Isabulin 97 - AKITUTUKET NAKITETET (NEPEPEKA ISABULIN KA AWARAGASIA)

Akuju, Lokepugan lo Epolo Noi

¹ Ipugae Lokapolon; Kolakari akwap! Kolakarosi osi alarosinoi nu igalikiito akipi ka akaren!

² Irimokito nesi idowon ka akirionus; ipugae nesi kadolite nepepe ka abeite.

³ Egeit akim koking'aren keng', ka akicwe ipading'atin keng' lu imanakiito nesi.

⁴ Itacaunene akimiliaunun keng' akwap; aanyuni akwap ka akicekun.

⁵ Ecalanarosi imoru bala eminaa koking'aren ka Lokapolon, koking'aren ka Lokapolon kaloka akwap kere.

⁶ Elimonori kuju adolite keng', bobo iteete akwapin kere akibusesu keng'.

⁷ Itung'a kijokin lu imaete aputon itisilikino, lu ipogasi kanuka aputon kes kanu mam kejaasi ka adumunet; eluronokinete akujun kere koking'aren keng'.

⁸ Elakara itung'a luko Sayon, apesur nuko Yuda ejaasi ka ailel, kanuka atubonokin kon, Okwai Akuju.

⁹ Lokapolon loka Apedor kere, ipugae ijo akwap kere; ipolo ijo noi adepar akujun kere.

¹⁰ Emina Lokapolon ng'ulu lu mam keminasi arokusio; idari nesi akijar ka lukalaunak keng'; yunene nesi kesi kapedor kalukarokok.

¹¹ Ecakiit akolong' ng'ulu lu edolito, ebuni ailel namaka ng'ulu kalu ideerete kotawon kes.

¹² Osi kere lu idolito kojaasi ka ailel kanuka nu esoma Lokapolon! bobo kiyalamikisi ekiror keng' lokalaunan.