Luka 17 - AKITUTUKET NAKITETET (NEPEPEKA ISABULIN KA AWARAGASIA)

Aronus

¹ Kolimokini Yesu lukesisiak keng', “Isomakinosi iboro lu iduporete itung'a isomaete arokusio, konye ikoni eronari ai kama keng' kani idupori isomakinosi!

² Kejokuna aenikin nesi amoru na iriere omorising' keng' kacakakin nesi akare akilanya nesi akidupor ipe kamaka lu iyapeperasi kalu akisoma aronus.”

³ Kocoikinosi! “Kisomak onac kon ijo arokusio, kiretak nesi; kisila, korimak nesi.

⁴ Kisomak nesi ijo arokusio erwana akanykaare ka peparan, kobong'unene nama kon ng'ini pak ebala ‘Esila eong',’ ejii ijo arimakin nesi.”

Akiyuun

⁵ Kolimokinete ikiyakia Lokapolon ebe, “Kiyatak akiyuun kosi.”

⁶ Kobong'okini Lokapolon ebe, “Kere kepolo akiyuun kus bala icokit nikaditan, tin osi ibeikinete alimokin ekamuriei lo, ‘Koukun, kiraikin akare!’ Kosodi akiyong' osi.”

Asoma kalo kejanakinan

⁷ “Kere kejaasi ipe kama kus ka lokejaanakinan lo ekorie kere lo ijokie amerekekin. Ebong'uni nesi komanikor, ilimokini ijo nesi kisunyak kobu akinyama?

⁸ Teni mam! Konye ilimokini ijo nesi, ‘Kiten inyamen kang' luka ebong', kolokokin kobuu kijaanakine eong' anyemi eong' ka akimat; kadau eong' ibeikini ijo de akinyama.’

⁹ Iyalamikini nesi lokejaanakinan naarai esoma nesi nukicorakite nesi?

¹⁰ Erait ekipone lope ng'olo; kidaut osi asoma kajokis nukelimokite osi asoma, kotemasi, ‘Iraito siong' lukejaanakinak along'u, esomata siong' nukicorakite.’ ”

Itang'aleuni Yesu itung'a itomon

¹¹ Nake losia Yesu Yerusalem, kebu kitor ariri ka Samaria kiton Galilaya.

¹² Elomi nesi adukete kiriamakinos nesi ka itung'a itomon luka eng'ulo. Abutu kesi koguata kama elwana

¹³ ka akiworor, “Yesu! Ejakait! Kitimoi siong'!”

¹⁴ Nape kanyuna Yesu kesi kolimokin kesi, “Kolototo kitodiarosi kamaka isaserdotin.” Elosete kesi kosodete akitalaun.

¹⁵ Nakanyuna epe ebe akijar nesi, abu kobong'u ituri Akuju koporoto kaloko kuju

¹⁶ Abu kibirokin kwap akejen ka Yesu ka akiyalamikin nesi. Kerait etwan Esamariat.

¹⁷ Kotemari Yesu, “Mam araito itung'a itomon apon kitang'aleune? Alu ikanykaung'on?

¹⁸ Inyo eraitere emoit lo bon nesi abong'uni akiyalamikin Akuju?”

¹⁹ Kosodi Yesu alimokin nesi, “Konyou koloto; etang'aleu akiyuun kon ijo.”

Abunore naka Ajakaanut

²⁰ Apak ape, kebutu Ifarisayon ice king'itata Yesu, “Ajakanut naka Akuju ebuni iwori?” Kosodi nesi abong'okin kesi ebe, “Ajakanut ka Akuju mam kebuni kokipone kalo etakania.

²¹ Emam ipede etemari, ‘Kitete, ena kane!’ Kere, ‘Eya kama!’ Naarai Ajakanut ka Akuju ejii kiding' kus.”

²² Kosodi nesi alimokin lukesisiak, “Ebuuti apak na kimuya osi anyun apaaran ape ka apaarasia ka Okoku ka Etwan, konye mam osi kiyanyunete.

²³ Ejaikinosi ng'ulu lu kiilimokinete osi, ‘Kiitete nama!’ Kere ‘kiitete ne!’ Konye mam alosite akote.

²⁴ Kwape imiliauna ekipie ka akitacaun akuju kowai ka epe adolore loce, kong'in nes ejaikinere Okoku ka Etwan ka apaaran keng'.

²⁵ Konye ejii bere nesi akicanakin ka king'ere itung'a lukilolo nesi.

²⁶ Kwape ka aparasia ka Noa nesi ikokini ka aparasia ka Okoku ka Etwan.

²⁷ Kitolototo itung'a akinyama ka akimata, akimanya ka amanyanakin akitodolo apaaran na alomia Noa ataker. Kitolot akiru na apol adore, koari kesi kere.

²⁸ Ikokini bala apak naka Loti. Ng'in itwan abu kitoloto akinyama ka akimata, agwela ka agwelanar, akira ka akiduk.

²⁹ Apaaran na kelomara Loti ko Sodoma, kodoe akimi kwap alomun kokuju ka akiara kesi kere.

³⁰ Ekipone lope ng'oli nesi ikokin ka apaaran kana itodunere Okoku ka Etwan.

³¹ Apaaran ng'in, ng'in kere ni ejii kuju otogo mam adokun kwap ka etogo alemun ibore kere; kokipone kalope kang'olo ng'in kere ni ejii mana mam abong'un ore.

³² Kiitutu aberu ka Loti!

³³ Ng'in kere ni etamakini akitukuu akijar keng' itowolikini; ng'in kere ni itowolikini akijar keng', itukui.

³⁴ Akware ng'in, kalimokini eong' osi, ejaikinosi itung'a iare eperete kapetat kape: Elemaro ipe ka akinyekin nice.

³⁵ Ejaikinosi aberu aare iriete nenipe: Elemaro ape, ka akinyekin nace.”

³⁶ (Ejaikinos ikiliok iare isomaete komanikor, eyaro epe kinyekinete loce).

³⁷ King'isete lukesisiak nesi, “Aibo Lokapolon?” Kobong'okini Yesu, “Nama ejii akwan na etwanit ejaasi atarukon.”