Isabulin 99 - AKITUTUKET NAKITETET (NEPEPEKA ISABULIN KA AWARAGASIA)

Akuju, Ejakait lo Epolo Noi

¹ Erait Lokapolon ejakait, bobo icekete itung'a! Iboye nesi kokuju adepar iboro lu ejaasi ka abenokoka, bobo ijang'ajang'a akwap.

² Epolo noi Lokapolon ko Sayon; nesi nes lokalaunan ka akwapin kere.

³ Kituroto kesi ekiror keng' lo epolo bobo kitukuriani! Italauna nesi!

⁴ Ejakait loka apedor, lo emina akiro nu edolito; igwaaki ijo abeite akwap nako Israel. Iyau ijo abeiteka asoma nu ideerete.

⁵ Kiturwoto Lokapolon Akuju wok; kimaata koking'aren keng'! Italauna nesi!

⁶ Araito Musa ka Aron isaseredotin keng', bobo arait Samuel epe kamaka lu elipete nesi. Abutu kesi komonyakisi Lokapolon, kosodi nesi abong'okin kesi.

⁷ Abu nesi kinerata ka kesi alomun kodowon; abutu kesi koricakisi ikisila ka acorasia nu abu nesi koinaki kesi.

⁸ Okwai Lokapolon, Akuju kosi, ibu ijo kabong'ok kesi; ibu ijo kitodiar kama kes irait Akuju lo irimana. Konye ibu ijo kisicana kesi kanuka arokusio kes.

⁹ Kiturwoto Lokapolon Akuju wok, bobo kimaata komoru keng' Lokalaunan; Naarai erait lokalaunan Lokapolon Akuju wok Lokalaunan.