Luka 14 - AKITUTUKET NAKITETET (NEPEPEKA ISABULIN KA AWARAGASIA)

Itang'aleuni Yesu etwan lo edeka

¹ Apaaran ape naka Esabato, abu Yesu koloto akinyama inyamen ore ka lokapolon ka epe kalo kepolokit Ifarisayon; kitete itung'a de Yesu kama api.

² Kobuni etwan lokebuit akwana kere namaka Yesu,

³ kosodi Yesu aking'it lukesisianakinak Ikisila kiton Ifarisayon, “Ecamakiit Ekisil wok akitang'aleun itwan nake Esabato kere mam?”

⁴ Konye kotaunete kesi ti. Kirumi Yesu etwan lo adeka, ka akitang'aleun nesi, kajalakin nesi koika.

⁵ Kosodi nesi alimokin kesi, “Ng'ai kama kus kecakakin ikoku keng' kere akiteng' keng' adwi, mam kelemuni atikere kerait naka Esabato?”

⁶ Mam abekinete abong'okin nesi ikamuut akirot na.

Akiyapepera ka Asianut

⁷ Kebu Yesu koanyu ekipone lo keseata ipejok alarosinoi nuka ang'osibib, kosodi alimokin kesi kere awaragan na:

⁸ “Kinyarau itwan ijo opucit loka emanyit, mam akiboikin alaro naka luka ang'osibib. Ebeikin enyaraute itwan nika ang'osibib akilanya ijo,

⁹ kosodi lokinyarauti osi iare abunore alimokin ijo: ‘Kinyek nesi kibokin ne.’ Kisilikini ijo kaneni koking'aren ka itung'a kere ka aikar akiboikin alaro nakosial.

¹⁰ Konye kinyaraar ijo opucit, koloto kiboikin alaro nako sial, tetere ebuni lokinyarauti ijo ka alimokin ijo: ‘Opoupa kang', kobuni king'aren ne nama elae noi.’ Kaneni ijaikinosi ijo ka aibusesus koking'aren kipejok kere.

¹¹ Naarai ng'ini kere ni ikiara ilope inyakuno kwap, ng'ini ni inyakuna ilope kwap, ikiaro.”

¹² Kosodi Yesu alimokin lokidiaut nesi ebe, “Iinakini ijo inyamen luka apaaran kere luka ebong', mam anyaraun ipoupatin kon kere ikanacan kon, kere ipajantin kon kere ipadukotin kon lu ejakaka naarai ebunete kesi de anyaraar ijo. Kokipone kalo idumuni ijo aropetait kon.

¹³ Konye isomakini ijo itung'a epucit, konyarau lukapalapalak, ing'ualaisik ka lu emudukaka;

¹⁴ isirereng'io ijo, naarai mam kesi kebeikinete akitaca ijo. Etaci Akuju ijo apaaran na ejarunata itung'a lukajokak.”

Awaragan naka Epucit lo Epolo Noi

¹⁵ Kotemari etwan epe lo kiboete ka Yesu ebe, “Erereng' itwan ni ebuni akinyam inyamen kotoma ka Ajakanut ka Akuju.”

¹⁶ Kolimokini Yesu nesi, “Abu etwan epe kiten epucit lo apolo noi, konyarauni itung'a lu ipu noi.

¹⁷ Kedolo apak naka epucit, kijukiari nesi lokejaanakinan keng' alimokin ipejok keng', ‘Kobutu, alokokin ng'in ibore!’

¹⁸ Konye kogeunete kesi kere akilipi akitimio. Kolimokini losodit lokejaanakinan, ‘Agwele eong' amana, ejii eong' alosit anyun; okwai kitimoi eong'.’

¹⁹ Loce de kotemari, ‘Agwele eong' imong'in ajokin akany, alosi eong' atamakin kesi, okwai kitimoi eong'.’

²⁰ Loce de kotemari, ‘Amanya eong' aberu kanuka ng'unu mam eong' kabuni.’

²¹ Kobong'ori lokejaanakinan kalimokin lokapolon keng' akiro nu kere. Kokadak lokapolon kosodi alimokin lokejakinan keng', ‘Kisunyak kolot orotin kiton isokon luke taun, kinyaku lukapalapalak, lu emudukaka kiton ing'walaisik.’

²² Kotemari lokejaanakinan atipet, ‘Lokapolon, esomakin nukicorakit ijo, konye ering'a alaro ejii.’

²³ Kolimokini lokapolon lokejaanakinan ebe, ‘Kolot orotin luka awaitin koyau itung'a toma, tetere ilelebun etogo kang'.

²⁴ Kalimokini eong' osi kere ebe emam ipede kamaka ng'ulu kalu kenyaraute iriete inyamen kang'!’”

Alang'iru naka araus Lokesisian

²⁵ Kaneni ajaasi akwap ka itung'a eupasi ka Yesu. Kosodi nesi akibong' ka alimokin kesi,

²⁶ “Kebu itwan ipede nama kang' komam kereit papa keng' ka toto keng', aberu keng' ka idwe keng' ka ikanacana keng' nepepe ka akanacana keng', teni, atikere akijar keng' kelope, mam nesi kerauni lokesisian kang'.

²⁷ Ng'ulu kere lu mam kedakete emusalaba kes ka akitup eong', mam kebeikinete araun lukesisiak kang'.

²⁸ Ng'ai kama kus ekote akiduk akites, mam bere kiboikin kwap akimar etae kajenun kejaasi nesi kanu ilesikina adaun?

²⁹ Kemam, na edauna nesi apesikin apetatait, komam kebeikini adaun, ng'ulu kere lu anyunete egeunete akwenare nesi,

³⁰ ebalasi, ‘Abu etwan lo kogeu akiduk konye mam abeikini adaun.’

³¹ Kere Ejakait ali, elosi akiriamakin ka Ejakait loce kojie emam kiboikin kwap bere akiitunun kebeikini nesi kaluka ajore aritai atomon akiriamakin ka nesi lo ebuut akitijii nesi ka ajore aritai akaisare?

³² Kemam, ijukiari nesi ikiyakia akote nu itemokina asoma tetere ejaikin aipuc, ering'a ejakait loce elwana.

³³ Kanuka ng'unu, ng'ini kere kama kus ni emam keng'eri nu ejatatare ka nesi kere, mam kebeikini araun lokesisian kang'.”

Acube na epiana

³⁴ “Ejokuna abalang', konye kepianari, ikonio inyakuno ajijim keng' ai?

³⁵ Mam kejokuna kalipu kere ka asike; ecakaro. Nesi ni ejaasi ka akii, kopup.”