Isabulin 95 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akitur

¹ Kobuutu keturoto Lokapolon! Kerukokisi ka ailel Akuju lo idari oni!

² Kabuutu nama keng' kakiyalama ka ekiruke ikosioi luka akiturite luka alakara.

³ Naarai erait Lokapolon Akuju loka agogong' kere, ejakait loka agogong' lo epolokiit akujun kere.

⁴ Ipugae nesi akwap kere, ageun kabwai kanu eujaka noi akitodol omoru lukaujak.

⁵ Akare erait naken naarai nesi asubi; akanin keng' ajeunete akwap na ewonit.

⁶ Kobuutu, kemaata bobo kalurokisi nesi; kakukumoto koking'aren ka Lokapolon, lokasuban wok!

⁷ Erait nesi Akuju wok; iraito oni itung'a lu idari nesi, ibaren lu einanakini nesi inyamen. Kiirasi lolo nu ebala nesi,

⁸ “Mam akisicasite itawon kwape isomaata osi ko Meriba, kwape ka apaaran kana ajaatatare kesi Masa, moding'.

⁹ Na atamiata luka asonya kus eong', konye adauto kesi aanyun nu esomakiit eong' kesi.

¹⁰ Kokaru akaisawong'on abutu kitakadikisi eong' itung'a ng'ulu. Katemari eong', ‘Eraito kesi itung'a lu kewolioto, bobo mam kesi kigwapito irotin kang'.’

¹¹ Kanuka ng'un, abu eong' keyapo kotoma anyunyura kang', tetere mam kesi kelomete akiyeng'un kang'.”