Isabulin 94 - AKITUTUKET NAKITETET (NEPEPEKA ISABULIN KA AWARAGASIA)

Akuju Lokatubonokinan itung'a kere

¹ Lokapolon, irait ijo Akuju lo itisilaanari; kopuko anyunyura kon!

² Irait ijo lokatubonokinan itung'a kere; konyou koinaki luka epogi nu itemokina kesi adumun!

³ Ebunete luka arokusio akitoloto alakara ka apaki kana etia ai? Eyarete apaki na etia ai, Lokapolon?

⁴ Ebunete luka arokusio akitoloto epogi ka apaki kana etia ai? Ka epogi kuju ka arokusio kes?

⁵ Emudianarete kesi itung'a kon, Lokapolon; iimakiito kesi ng'ulu lu eraito lukon.

⁶ Aariete kesi apuseru ka ikokiok, ka akiara ilong'au lu iboete ka akwap kosi.

⁷ Ebalasi kesi, “Mam Lokapolon kitee siong'; Mam Akuju loko Israel kitee.”

⁸ Itung'a kang', ikote osi ibang'aaka ai? Iwori isisiaunata osi?

⁹ Abu Akuju kosub akii wok — mam nesi kepupi? Abu nesi kosub akonyen wok — mam nesi kitee?

¹⁰ Nesi lo iretanakini akwapin — mam nesi kebeikiit akitisilar kesi? Erait nesi lokesisianakinan loka itung'a kere — mam nesi kejaasi ka akijen apede?

¹¹ Ejeni Lokapolon nu iwomowomoete oni; ejeni nesi ekipone lo emamare awomowomosia wok kejookatatar.

¹² Lokapolon, ejaasi ka akibusesu koni itwan ni icori ijo, itwan ni isisianakini ijo ekisil kon!

¹³ Isiyeng'uni ijo nesi apaarasia nuka ican, akitodol na ebokere adwi na elokuni lukarokok.

¹⁴ Mam Lokapolon kinyekini itung'a keng'; mam nesi kinyekini ng'ulu lu eraito lukeng'.

¹⁵ Ebong'uni asoma nu itemokina asoma nama kalu edolito, bobo ebunete itung'a kere lu edolito kotawon kes akigang'a.

¹⁶ Ng'ai kebu kigang'a eong' akitepege itwan nika arokusio? Ng'ai kebu kigang'a eong' akitepege lukarokok?

¹⁷ Kere kemam Lokapolon king'arakiit eong', tia eong' kadau aikar atipet akwap ka lukatwak.

¹⁸ Na eituna eong' ebe, “Ajurutaar akeju kang'” abu amina kon na emam esial, Okwai Lokapolon, kigang'a eong'.

¹⁹ Kepoloor apodo naka etau kang', ing'aing'ai ijo eong' ka akitalakaar eong'.

²⁰ Emam akirot apede imorete ijo kalukatubonokinak lu ing'alaete, lu ejeete ikisila luka akigang'ite nukarokok.

²¹ Igang'anarosi kesi akitepege itung'a lu edolito, ka atubokin kwarai itung'a lu emam kejaasi ka akiro.

²² Konye Lokapolon nes ang'opes kang'; Akuju kang' nes ataaba nama ang'opitere eong'.

²³ Ebuni nesi akinyakakin kesi ikulopek arokusio kes, emudiari nesi kesi kanuka arokusio kes. Ebuni Lokapolon Akuju wok amudiar kesi.