Luka 2 - AKITUTUKET NAKITETET (NEPEPEKA ISABULIN KA AWARAGASIA)

Akidouno Ka Yesu

¹ Kaparasia kang'un kolomuni akirot kamaka Kaisari Agusto ebe itemokina akimar itung'a kere kakwap.

² Na nes akimario nasodit na, erait Kwirino egavana loko Siria.

³ Kolototo itung'a kere akimario, ng'in itwan ore kes lokapolon.

⁴ Kolomari Yosef de ko Galilaya ko otaun kaloko Nasaret, alosit Yudea ore ka Daudi, lo enyarite Beteleem, naarai alomuut nesi kokitekere nepepe ka ekeki ka Daudi.

⁵ Kolot nesi akimario nepepe ka Maria aberu keng' na apotie.

⁶ Ejaasi kesi ng'ina, kodoluni aparan keng' naka akidoun.

⁷ Kidouni nesi ikoku keng' ni sodit ni sapat, koburakini nesi ikoku kinagai kidwe, kiperikini nesi ikoku atuba, amam alaro na abeikito kesi akiboia ko otogo ka ipejok.

Lukecokok nepepe ka Imalaikan

⁸ Kalaro kang'in ajaasi lukejokok king'a idarete ibaren kes kwaare.

⁹ Kotakanuni emalaikat ka Lokapolon kama kes, kosodi akibusesu ka Lokapolon acaikin kesi ng'olo wai. Kokuriakarosi kesi noi,

¹⁰ konye kolimokini emalaikat kesi, “Mam akurianu; kiteete, ainut eong' osi akiro nukajokak nuka alakara kana epolo noi, nu ebunete otung'a kere.

¹¹ Aparan nape na kotaun ka Daudi edoun Loketajaran kus Kristo Lokapolon!

¹² Erauni na akitodiaret kama kus: Idumunete osi ikoku eburite kinagai keng' eperi katuba.”

¹³ Kanepe kaneni kojaikinosi emalaikat nepepe ka ajore nako kuju iturete Akuju ebalasi,

¹⁴ “Akibusesu kojai namaka Akuju lo eliliara, ka aipuc ka akwap kamaka ng'ulu kalu italakarito nesi!”

¹⁵ Kebong'osi imalaikan kuju, kolimokinosi lukecokok, “kalototo Beteleem kaanyutu ibore eni ni esomakin, ni alimoki Lokapolon oni.”

¹⁶ Kiwonyarosi kesi, kodumunete Maria ka Yosef nepepe ka ikoku eperi katuba.

¹⁷ Kanyutu lukecokok nesi, kolimokinete kesi nukelimorit emalaikat ikamut ikoku.

¹⁸ Ng'ulu kere lukepuputo akiro kalukecokok, abutu koumokisi noi.

¹⁹ Konye abu Maria kigwa akiro nu, kawomowom ko otau keng'.

²⁰ Kosodete lukecokok abong'or, einakito Akuju akibusesu ka akitur kang'un kere nu kepotu kesi kiirasi ka anyun kwape kilimokitere kesi.

Emaikino Yesu Ekiror

²¹ Kosial ka apaaran kana kikanyet kauni, na kekepere nesi, komaikinete nesi Yesu, ekiror lo keinakiit emalaikat nesi ering'a kepotuna nesi.

Eyaro Yesu Otogo ka Akuju

²² Kedolo apak naka akitalauno kes, atupa ka ekisil ka Musa, koyaunete kesi nesi Yerusalem ainakin nesi Lokapolon

²³ kwape igiritere kokisil ka Lokapolon: “Ng'ini ikoku ni sodit ni sapat edusio Lokapolon.”

²⁴ Kolototo kesi de alemun isuban luka ajelei aare kere aleuron aare, kwape kekotore ekisil ka Lokapolon.

²⁵ Kapak kang'in ajii etwan anyarite Simion lo eboe ko Yerusalem. Arait etwan lo ajokuna, etwan lo akurianit Akuju. Edarit nesi kolakune itung'a luko Israel. Ajaasi Emoyo Lokalaunan ka nesi

²⁶ kedaute akitumunikiite nesi ebe mam nesi ketwaani ering'a nesi kanyuna Kristo lokitumunikiit Lokapolon.

²⁷ Eyait Emoyo, koikari Simion Otoga ka Akuju. Na ayaunata ikauriak ikoku Yesu Otogo ka Akuju akisomakin nesi nu kekote Ekisil,

²⁸ kidiauni Simion ikoku ka akanin keng' kiyalamik Akuju ebala:

²⁹ “Kipokona, Lokapolon, iricaki ijo akitumunete kon, kinyek konye ekejaanakinan kon koika kotoma aipuc.

³⁰ Naarai adautu akonyen kang' anyun alakuno kon,

³¹ na ibu ijo kitemetem ejaasi ka itung'a kere:

³² Acaus naa apukokin itung'a luka akwap, ka ayaun akibusesu nama ka itung'a kon Israel.”

³³ Koumokisi papa keng' ka toto keng' akiro nu enera Simion ikamuut ikoku.

³⁴ Kisuluanyik Simion kesi kosodi alimokin Maria, toto keng', “Ikoku eni eseut Akuju kanuka akibiror ka ayuuno kalu ipuaka ko Israel. Erauni nesi akitodiaret alomun kamaka Akuju na ebunete lu ipuaka ejor mam kekotosi.

³⁵ (Kosodi ekileng' lokaujan akidaa etau kon kelope bobo), tetere awomowomosia ka itauon kalu ipu epukorio.”

³⁶ Bobo ajii akadwaran na anyarite Ana, akoku ka Fanuel, nako okitekere ka Aser; amojong'it nesi noi, iboito nesi ka okilen keng' ikaru ikanyikaare alomun ka abekot keng',

³⁷ bobo bala apuserut akitodol ikaru akaisakanykauni ka iwong'on. Mam nesi alomar ko otogo ka Akuju, imae ka akikanya eteng'e ka akilip akware ka aparan.

³⁸ Akolong' ng'ipe ng'in kodoluni nesi, kialamik Akuju, bobo kinere nesi kuju ka ikoku kamaka ng'ul kere kalu kidarito alakuno ka Yerusalem.

Abong'un Nasaret

³⁹ Bobo kedautu kesi asoma kajokis nu akotokina kesi asoma atupa ka ekisil ka Lokapolon, kobong'orete kesi ore kes Nasaret ko Galilaya.

⁴⁰ Kopolouni ikoku kakicata; eleleba nesi acoa, asuluany ka Akuju ajii nama keng'.

Esapat Yesu ejii Otogo ka Akuju

⁴¹ Ng'olo karu alosenenete imojong' ka Yesu Yerusalem kanuka epucit kaloka Paska.

⁴² Ejaasi Yesu ka ikaru itomonkaare, kolototo kesi opucit kwape kisomananata.

⁴³ Kedaun epucit, kobong'orete kesi ore. Konye kideun esapat Yesu ko Yerusalem. Amam imojong' keng' ajenete nu;

⁴⁴ kituto kesi ebe kejii nesi atukot. Kanuka ng'un, kolototo kesi aparan ape kere. Kogeunete akote nesi kamaka kipajantin ka ipoupatin kes.

⁴⁵ Mam kesi adumun nesi. Kobong'orete kesi Yerusalem akote nesi.

⁴⁶ Kaparan kanakiuniet kodumunete kesi nesi ko Otogo ka Akuju, iboete ka lukesisianakinak ka Iyaudin, epupi kesi ka aking'iting'it kesi ang'itasia.

⁴⁷ Koumokisi ng'ulu kere lu apupete kuju ka akijene keng' ka abong'onokineta keng'.

⁴⁸ Koumokisi imojong' keng' na anyunata nesi, kosodi toto keng' alimokin nesi, “Okoku kang', inyo isomakina ijo siong' ekipone lo? Kialong'ong'oto papa kon ka eong' itamakito akote ijo.”

⁴⁹ Kobong'ok nesi kesi, “Inyo kikototore osi eong'? Kimam osi kijenete ebe ibusakinit eong' ajaus otogo ka Papa kang'?”

⁵⁰ Konye mam kesi amisikin abong'okinete keng'.

⁵¹ Kobong'ori Yesu ka kesi Nasaret, bobo ayong'it nesi kesi; bobo kigwa toto keng' akiro nu kere ko otau keng'.

⁵² Kitoloto Yesu apolo kotoma acoa ka akwana, bobo kitoloto adumun amina kamaka Akuju nepepe ka etung'anan.