Isabulin 91 - AKITUTUKET NAKITETET (NEPEPEKA ISABULIN KA AWARAGASIA)

Akuju lokedaran wok

¹ Itwan kere ni iboe kokwap ka akidario ka Akuju kalo Eliliara Noi, itwan kere ni iboe kotorube ka Akuju kaloka Agogong' kere,

² ebeikini alimokin Lokapolon, “Irait ijo nama akeri eong' ka nama ang'opia eong'; Akuju kang' lo amunokiit eong'.”

³ Ebuni nesi akidara ijo kakang'asia kere kanu eng'opito, bobo kadekasinoi kere kanukaarak.

⁴ Ebuni nesi akirapa ijo kabenokoka keng'; idumuni ijo akidario kokwap kabenokoka keng'. Amuno keng' erait ebuku.

⁵ Mam ijo kibuni akurianu akang'as naka akware, kere de ekojo lo eporotoi paran,

⁶ kere de akurianu adekasinoi nu ebunete kakirionus, kere de amudiaro na elomuni paran.

⁷ Ebeikinete itung'a aritat akibirokin wai kon, aritai atomon teten kon, konye mam ican kapikinete ijo.

⁸ Ibuni ijo akitere usa kakonyen kon, ka aanyun ekipone lo isicanere itung'a luka arokusio.

⁹ Kanu itarauna ijo Akuju nama ing'opitere ijo, kanu itarauna ijo Akuju lo Eliliara Noi alaro na iboya ijo,

¹⁰ emam icani idumuni ijo, emam icani apikinete ere kon.

¹¹ Naarai ebuni Akuju akicorakin imalaikan keng' kidarata ijo korotin kon kere.

¹² Ebunete kesi adakite ijo kakanin kes, tetere emam akeju kon kigukin kamoru.

¹³ Ibuni ijo akipuda ing'atunyo ka imunuo, ibuni ijo akipiricanar idwe king'atunyo nepepe ka imunuo.

¹⁴ Ebala Akuju, “Abuni eong' ayuun ng'ulu lu eminasi eong', abuni eong' akidara nesi naarai amunoki nesi eong'.

¹⁵ Na iworoo nesi eong', abuni eong' akiirar nesi; ajaikinosi eong' ka nesi ocani. Ayuuni eong' nesi ka akiyong'o nesi.

¹⁶ Abuni eong' akidut nesi kang'aleu kanakaujan; ka ayuun nesi.”