Luka 16 - AKITUTUKET NAKITETET (NEPEPEKA ISABULIN KA AWARAGASIA)

Emaneja lo Epiriana

¹ Abu Yesu kolimok lukesisiak keng' ebe, “Apak ape ajii lokabara epe lokejatatar ka lokejaanakinan lokegwoikiit iboro keng'. Kolimokinete lokabara ebe emunaut lo egwoikiit ikabel ka ejakait keng',

² kosodi nesi anyaraun nesi ka atemar, ‘Anyeka nu apupi eong' ikamuto ijo? Kitemokine eong' akiro kere ekipone lokiyaitere ijo iboro kang', naarai mam ijo kirauni bobo lokeng'adan kang'.’

³ Kiitunun lokejaanakinan je, ‘Esi ejakait kang' akireng'iar eong' kasoma kang'. Inyena ekokini eong'? Emam eong' agogong' na ilesikina akibok aduyon. Esilikiit eong' akilipanar.

⁴ Ajenu eong' nu alosi eong' asoma! Kedaunosi asoma kang', ajaikinosi eong' ka ipoupatin lu kediaunete eong' koreria kes.’

⁵ Kosodi nesi anyaraun itung'a kere lukejatatar ka apesen kejakait keng'. King'isi nesi losodit, ‘Etiae ali itemokina ijo akitaca ejakait kang'?’

⁶ kobong'okini nesi ebe, ‘Apipai akwatat nuka akinyet ka olif.’ Kolimokini lokeng'adan nesi ebe, ‘Aso, kiboikin kigirak akaisakany.’

⁷ Kosodi nesi aking'it loce de ebe, ‘Abo ijo. Etiae ali itemokina ijo akitaca?’ Kobong'okini nesi ebe, ‘Icwei elukumit epe luka engano,’ Kolimokini lo egwoikiit nesi ebe, ‘Aso, kigirak akwatai akanykauni.’

⁸ Kanuka ng'unu kosodi ejakait kalo keng'adan kalo emam kemunokina akitama nesi kanuka apirianut keng'; Naarai itung'a luka akwap kana epiriaka kokipone kalo eyaitotor akiro kes akilanya itung'a lu ejaasi toma acaus.”

⁹ Kosodi Yesu akitolot atemar, “Kalimokini eong' osi: Kitenutu ipoupatin ka abara kanaka akwap, tetere kedauni, kidiauno osi kama iboere ikaru kere.

¹⁰ Ng'in kere ni emunokina koboro kalu edisiaka emunokin kamaka lu epoloko; ng'in kere ni emam kemumokina koboro kalu edisiaka mam kemunokin koboro kalu epoloko.

¹¹ Kimam osi kimunokina kayaite abara naka akwap, ng'ai kiinakini osi apolokiite abara naka abeite?

¹² Kimam osi kimunokina koboro ka itwan kice, ng'ai kiinakini osi abara kus?

¹³ “Emam lokejaanakinan lo ebeikini araun ebulesut kijakaa kiare; naarai eng'erokinosi nesi ka epe, kaminakin kaloce, kere eyong'i epe kakimwar loce. Mam ijo kibeikini akijaanakin Akuju ka ikabel.”

Alimonoreta ka Yesu ace

¹⁴ Kepuputu Ifarisayon nu kere, kijutarete Yesu, naarai aminasi kesi ikabel.

¹⁵ Kolimokini Yesu kesi, “Osi nesi itoduna ebe ijooka osi kakonyen ka itung'a kaluce, konye Akuju ejeni itawon kus. Naarai iboro lu itete itung'a ebe ejoka, emam adumunete ka akonyen ka Akuju.”

¹⁶ Ikisila ka Musa kiton akigirigirisia nuka ikadwarak ajaasi ka apedor akitodol apak naka Yoana Lokebatisan. Ageun kaneni elimonoro akiro nukajokak kuju ka Ajakaanut ka Akuju, ng'in itwan euta akilom.

¹⁷ Konye etapana kuju kiton akwap atubor akilanya alemar akirot nakaditan kokisila.

¹⁸ Ng'in kere ni igirokini aberu keng' ka akimanya aberu ace esoma nuke eluk; ng'ini kere ni emanyi aberu na egirokina, esoma nesi nuke eluk.

Etwan loka abara kitoni Lasaro

¹⁹ “Apak ape ajii etwan epe lo abarit anapit inapen lu ekiara etacit noi kiton ajari akijar nako kuju ng'in paaran.

²⁰ Kokeki keng' ajii lokapalapalan epe lo anyarite Lasaro, eleleba nesi ajimii akwana keng',

²¹ lo akote adumun ararasia nu edacunosi kamesa ka lokabaran; ing'okwo de abutu komeoto ajimii keng'.

²² Kotwani lokapalapalan, kodakarete imalaikan nesi akidunya ka Aburaam ko opucit kokuju. Kotwani lokabaran de konukete.

²³ Ejii lokabara ng'olo toma akisicanio na epolo kotoma akimi, kikieuni akonyen keng' kuju, kosodi anyun Aburaam kama eluana kiton Lasaro ka nesi.

²⁴ Kosodi nesi akiworokin, ‘Papa Aburaam! Kitimoi eong', kijuku Lasaro kilumok ebokorit keng' akipi kitojon ang'ajepe kang', naarai apupi eong' apipilu noi kakim kana!’

²⁵ Konye kobong'okini Aburaam nesi: ‘Okoku, kang' kiitu ebe, ka akijar kon ibu ijo kodumu nu kon nukajokak, kodumuni Lasaro de nukarokok. Konye kipokona isinapikiite nesi, kisicanio ijo.

²⁶ Kong'in de, ejii adwi nakapolon kiding' wok, tetere ng'ulu lu ekotosi alomar kane abunore nama kus mam kebeikinete, kere lu ekotosi alomun kama kus abunore nama kosi mam kebeikinete.’

²⁷ Kotemari ng'olo lokebarit: ‘Kemaimait eong' ijo papa Aburaam, Kiyakia Lasaro otogo ka papa kang',

²⁸ nama ejaasi ikanacan kang' ikany. Kinyek nesi koloto ka akikwenyar kesi tetere kesi mam kebunete alaro na nakicani.’

²⁹ Kotema Aburaam: ‘Ikinacana kon ejatatar ka Musa ka lukadwarak akikwenyar kesi ejii ikanacana kon akipup nu etemarete kesi.’

³⁰ Kosodi lokebarit m abong'okin, ‘Mam ng'un kilesikina, papa Aburaam! Konye kere kejaruut itwan kamaka lukatwak kalosite nama kes, tin kesi isilarete arokusio kes.’

³¹ Konye kotemari Aburaam, ‘Kemam kesi kepupunete Musa kiton ikadwarak, mam kemunokinete atikere kejaru itwan kamaka lukatwak.’”