Luka 20 - AKITUTUKET NAKITETET (NEPEPEKA ISABULIN KA AWARAGASIA)

Aking'itasait kuju ka apedor ka Yesu

¹ Apaaran ape ejii Yesu Otogo ka Akuju isisianakini itung'a ka alimonokin kesi Akiro Nukajokak, kobunete lukapolok ka isaserdotin, lukesisianakinak Ikisila nenipe ka imojong',

² kolimokinete kesi nesi, “Kolimokine siong', anyena apedor ejaasi ka ijo asoma iboro lu? Ng'ai kiinakini ijo apedor na?”

³ Kobong'okini Yesu kesi, “kinyekisi keng'it eong' osi ang'itasait kipokona. Kolimokisi eong',

⁴ kelomuni apedor ka Yoana naka akibatisa kamaka Akuju kere kamaka itung'a?”

⁵ Kogeunete ikulopek apega, “Inyena itemarete oni? Kitemasi oni, ‘Kamaka Akuju,’ etemari, ‘Inyo konye, mam osi amunokin Yoana?’

⁶ Konye kitemasi oni ‘Kamaka itung'a,’ kibirete oni itung'a lu kere kamoru, naarai emunokito kesi kere ebe kerait Yoana ekadwaran.”

⁷ Kosodete kesi abong'okin, “Mam siong' kajenete nama kelomuna.”

⁸ Kosodi Yesu alimokin kesi, “Atikere eong' de mam kalimokin osi apedor ani eswama eong' iboro lu.”

Awaragan kuju kalukakorwok komanikor

⁹ Kosodi Yesu alimokin itung'a awaragan na: “Ajii etwan apak ape abu kiraa emanikor, ka akinyekina kalukakorwok, koikari kore apak na euja.

¹⁰ Kedolo apak naka akideng' araito, kijukiari etwan ng'olo lokejaanakinan keng' namaka lukakorwok kang'ul koinakisi nesi atutubet karaito kemanikor. Konye kibung'aete lukakorwok nesi, ka akireng'iar nesi mam ibore.

¹¹ Kosodi nesi akijukiyar lokejaanakinan ece; konye kibung'aete lukakorwok nesi de, ka akitisilikin nesi, ka akireng'iar nesi mam ibore.

¹² Kijukiyari nesi lokejaanakinan lokiuniet; kikang'asata lukakorwok nesi de, ka acakar nesi king'a.

¹³ Kosodi elope emanikor atemar, ‘Inyena esomakini eong'? Ejukiyari eong' okoku kang' lo ominat; kanaka abeite eyong'ete nesi!’

¹⁴ Konye nakanyunata lukakorwok nesi, abutu kolimonokinosi, ‘Lo nes okoku ka elope. Kaarata nesi kosodete iboro keng' araun luwok!’

¹⁵ Kocakarete kesi nesi king'a kemanikor ka akiyara nesi.” King'isi Yesu ebe, “Inyena konye isomakini elope emanikor lukakorwok lu?”

¹⁶ “Ebuni nesi akiara itung'a ng'ulu, ka ainakin emanikor lukakorwok ice.” Na kiirarata itung'a akiro nu, kotemarete ebe, “Mam nu akisomakin!”

¹⁷ Kong'olekini Yesu kesi ka aking'it, “Inyena konye apolou ka akigirasia kanu?” “Amoru na kepotu lukadukok kong'eroto nesi araun na elae noi akilanya nuce.

¹⁸ Itwan kere ni ibirokin kuju kamoru kana ibetebetar; kedacakin amoru ng'in kuju ka itwan, ipiricari nesi.”

Aking'itasait kuju ka akitaca emusolo

¹⁹ Kotamakinete lukesisianakinak ka Ikisila kiton lukapolok ka isaseredootin akikamun Yesu kanepe kaneni, naarai ajenete kesi ebe awaragan na etepeg kesi; konye akuriakito kesi itung'a.

²⁰ Kosodete kesi akote apak. Kogwelete kesi itung'a ice akimolekin ebe ejoka kesi, kosodete akijukiyar kesi akilok Yesu ka ang'itasia, tetere ebeikenete kesi ayaar Yesu namaka egavana.

²¹ Kolimokinete lukang'icak Yesu ebe, “Lokesisianakinan, kijenete siong' ebe nu inera ijo ka akisisianakin ideerete. Kijenete siong' ebe mam ijo kikuriana apolou kitwan kere, konye isisianakini ijo abeite ikamuut nu ekote Akuju kamaka itung'a.

²² Kolimok siong' ecamuut Ekisil akitaca emusolo nama ka Kaisari kere mam?”

²³ Konye koanyuni Yesu aloketait kes kosodi alimokin kesi,

²⁴ “Kitodikisi eong' ang'otole naka epwesa. Nakang'ai aputo na kiton ekiror lo?” Kobong'okinete ebe, “Naka Kaisari.”

²⁵ Kosodi Yesu atemar, “Ejokuna, konye kotacata Kaisari nu eraito nuka Kaisari, kotacata Akuju nu eraito nuka Akuju.”

²⁶ Mam itung'a abutu kobeikisi akikamun nesi kokipone kajokis, kanuka ng'un abutu kotautu ti, kaumokin ekipone lo enyakuna nesi.

Aking'itasait kuju ka ajarun

²⁷ Kosodete Isadukayon ice, lu ebalasi ebe emam ajarun, abunore nama keng',

²⁸ kosodete kesi aking'it nesi ebalasi ebe, “Lokesisianakinan, abu Musa kigirak siong' ekisil lo. ‘Ketwana onac ketwan ejaasi ka aberu komam idwe, ejii onac keng' akirum apuserut ka akidokin onac keng' idwe.’

²⁹ Ajaasi ikanacan ikanykaare; komanyi losodit kotwani emam idwe.

³⁰ Komanyi lokiyareit apuserut,

³¹ kosodi lokiuniet de. Kisomakin ibore ng'ipe ng'in kama kes kere ikanykaare, abutu kotwakata mam kidouto idwe.

³² Kosial, kotwani aberu de.

³³ Apaaran na ejarunata itung'a, erauni nesi aberu ka ng'ai? Ikanykaare kere amanyito nesi.”

³⁴ Kobong'okini Yesu kesi ebe, “Ikiliok kiton aberu nuka aparasia kanu emanyasi,

³⁵ konye ikiliok kiton aberu nu ilesikina ajarun kamaka lukatwak ka akijar kokaru kalu ebuto, mam kemanyasi.

³⁶ Eputokinosi kesi ka imalaikan, mam ketwakete. Eraito kesi idwe ka Akuju, naarai ajarutu kesi kamaka lukatwak.

³⁷ Itodikit Musa tena ebe lukatwak itajaruno. Kagirasia kanu inerasi kuju ka ekitwi kalo enoki, enyariti nesi Lokapolon Akuju ka Aburaam, Akuju ka Isaka nepepe ka Akuju ka Yakobo.

³⁸ Erait nesi Akuju kalu ejarete, mere kalu etwakito, naarai kama keng' ejarete kere.”

³⁹ Kolimunete lukesisianakinak ice luka ikisila, “Lokesisianakinan, ibong'oki ijo tena!”

⁴⁰ Mam bobo kesi ang'asikin aking'it nesi akirot apede.

Aking'itasait kuju ka Kristo

⁴¹ King'isi Yesu kesi, “Ikokino etemaro ai ebe Kristo erauni ajena ka Daudi?

⁴² Naarai ebala Daudi elope kokitabo kaloka Isabulin”, “Kolimokini Lokapolon kang': Kiboikin ne teten kang'

⁴³ akitodolo nama etarauna eong' ipading'atin kon nama idokokiit ijo akejen kon.

⁴⁴ Kenyarit Daudi nesi ‘Lokapolon’; ikoni konye Kristo erauni ajena ka Daudi ai?”

Ikwenyari Yesu kuju ka lukesisianakinak Ikisila

⁴⁵ Epupete itung'a kere nesi, kolimokini Yesu lukesisiak keng',

⁴⁶ “Kocoikinasi ka lukesisianakinak Ikisila, lu enaikito alosite enapito inagai lukaujak kominasi kimalai kesi kayong'ite kosokoni; ng'ulu lu esete icolong'o lu egitarite kosinagogin kiton alarosinoi nu elaete noi kopucin;

⁴⁷ lu edemete apuseru ireria kes, kiton konye akilip alipasia nukaujak! Akitisilaro kes eronari noi!”