Luka 22 - AKITUTUKET NAKITETET (NEPEPEKA ISABULIN KA AWARAGASIA)

Akote akiyara Yesu

¹ Aputi epucit loka emugati lo emam kipiakite asipa, lokenyarite Epaska.

² Akuriaka lukapolok ka isaserdotin kiton lukesisianakinak ka Ikisila, kanuka ng'un akotosi ekipone loka akiara Yesu emam itung'a kejenete.

Iyuni Yuda Agwelar Yesu

³ Kolomi Asatanit namaka Yuda, lokenyarite Iskariote, lo arait epe kamaka ikiyakia itoma kaare.

⁴ Kosodi Yuda aikar ejori ka isaserdotin lukapolok kiton lu epolokiito lu idarito Etogo ka Akuju ekipone lo itegwelikina nesi kesi Yesu.

⁵ Kolakarosi kesi ka alokokin akitaca nesi ikabel.

⁶ Kocamuni Yuda kageuni akote apak naka ainakin kesi Yesu emam itung'a kejenete.

Itemonokini Yesu Akinyam Epucit loka Paska

⁷ Kodoluni apaaran naka emugati lo mam kipiakiite asipa. Ng'in nes apaaran na etubere imerekek erait isubanit nika Epaska.

⁸ Kosodi Yesu akijukiar Petero ka Yoana ebala: “Kolototo kitenakisi inyamat luka Paska, kanyamata.”

⁹ King'sete kesi nesi ebe, “Ai ikote ijo siong' kalototo akitenakin?”

¹⁰ Kolimokini nesi kesi, “Kitete, ilomete osi ore lokapolon, iriamakinosi osi ka etwan ibwokit amoti naka akipi; kotupata nesi otogo lo elomi nesi,

¹¹ kolimokisi elope etogo, ‘Ebala lokesisianakinan, ali etogo kipejok, nama itemokina eong' akinyam epaska ka ikiyakia kang'?’

¹² Itodikini nesi osi alaro na elala kokuju na itemitemite; kitenakisi neni.”

¹³ Koikarete kesi, kadumun kwape kelimokitere nesi kesi; kosodete kesi akiten epaska.

Inyamen ka Lokapolon Luke ebong'

¹⁴ Kedolo akolong', kiboikinosi nesi ka ikiyakia keng' akinyam.

¹⁵ Kolimokini nesi kesi, “Imuit eong' cut akinyama epaska lo ka osi ering'a eong' kecanakina!

¹⁶ Kalimokini eong' osi mam eong' acut kanyemi epaska akitodol na itodunere apolou keng' kajokis kotoma ajakanutu ka Akuju.”

¹⁷ Kosodi Yesu alemun ekikopot, kiyalamikini Akuju, ka atemar, “Aso ekikopot lo komorata.

¹⁸ Kalimokini eong' osi ebe ageun kipokona mam eong' kamasi ebino lo akitodolo na ebunia Ajakanut ka Akuju.”

¹⁹ Kosodi nesi alemun emugati, ka akiyalamikin Akuju, kobili, ka ainakin kesi ebala, “Na nes akwan kang', na elemute kanu kus. Kisomata nu kanuka akiitunana eong'.”

²⁰ Kokipone kalope kang'olo, koinakini nesi kesi ekikopot kedau akinyama luka ebong'o, ebala, “Ekikopot lo erait akitutuket nakitetet naka Akuju na enueskite ka aokot kang', nu ebukoro kanu kus.”

²¹ “Konye, koanyutu! Lo egwelari eong' ejii ne enyemete ka eong'!

²² Etwani Okoku ka Etwan kwape ketiakuna Akuju, konye ikoni eronari ai kamaka etwan kalo egwelari nesi!”

²³ Kosodete ageun aking'itanari kesi ikulopek ng'ai kama kes elosi asoma nu.

Apega kuju ka apolou

²⁴ Kolomuni apega kamaka lukesisiak ebe ng'ai kama kes epolo noi akilanya luce.

²⁵ Kolimokini Yesu kesi, “Ijakaa luka akwap ejaasi ka apedor kuju ka itung'a kes losodete lu ipugaete kesi ayar ekiror, ipoupatin ka itung'a.

²⁶ Konye mere kong'in kama kus; konye ni epolo kama kus ejii nesi eraun nikaditan kama kus kere, ni ing'arenikiit ejii arauni bala nikejaanakinan.

²⁷ Ng'ai epolo, ni iboikin kwap akinyama kere ni ijaanakini? Ni iboe kokwap. Konye ajii eong' kiding' kus bala lokejaanakinan.”

²⁸ “Osi nes lu ajaikinosi ka eong' kotoma atamisio kang',

²⁹ kainakini eong' osi ajakaanut kwape kainakina Papa kang' eong',

³⁰ tetere inyemete osi ka akimata ka amesa kang' kotoma ajakanut kang', ka akiboi kocolong'o luka akibusesu itubonokinete itekerin itomonkaare luko Israel.”

Edwaruni Yesu eng'eri Petero nesi

³¹ “Simon, Simon! Kopup! Acamakin Asatanit akitama osi kere, agitari lukajokaka kamaka lukarokok, kwape egitanara lokakorwon engano kamaka aseuko.

³² Konye elipaki eong' ijo Simon tetere mam akiyuun kon kibiror. Na ibong'una ijo nama kang', ejii ijo akitogogong' ikanacan kon.”

³³ Kobong'okini Petero ebe, “Lokapolon, alokokina eong' alosite ka ijo aenis katwanare ka ijo!”

³⁴ Kotemari Yesu, “Kalimokini eong' ijo Petero ebe, mam emasinik kerwokin akware na ering'a ijo kitemara irwan kauni ebe mam ijo kijeni eong'.”

Ekibeti, Ecwe ka Ekileng' Lokaujan

³⁵ Kosodi Yesu aking'it ikesisiak keng', “Na ejukiara eong' osi apak ng'ini emam ekibeti, ecwe kere amukan, kebuu ibore ipede kokada osi?” Kinyakunete, “Mam ibore.”

³⁶ Kotemari Yesu, “Konye kipokona, ng'in ni ejaatatar ka ekibeti kere ecwe ejii akirum. Ng'in kere ni emam kejaatatar ka ekileng' lokaujan ejii agwelar akoti keng' ka agwela ekileng' lokaujan.

³⁷ Naarai kalimokini eong' osi ebe agirasia nukalaunak nu ebalasi ebe, ‘Abu komorata kalukarokok,’ ejii akitodolikin ikamuuti eong', naarai nukigirigirite kuju kang' aikasi araun abeite.”

³⁸ Kotemarete lukesisiaka, “Lokapolon! Kong'olek, ileng'ia lukaujak iare lu!” Kotemari nesi “Eleskinosi!”

Ilipi Yesu komoru kaloko Oliveti

³⁹ Kolomuni nesi, ka aikar moru loko Oliveti kwape kenaikitere nesi, kosodete lukesisiak keng' atupakin nesi.

⁴⁰ Nakedolia nesi alaro ng'ini kolimokini nesi kesi, “Kilipete tetere mam osi kilomete toma atamisio.”

⁴¹ Kosodi nesi agitar kama kes alwanus bala na edoli kecakar amoru ka akukokin kwap ka akilip,

⁴² “Papa, kikote ijo, kolema ekikopot lo kama kang'; mere kwape akotere eong' konye kisomakinosi nu ikote ijo.”

⁴³ Kotakanikin nesi emalaikat alomun kokuju, ainakin nesi agogong'u.

⁴⁴ Ejii nesi toma apipilu abu nesi kilip ka agogong'u noi; adacanakinosi akinyinyira keng' kwap nu aputosi ka aokoto.

⁴⁵ Kenyou nesi ka alipasia, kobuni namaka lukesisiak ka adumun kesi eperete kotoma akituur.

⁴⁶ Kolimokini nesi kesi, “Inyo iperete osi? Konyoutu kilipete tetere emam osi kilomete toma atamisio.”

Akikamuno ka Yesu

⁴⁷ Ering'a nesi inera, kobuni akwap ka itung'a ka etwan lokenyarite Yuda, epe kamaka ikiyakia, eyait kesi. Kolosi namaka Yesu anuikin nesi;

⁴⁸ konye kolimokini Yesu nesi, “Yuda, ibeikini ijo agwelar Okoku ka Etwan ka anuikini?”

⁴⁹ Na anyunata lukeupasi ka nesi nukapuut akisomakin, kotemarete, “Lokapolon, Ketosomata siong' ileng'ia kosi?”

⁵⁰ Kinomi epe kama kes ejolot loka esaserdotit ka lokapolon kosodi atubor akit keng' nakoteten.

⁵¹ Konye kotemari Yesu, “Mam bobo akiyatakin nu!” Kosodi akirum akit keng' ka akitang'aleun nesi.

⁵² Kosodi Yesu alimokin lukapolok ka isaserdotin kiton lukepolokiito etogo ka Akuju nepepe ka imojong' lukebuuto akikamun nesi, “Kejii osi abunere kileng'ia lukaujak ka abiroi akikamun eong' bala arait eong' ekokolan?

⁵³ Na ajatatar eong' ka osi ng'in paaran Otogo ka Akuju, mam osi akikamun eong'. Konye Akolong'o kus nes na, kiton agogong'u naka akirionus.”

Eng'eri Petero Yesu

⁵⁴ Kikamunete kesi Yesu ka ayaar nesi otogo ka esaserdotit ka lokapolon; kotupu Petero kama elwana.

⁵⁵ Kedautu kesi akinokokin akimi kokiding' ka akalapatan, kiboikinosi kesi nenipe, kosodi Petero de akiboikin ka kesi.

⁵⁶ Koanyuni nakejanakinan nesi iboe kama ecae, kong'olekini nesi kosodi atemar, “Etwan de lo ajaasi ka nesi.”

⁵⁷ Konye kong'eri Petero ebala, “Aberu, mam eong' kajeni nesi.”

⁵⁸ Nedio along'u, kwanyuni etwan ece de nesi ka atemar, “Ijo de irait epe kama kes.” Konye abu Petero kotema, “Etwan, mam eong' karait.”

⁵⁹ Kedaun apak bala esaa epe, kosodi ece de atemar iketa ebe, “Teni etwan de lo ajaasi ka nesi; naarai erait nesi Egalilayat.”

⁶⁰ Konye kotemari Petero, “Etwan, mam eong' kajeni nu inera ijo.” Kanepe kaneni, ering'a nesi inera, korwokini emasinik.

⁶¹ Kibong'i Lokapolon ka ang'olekin Petero. Kosodi Petero akiitun akirot ka Lokapolon, ekipone lokelimokitere Yesu nesi, “Ering'a emasiniki keruokina lolo, ing'eri ijo eong' kauni.”

⁶² Koikari Petero king'a akimonyo kapipilu noi.

Akwenare ka akibung'a Yesu

⁶³ Kokwenatatar itung'a lu kidarite Yesu ka akibung'a nesi,

⁶⁴ Korapakinete nesi akonyen keng' king'isete nesi, “Kolim! Ng'ai kinomo ijo?”

⁶⁵ Bobo kinerata iboro ice lu ipu luka akirata nesi.

Eyauno Yesu king'aren kebarasa

⁶⁶ Kiwala akwap, kosodi atukot naka imojong' ka itung'a atukokin nenipe kiton lukapolok ka isaseredootin kiton lukesisianakinak ka ikisila kayaun nesi atukot kes ebalasi,

⁶⁷ “Kirait ijo Kristo, kolimok siong'.” Konye kolimokini nesi kesi, “Kalimok eong' osi, mam osi kimunokinete;

⁶⁸ keng'it eong' osi, mam osi kinyakunete.

⁶⁹ Konye ageun kipokona akitolosite king'aren iboikin Okoku ka Etwan akan nako teten naka agogong' ka Akuju.”

⁷⁰ Kotemarete kesi kere, “Irait konye ijo Okoku ka Akuju?” Kolimokini nesi kesi, “Osi ibalasi arait eong'.”

⁷¹ Kotemarete, “Inyo konye bobo ikotototor oni alimoret? Naarai ipuputu oni ikulopek kakituk keng'.”