Luka 19 - AKITUTUKET NAKITETET (NEPEPEKA ISABULIN KA AWARAGASIA)

Yesu ka Sakayo

¹ Kolomi Yesu Yeriko bobo kotubor.

² Ajii etwan neni anyarite Sakayo; arait lokedian emusolo, kobarite.

³ Akote nesi anyun Yesu nesi ng'ai, konye mam abeikini kanuka akipwaukus ka itung'a naarai auriana nesi.

⁴ Kosodi nesi amotari king'aren ka akidok okitoi lo enyarite ekaereret anyun Yesu, anyuut nesi akitoro oroto ng'olo.

⁵ Na kedoluna Yesu alaro ng'ini, kong'oliari nesi kuju kalimokin Sakayo, “Sakayo, kodoku kwap atipete, naarai ejii eong' akiboi ko otogo kon lolo.”

⁶ Kodokuni Sakayo atipete ka akidiaun nesi kalakara.

⁷ Na anyunata itung'a kere nu, kogeunete aking'urung'ura ebalasi ebe, “Aika nesi araun epejonon ka etwan kaloka arokusio!”

⁸ Kogwoi Sakayo ka alimokin lokapolon, “Kopup, Lokapolon! Ainakini eong' lukapalapalak atutubet kiboro kang', konye kademuut eong' itwan kere ibore, enyakakini eong' nesi erwana kaung'on.”

⁹ Kosodi Yesu alimokin nesi, “Lolo abu ayuno otogo lo, naarai etwan de lo erait ajena ka Aburaam.

¹⁰ Naarai Okoku ka Etwan abuni akote ka ayuuni lu ewolito.”

Awaragan naka abolai nuka esawabu

¹¹ Ering'a itung'a epupete nu, kitoloto Yesu alimokin kesi awaragan. Apuuti nesi Yerusalem, eituto konye kesi ebe Ajakanut ka Akuju aaput atakanun.

¹² Kosodi nesi atemar, “Ajii sek etwan lo apolo lo alosi akwap na alwana akitarauno ejakait. Kedumu, kobong'ori ore.

¹³ Ering'a nesi keikara, konyarau nesi lukejaanakinak keng' itomon ka ainakin ng'in itwan ijegejege ka esawabu kalimokin kesi, ‘Koanyutu nu ibeikinete osi adumun kanu mam eong' ka ajii.’

¹⁴ Konye kong'erete nesi itung'a keng' ikulopek, kijukiyarete ikiyakia kokau alosite atemar, ‘Mam siong' kikotosi etwan lo kitaraune ejakait kosi.’”

¹⁵ “Kitaraunete etwan ejakait kobong'uni. Kosodi anyaraun lukejaanakinak kanukajenun etae lo adumutu kesi.

¹⁶ Kobuni losodit ka atemar, ‘Ejakait, adumu eong' ang'otolei atomon nuka esawabu kama kipe ni ibu ijo koinak eong'.’

¹⁷ Kotemari nesi, ‘Isoma ijo ejokuna, irait ijo lokejaanakinan lo ejokuna! Kanu imunokinare ijo koboro kalu edisiaka, kainakini eong' ijo apolokiit ireria lukapolok itomon.’

¹⁸ Kobuni lokejaanakinan lokiyareit kotemari, ‘Lokapolon, adumu eong' abolai akany nuka esawabu kamaka nu kiinakit ijo eong'.’

¹⁹ Kolimokini nesi lo, ‘Ipolokini ijo ireria lukapolok ikany.’

²⁰ Kobuni lokejaanakinan ece de kotemari, ‘Ejakait, aso ang'otole kon naka esawabu; abu eong' kegwa kokitamba.

²¹ Abu eong' kakurianari ijo, naarai ininik ijo. Iyari ijo iboro lu mam keraito lu kon ka akidwenye lu mam ijo kiyeit.’

²² Kolimokini nesi, ‘Ijo lokejaanakinan lokaronon! Etosomae eong' akiro kon atubokina ijo! Ijeni ijo ebe aninik eong', ayanari eong' iboro lu mam keraito lukang' ka akidwenye lu mam eong' kayeit.

²³ Inyo konye mam ijo akipiakin ikabel kang' aking'adas? Tin eong' adumuut nu kang' ka ameda keng' abong'uni eong'.’

²⁴ Kosodi alimokin lukegwoete kaneni, ‘Kodemasi ang'otol kama keng' koinakisi lokejaanakinan lo ejaasi kijegejegen itomon.’

²⁵ Konye kolimokinete nesi, ‘Lokapolon, ejatatar nesi bere ka ang'otolei atomon!’

²⁶ Kobong'okini nesi ebe, ‘Kalimokini eong' osi, ng'ulu kere lu ejaatatar ka ibore, iyatakino lu ipuaka; konye ng'ulu lu emamatatar, edemaro kesi atikere idis lu ejatatar.

²⁷ Kipokona, ikamuuti ipading'atin kang' lu amam akotosi eong' karau ejakait kes, koyautu ne, kwarata koking'aren kang'.’”

Akilom Yerusalem naka akilanya

²⁸ Kedau Yesu alimun nu, kogei nesi king'aren kes idirarit Yerusalem.

²⁹ Ka apu nesi Betfage ka Betania komoru kaloka Olifeti, kijukiyari nesi lukesisiak iare king'aren

³⁰ ka acorasia kanu: “Kolototo adukete na ejii king'aren kus; kilomata osi, idumunete osi ikoku ka asigiria ni ering'a kitekera eyenikite. Kolacutu koyautu ne.

³¹ King'it itwan osi inyo ilacata osi, kolimokisi nesi ebe ekote Lokapolon.”

³² Koikarete kesi kadumun ng'in ibore kwape kelimokitere Yesu kesi.

³³ Elacete kesi ikoku ka asigiria, king'isete ikulopek kesi ebe, “Inyo ilacata osi nesi?”

³⁴ Kinyakunete ebe, “Ekote Ejakait,”

³⁵ Koyarete kesi ikoku ka asigiria namaka Yesu. Kosodete apesikin inapen kes kuju ka ikoku ka asigiria ka akitodok Yesu kuju keng'.

³⁶ Itekeri nesi, kopesinikinete itung'a inapen kes oroto.

³⁷ Apuuni nesi Yerusalem, aleles naka emoru loka kimusabibun, kogeuni akwap ka lukesisiak keng' akimaa ka akitur Akuju koporotoi kalu ikiara kanuka akiro kere nukapolok nu abutu kesi koanyutu;

³⁸ ebalasi ebe: “Erereng' Ejakait lo ebuni kokiror ka Lokapolon. Aipuc kokuju ka akibusesu kamaka Akuju.”

³⁹ Kosodete Ifarisayon ice lukejaasi kiding' ka akwap ka itung'a alimokin Yesu, “Ekesisinakinan, kolimok lukesisiak kon kotautu ti.”

⁴⁰ Kobong'okini Yesu kesi, “Kalimokini eong' osi ebe ketautu kesi ti, egeunete amoru akulepek acela.”

Emonyi Yesu kanuka Yerusalem

⁴¹ Apuuni nesi ka anyun ere lokapolon, kosodi nesi adelori kanuka ere lokapolon,

⁴² ebala “Kere kijeni ijo lolo nu ekotokina kanuka adumun aipuc! Konye kipokona mam ijo kiyanyuni!

⁴³ Ebuut apak na ebuniata ipading'atin kon akigalikin ijo ka agolor ijo kang'olo wai.

⁴⁴ Emudiarete kesi ijo cut ka itung'a lu ejaasi toma aruatan kon; mam amoru apede inyekinete kesi kowai keng', naarai mam ijo ibu kojenu apak na kebunia Akuju akiyuun ijo!”

Elosi Yesu Otogo ka Akuju

⁴⁵ Kosodi Yesu akilom Otogo ka Akuju ka ageun akireng'e Lukitegwelete,

⁴⁶ elimonokini kesi ebe, “Igirite, ‘Etogo kang' erauni loka alipasia’; konye itarautu osi abwa naka lukademak.”

⁴⁷ Esisianakini Yesu ko Otogo ka Akuju ng'in paaran. Akotosi isaserdotin lukapolok, lukesisianakinak kikisila nepepe kalu eyaito itung'a akiara nesi,

⁴⁸ konye mam kesi adumun ekipone loka akisomakin, naarai etolosito itung'a kere akipup nesi, mam kekotosi akirot apede akidiak kesi.