Luka 12 - AKITUTUKET NAKITETET (NEPEPEKA ISABULIN KA AWARAGASIA)

Akwenyaret kuju ka Emole

¹ Ketukokinosi aritai ka itung'a nenipe, kipudasi, kogei Yesu alimokin ikiyakia keng', “Kocoikina kuju ka asipa kifarisayon, esoswai.

² Ng'in ibore ni erapite eng'aro, nu imunonite kere ejenunosi.

³ Kanuka ng'un, ng'un kere nu itemasi osi kakirionus epupuno kacaus kanaka paaran, ng'un kere nu iweiwa ijo kama ing'adara kotogo kalo egolokina, eceluno kokuju ka itogoi.”

Ng'ai itemokina osi Akurianu

⁴ “Kalimokini eong' osi ipoupatin kang', mam akurianu ng'ulu lu arete akwana konye komam kebeikinete akisoma ibore ice bobo.

⁵ Ketodikini eong' osi ng'ai itemokina osi akurianu: Kokuriakata Akuju, lokedau akiara, ejaasi ka apedor naka acakakin osi akimi. Komunokisi eong', nesi itemokina ijo akurianu!”

⁶ Mam kegwelaro iriribwasin ikanyi abolai aare? Konye mam kimuruokini Akuju iriribwasit ipe.

⁷ Atikere itima ka akwes kus edaute akimara kijokin. Kanuka ng'un mam akurianu. Ijaasi osi ka adumunet na epolo noi akilanya iriribwasin lu ipu!

Acamun ka aking'ere Kristo

⁸ “Kalimokini eong' osi abeite ebe, ng'ini kere ni ecamuni eong' koking'aren ka itung'a, Okoku ka Etwan de ecamuni nesi koking'aren kimalaikan ka Akuju;

⁹ konye nesi ni eng'eri eong' koking'aren ka itung'a, nesi de eng'erio koking'aren kimalaikan ka Akuju.”

¹⁰ Ng'in kere ni elimuni akirot na itepegi Okoku ka Etwan erimakino; konye ng'ini ni ikeni Emoyo Lokalaunan, mam kerimakino.

¹¹ “Nakiyaunata kesi osi osinagogin kiton ojakaa nepepe kaluka pugan, mam ariang'un ekipone kere nu itemokina osi akinyakun kere nu itemokina osi atemar;

¹² naarai ebuni Emoyo Lokalaunan akisisianakin osi kakolong' kang'in nu itemokina osi atemar.”

Awaragan naka lo Abarit lo Bang'ai

¹³ Kolimok etwan epe Yesu kokiding' ka itung'a, “Lokesisianakinan, kolimok onace kang' kotiakata ka eong' lu abu papa kosi kinyekina siong'.”

¹⁴ Kobong'okini Yesu nesi, “Opoupa kang', ng'ai kainak eong' apedor naka araun lokatubonokinan kere akitiaka iboro kama kus iare?”

¹⁵ Kitoloto nesi alimokin kesi kere, “Kitete, coikina osi ikulopek kamaka aking'obele iboror lu egelegela; naarai akijar ka itwan mam kejii oboro keng'.”

¹⁶ Kosodi Yesu alimokin kesi awaragan na: “Ajii etwan epe lokebarit lokejaasi ka amana na abutu inyamen kisomata tena noi.

¹⁷ Kogeuni elope akiitunun, ‘Emam eong' nama epiakini eong' idwenyan kang'. Inyena esomakini eong'?

¹⁸ Kosodi atemar’, ‘Esomakini eong' nu: Atiar eong' idulai kang' ka akiduk lu epoloko noi; eng'adakini eong' idwenyata kang' kere ka abara kang'.

¹⁹ Kasodi eong' elope atemar, etwan lo erereng'! Ijaasi ijo kiboro kere lu ejoka kokaru kalu ipu. Koya akijar etapana, konyama, komata, kolelakin konye ijo elope.’

²⁰ Konye kolimokini Akuju nesi, ‘Ebang'ai lo! Akware napena ekotoi akijar kon; ng'ai konye edumuni iboro lu kere lu ing'adakiit ijo.’”

²¹ Kodauni Yesu ebala, “Lo nes ekipone kang'in kani etuki abara kanu keng' bon konye mam kejakaana kakonyen ka Akuju.”

Komunok Akuju

²² Kolimokini Yesu lukesisiak keng', “Kanuka ng'un kalimokini eong' osi, mam akiyalolong' kuju ka akijar kus, inyena inyemete osi, kere kuju kawate kus, inyena inapete osi.

²³ Naarai ejokuna akijar adepar inyamen, elae akwan adepar inagai.

²⁴ Kong'olek ikuruk: Mam kiraete kere akidwenye; mam kesi idulai konye itani Akuju kesi! Ijaasi osi kadumunete na epolo noi akilanya ikwenyi!

²⁵ Ebeikini ipede kama kus akiyatakin akijar keng' kakiyalong'ong'?

²⁶ Kemam ijo kibeikini ibore ni edit kwape kang'in, inyo iyalong'ong'i ijo kuju kiboro kice?

²⁷ Kitete ekipone lo epoloto aturuo nuko kitwi: Mam kisomaete kere mam kitenete inagai. Konye kalimokini eong' osi, mam atikere Ejakait Solomon kotoma ajakanut keng' kere kejatatar kinagai lukelaete bala aturuo nu.

²⁸ Erait Akuju nesi itanapi inya luko kitwi inya lu ejaasi ne lolo ka aikar moi, ka kisinepunio kokiala. Mam nesi teni kitanapi osi cut? Ikoni akiyuun na ejaasi ka osi edit ai!”

²⁹ “Kanuka ng'un, mam akiyalong'ong' ng'ini pak inyena inyemete osi ka akimat.

³⁰ (Naarai ikafirin luka akwapa kana iyalong'oete kuju ka iboro kalu kere). Ejeni Papa kus ebe ikotosi osi iboro lu.

³¹ Konye kiyalong'ong'oto kuju ka Ajakanut keng' kosodi nesi ainakin osi iboro lu kere.”

Abara na ejii toma Kuju

³² Mam akurianu, osi isipan, naarai elakara Papa kus ainakin osi Ajakanut.

³³ Kogwelasi iboro kus kere koinakisi lukapalapalaka ikabel. Kodumutu icuei lu mam kemojong'ete, kigwata abara kus kotoma kuju, nama emam kipiang'ari, naarai mam ekokolan kedolokini, mam etapukan kemunauni.

³⁴ Naarai ejii etau kon nama ejii abara kon.

Lukejaanakinak lu elokokina

³⁵ “Kojaasi ilokokina iyenito arokoba ang'abes, konokete akadobai kus,

³⁶ bala lukejaanakinak lu idarito ejakait kes kobong'u alomun kopucit kalo kemanyit, tetere eng'akinete nesi atipet.

³⁷ Ikote erereng' ai lukejaanakinak ng'ulu lu edumuni ejakait kes ekwenyete kolokokina ebong'uni! Kalimokini eong' osi, elacari nesi akoti keng', kalimokin kesi kiboikinosi kwap, kosodi nesi akijaanakin kesi.

³⁸ Ikote kesi erereng' ai kedumu nesi kesi elokokina, atikere kebu nesi kiding' ka akware kere kokau!

³⁹ Komunokisi ebe, kere kejeni elope etogo akolong' na ebunia ekokolan, tin mam nesi kejalakin ekokolan kobili etogo keng'.

⁴⁰ Osi de, ejii alokokina, naarai ebuni Okoku ka Etwan kakolong' kana mam osi kidaritotor nesi.”

Lokejanakinan lo emunokina kere lo emam kemunokina

⁴¹ Kotemari Petero, “Lokapolon, erait awaragan na kanuo kosi bon kere kanuka itung'a kere?”

⁴² Kobong'okini Lokapolon, “Ng'ai konye lokejaanakinan lo emunokina kojaasi ka acoa, lo ebuni lokapolon keng' ainakin apolou kuju ka lukejaanakinak keng' tetere einakini kesi inyamen kakolong' kana ekotore?

⁴³ Ikoni erereng' ai lokejaanakinan ng'oli kedumu lokapolon keng' nesi isomae nu na ebunia nesi ore.

⁴⁴ Teni, kalimokini eong' osi, ipiakin lokapolon lokejaanakinan ng'olo apolokin abara keng' kere.

⁴⁵ Konye ketema lokejaanakinan ng'olo ko otau keng': ‘Etumor noi lokapolon kang' abong'un;’ kogeuni akibung'a lukejaanakinak luce, ikilioko ka aberu, ka akinyama kakimata kamera,

⁴⁶ ebuni lokapolon keng' apaaran na mam nesi kidaritere nesi kiton kakolong' na mam nesi kejeni. Ebuni lokapolon akitisilar nesi ka akimorikikin nesi ka ng'ulu lu mam akiyuun.”

⁴⁷ Lokejanakinan lo ejeni nu ekote lokapolon keng' nesi asoma, konye komam kelokokina asoma iposio noi.

⁴⁸ Konye lokejaanakinan lo mam kejeni nu ekote lokapolon keng', kisomaye nu idipori nesi akiposio, iposio nedio. Nu ipu nesi ekotokina kamaka ng'in kani einakite nu ipu; nu ipu noi nesi ekotokina kamaka ng'in kani einakite nu ipuaka noi.

Yesu nes ayauni atiakatiaka

⁴⁹ “Abuti eong' akinokokin akimi akwap, kere kenokuut kipokona!

⁵⁰ Ajaasi eong' ka akibatisao na ejii eong' adumun, ekoni eong' ecana ai akitodolo na edaunere!

⁵¹ Iituto osi ebe abuti eong' ayauni aipuc apwap? Mam, mere aipuc, konye atyakatyaka.

⁵² Ageun kipokona, ere lo ejaasi ka itung'a ikanyi etiaka, iuni itepegete iare, iare itepegete iuni.

⁵³ Kes ka papa itepegete isapa kes, isapa itepegete kes papa, kes ka toto itepegete adwe kes, adwe itepegete kes ka toto; kes ka tataa itepegete ateraka kes, ateraka de itepegete kes ka tataa.”

Akijen Akolong'

⁵⁴ Kolimokini Yesu itung'a, “Na anyunata osi edou ebuut ko to, itemarete osi atipet ebe ebuut adore kodoi.

⁵⁵ Bobo kiirasi osi ekuwam loko ng'alakimak ekusi, ibalasi osi apuut akwap amwanar, kosodi amwanar.

⁵⁶ Osi luka esoswai! Ibeikinete osi akitere akwap ka kuju kosodete osi adwarun ejautene ka akwap; inyo konye mam osi kijeniata apolou kakolong' kana?”

Kiirarosi ka opading'a kon

⁵⁷ “Inyo mam osi ikulopek kitubunata asoma ibore ni deree?

⁵⁸ Keya itwan ijo nama etubonokinere itung'a, kejokuna osi akiirari ering'a osi ijaasi oroto, tetere emam nesi kiari ijo nama kalukatubonokinak, kosodi lokatubonokinan ayar ijo namaka lukedarak, ng'ulu konye kipiakinete ijo toma.

⁵⁹ Kalimokini eong' ijo, iboe ijo kaneni akitodolo nama idauna ijo akitaca apesen kere.”