Isabulin 98 - AKITUTUKET NAKITETET (NEPEPEKA ISABULIN KA AWARAGASIA)

Akuju Lokepugan Akwap

Ekiruke

¹ Kirukokisi Lokapolon ekiruke lokitetet; esoma nesi aumosia! Akani keng' nakoteten, nakalaunan ainaki nesi apedor naka akilanya.

² Etodia Lokapolon akilanya keng', etodia nesi kakwapin apedor keng' naka ayuun.

³ Abu nesi kisomaki kamunokina nepepe ka amina itung'a keng' luko Israel. Aanyutu itung'a kere luka akwapin kwape eyuunana Akuju wok itung'a.

⁴ Kirukokisi Lokapolon kalakara, akwap kere; kiturwoto nesi ka ikirukesinoi kacela kanaka alakara!

⁵ Kiturwoto Lokapolon! Kirukoto iboliasi etida!

⁶ Kokutakis arupepen ka amugwar, kirukokisi Lokapolon, ejakait wok ka ailel.

⁷ Kigirokin akare, kang'in ibore ni ejii toma kon; akwap nepepe ka ng'ulu lu iboete kotoma akwap!

⁸ Koramata akanin, osi ang'ololon; osi imoru, kirukokisi Akuju nenipe kalakara.

⁹ Kolakara koking'aren ka Akuju naarai ebuni nesi akipuga akwap. Ebuni nesi atubonokin akwap ka abeite ka akipuga itung'a kajokus.