Isabulin 90 - AKITUTUKET NAKITETET (NEPEPEKA ISABULIN KA AWARAGASIA)

Ekitabo Lokiwong'onet Loka Akuju ka etung'anan

Akilip ka Musa, etwan ka Akuju.

¹ Okwai Lokapolon, irait ijo ng'in pak nama ing'opiteter siong', kauri kere.

² Ering'a imoru kejaikina, kere de ering'a kisubuna akwap, irait ijo Akuju ikaru kere,

³ Inyakanari ijo etung'anan alipo, ka atemar, “Kobong'o alipo!”

⁴ Ikaru aritat kama kon eraito bala apaaran ape; eraito bala idian, na adau atubor, bala apaki na euriana kware.

⁵ Icakanari ijo itung'a nama elwana bala eruja! Bala inya lu iteteuno taparacu.

⁶ Elibete taparacu ka akiteteun, erinyete ka awokore ebong'.

⁷ Amudia siong' anyunyura kon; etukuriana siong' anyunyura kon.

⁸ Igwaaki ijo arokusio kosi king'aren kon, igwaaki ijo arokusio kosi nu ing'adaara nama ibeikiitere ijo aanyun kesi.

⁹ Kanyunyura kon ewolie akijar kosi; etuborosi bala akiweiwea.

¹⁰ Ikaru akaisakanykaare kes luka akijar wok kere ikaru akaisakanykauni, kicasito oni; konye ikaru ng'ulu kijokin eraito icani ka akituur; etuborosi atipet, kasodete oni awol atipet.

¹¹ Ng'ai ejeni agogong' naka anyunyura kon? Ng'ai ejeni nu eyauni anyunyura kon?

¹² Kisisianaki siong' ekipone lo eurianare akijar kosi, tetere ijaikinosi siong' ka acoa.

¹³ Akitodolo iwori itolosit anyunyura kon? Kisoni, Okwai Lokapolon lukejaanakinak kon!

¹⁴ Kisimonik siong' taparacu ka amina kon kana emam esial, tetere ibeikinete siong' ekiruke ka ajaus ka ailel kakijar kosi kere.

¹⁵ Koinaki siong' alakara kapaarasia kanu ipu, kwape inakina ijo siong' ikaru lu ipu luka akicana.

¹⁶ Kinyek siong', lukejaanakinak kon kaanyutu asoma kon; ka agogong' kon naka akibusesu.

¹⁷ Lokapolon Akuju kosi, kinyek kojaikinosi akibusesu kon ka siong', Koinaki siong' apedor naka asoma kojokan kang'in ibore kani isomaete siong'.