaaran ng'ipe ng'ini, naarai araito kesi sek ipading'atin.

Etubokino Yesu Atwanare

¹³ Kosodi Pilato anyaraun lukapolok ka isaserdotin, lukayaitok nepepe ka itung'a,

¹⁴ ka alimokin kesi, “Iyaunete osi etwan lo nama kang' kosodete osi atemar itapait itung'a. Adau eong' aking'iting'iti nesi kane koking'aren kus, kopuputu, mam eong' adum etwan lo karonus ka apede ikamuti arokusio nu kiwosatotore osi nesi.

¹⁵ Atikere Erode de mam abu kodum aronus apede kama keng', nes enyakuna nesi nama wok. Emam ibore ipede isomate etwan lo ni ilesikina nesi atwanare.

¹⁶ Kanuka ng'un eposi eong' nesi ka alakakin.”

¹⁷ (Kitemokina nesi alakakin ka ainakin kesi etwan epe aparan naka Paska.)

¹⁸ Konye kodelorete kesi kere nenipe, “Kolema etwan lo, kolacaki siong' Baraba”

¹⁹ etwan lo acakakiite aenis kanuka ecuke kalo kebu kolom kotaun kiton akiar.

²⁰ Kinerata Pilato ka kesi bobo ekote alacakin Yesu;

²¹ konye kocelutu kesi “Kibubuki, kibubuki nesi!”

²² Kosodi nesi alimokin kesi nakiuniet ebe, “Inyo, inyena aronus isomate nesi? Mam eong' kadumuti aronusu kama keng' na itemokina nesi atwanare. Kanuka ng'un eposi eong' nesi ka alacakin.”

²³ Konye kitolototo kesi acela, kiporotoi kaluko kuju noi ekotosi kesi kibubukine Yesu. Kosial, kilanyi acela kes.

²⁴ Kosodi Pilato atubokin Yesu kwape kekotototor kesi.

²⁵ Kolakakini nesi etwan lokekotosi kesi, loke cakakite toma aenis kanuka akicokun ka akiara. Kosodi nesi ainakini kesi Yesu kisomata kwape itiminaritere kesi.

Ibubukino Yesu Omusalaba

²⁶ Eyarite luka ajore Yesu, kosodete kesi akiriamakin ka etwan loke elomuut ko Kurene lo enyarite Simon loke elomuut ka adukete elosi ore lokapolon. Kikamunete kesi nesi ka akisiriong' nesi emusalaba kodakite kokau ka Yesu.

²⁷ Atupito nesi akwap ka itung'a; ajaasi aberu ace kiding' kes nu amonyete ka akilulu kanu keng'.

²⁸ Konye kibong'i Yesu nama kes ka alimokin, “Adwe nuko Yerusalem! Mam akimonyo kanu kang' konye komonyata kanu kus kikulopek kiton idwe kus.

²⁹ Naarai ebuto aparasia ebuto kesi atemar, ‘Erereng' akolipi, ka akokis nu mam kidouto ka ikising' lumam kitanakito!’

³⁰ Kosodete alimokin imoru ‘Kibirokinosi siong'!’ Ka amukuran ‘Korapakisi siong'.’

³¹ Kebeikinete asoma nu ering'a akito epalala inyena isomakin ewokito?”

³² Koyarete itung'a ice iare lukarokok akiyara ka nesi.

³³ Nakedoliata alaro na enyrite “Abolokok kakou,” kibubukinete kesi nesi kaneni kiton lukarokok iare, epe teten loce kidieny.

³⁴ Kosodi Yesu atemar, “Papa, korimak kesi; naarai mam kesi kejenete nu isomaete.” Kilamete eroet kanuka akitiak inagai keng'.

³⁵ Agwoete itung'a kariri kaneni iteete; konye kijutarete lukapugan nesi ebalasi, “Abu nesi koyu luce, kinyekisi koyuun elope, kerait nesi Kristo loka Akuju, lo eseute nesi!”

³⁶ Abutu luka ajore de kokwenatatare nesi: Kobunete nama keng' ka ainakin nesi esik,

³⁷ ebalasi, “Kirait ijo Ejakait ka Iyaudin, koyuun ijo elope!”

³⁸ Bobo kuju egirakite kuju keng', “Lo nes Ejakait loka Iyaudin.”

³⁹ Kosodi ekokolan epe lo kibubukite ka nesi akirat nesi ebala, “Mam ijo kirait Krito? Koyuun ijo elope nepepe ka siong'!”

⁴⁰ Konye kiretakini loce nesi, ebala “Mam ijo kikurianit Akuju? Idumu ijo atubokino kwape kana adumu nesi

⁴¹ Oni teni kidumutu nu itemokina; naarai idumutu oni etacenit lo itemokina kasomisio wok; konye mam etwan lo kisomat ibore ipede ni erono.”

⁴² Kosodi nesi atemar, “Yesu, Kitune eong' na ilomia ijo ajakanut kon.”

⁴³ Kolimokini Yesu nesi, “Abeite kalimokin eong' ijo, lolo ijaikinosi ijo ka eong' Paradiso.”

Atwanare ka Yesu

⁴⁴ Arait isaan ikanyikape, ajii akirionus akwapa kere akitodolo isaan ikanykaung'on,

⁴⁵ emam akolong'o kecaut; kosodi epasia ko Otogo ka Akuju acila kokiding'.

⁴⁶ Kosodi Yesu adelor keporoto kaloko kuju ebala, “Papa, akanini kon epiak eong' emoyo kang'!” Nakedauna atemar nu kong'edi etau.

⁴⁷ Nakanyuna lokapolon ka ajore nu kisomakinosi, kitur nesi Akuju kotemari, “Teni etwan lo kemam akiro!”

⁴⁸ Itung'a kere luke buto anyun nu kisomasi, nakanyunata ng'unu, kobong'orete oreria kes iposete aturuberes kes.

⁴⁹ Kogwaata ipaupatin keng' kiton aberu nu keupunosi ka nesi alomun ko Galilaya kama elwana iteete.

Anukio ka Yesu

⁵⁰ Kejii etwan lokenyarite Yosef loko Arimateya. Arait nesi epe kamaka atuket kimojong', etwan lo ejokuna kodolite,

⁵¹ lo mam abu kiyuu akitemitemisio ka asoma kes, edariti nesi ajakanutu ka Akuju.

⁵² Kolosi etwan lo nama ka Pilato ka akilipi koinakine nesi akwana ka Yesu.

⁵³ Kosodi nesi ayaun akwana ng'ini kwap ka akirapa kisukai ka akipiakin nesi ates na amam apelem kipiakiite itwan.

⁵⁴ Arait apaaran naka akitemonokin ageun esabato.

⁵⁵ Kotupakinete aberu nu keupuna ka Yesu alomun ko Galilaya Yosef, kwanyunete ates kiton ekipone lo kenukere akwana ka Yesu.

⁵⁶ Kosodete kesi abong'or ka akiten iboro lu ekukunyu ka anyeta. Kiyeng'unete kesi apaaran naka esabato kwape kekotore ekisil.