Isabulin 92 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akitamaa Akuju

Ekiruke. Ekiruke kanuka Esabato.

¹ Ikoni ejokuna ai akiyalaminikin ijo, Okwai Lokapolon, ekiruke kanuka ayong'ite ijo, Okwai Akuju lo Eliliara Noi,

² kanuka alimonor taparacu kuju ka amina kon kana emam esial, ka amuno kon kware,

³ kekiruke kalo irukoi eramio iboro lu itenite kaunoi, nepepe ka auleru.

⁴ Asoma kon nukapolok, Okwai Lokapolon, kainakiito eong' alakara; kanu isoma ijo, eruko eong' ka alakara.

⁵ Ikote asoma kon ejooka ai Lokapolon! Ikote awomowomosia kon eraito nuka akitim ai!

⁶ Mam itwan ni ebang'ana kebeikiit akijen; itwan ni bang'ai mam kebeikiit akijen:

⁷ ebe Eebeikito luka arokusio apolo bala inya, luka arokusio ebeikiito akitolosite kojokan; konye esial kes erait amudiaro ikaru kere.

⁸ Konye ijo, Okwai Lokapolon, ipolo ijo noi ikaru kere.

⁹ Ijenete siong' ebe ebunete ipading'atin kon atwakare, bobo ilanyo luka arokusio kere.

¹⁰ Isicata ijo eong' bala emong' loko moding'; isulwanyiki ijo eong' kalakara.

¹¹ Aanyu eong' kakonyen kang' ipading'atin kang' ilanyio. Bobo eirasi akii kang' akimonyo naka luka arokusio.

¹² Ebunete itung'a lu edolito akitoloto kojokan bala imusogon; ebunete kesi apolou bala isidai luko Lebanon.

¹³ Eraito kesi bala ikito lu iraite toma Otogo ka Lokapolon, lo epoloe kojokan kotoma Otogo ka Akuju wok,

¹⁴ lo itolosit akigwakin araito kamojong' bobo kojaasi ng'in pak elibito kicasitete.

¹⁵ Itodikiito nu ebe edolit Lokapolon, ebe emam aronus kamaka lokedaran kang'.