Isabulin 9 - AKITUTUKET NAKITETET (NEPEPEKA ISABULIN KA AWARAGASIA)

Akiyalama kamaka Akuju kanuka Adolite keng'

Namaka Lokerukon: Atupa ka Mutlaben. Ekiruke ka Daudi

¹ Eyalamikini eong' Lokapolon ketau kang' kere; alimori eong' asomisio kon nuka aumosia kere.

² Alakari eong' ka akitur ijo, Erukokini eong' ekiruke loka akitur ekiror kon, Okwai lo Eliliara.

³ Na abong'orata ipading'atin kang' na, abutu kesi kigukisi ka atwanare koking'aren kon.

⁴ Naarai idara ijo asomisio kang' nu edolito, ibookini ijo okicolong' kon inanakini atubonokin na edolit.

⁵ Iretaki ijo akwapin, imudia ijo lukarokok; ifuta ijo ekiror kes ikaru kere.

⁶ Awolioto ipading'atin wok kotoma amudiaro ikaru kere; iuko ijo ireria kes lukapolok, adaun akiitunun kesi.

⁷ Konye iboye Lokapolon kokicolong' keng' ikaru kere; etene nesi ekicolong' keng' loka ang'osibib kanuka atubonokin.

⁸ Etubonokini nesi akwapin kadolite. Etubonokini nesi itung'a kajokus.

⁹ Erait Lokapolon ang'opes kalu inuyarite, ang'opes kapakio kanuka ican.

¹⁰ Bobo ng'ulu lu ejenete ekiror kon ipiakinete amuno kes nama kon naarai ijo Okwai Lokapolon mam kicakari lu kikotosi ijo.

¹¹ Kiturwoto Lokapolon, lo iboe ko Sayon! Kolimokisi itung'a asomisio keng'!

¹² Naarai nesi lo inyang'i aokoto epodo kuju kesi; mam nesi kimuruokini akimonyo kaluka ican,

¹³ Kosyana kama kang', Okwai Lokapolon! Kitee nu ecanere kamaka ng'ulu kalu kareite eong'! Ijo ilemari eong' korutei kaluka atwanare,

¹⁴ tetere emari ajokusia kon kere, ebe kokekia ka akoku ka Sayon tetere aleli eong' kanu kiyuuna ijo eong'.

¹⁵ Elumokinosi akwapin toma adwi na abokete kesi ikuloopek; toma ore lo egwaete kesi nes ekamunototor akejen kes ka ikulopek

¹⁶ Etejenun Lokapolon elope, adau atubonokin; kosodete luka arokusio akikamun ka asomisio kes ka ikulopek.

¹⁷ Eikarete lukarokok akimi, akwapin kere nu emuruokisi Akuju.

¹⁸ Naarai lukapalapalak mam kimurukino ng'in pak; bobo mam amuno kalu epalipalito ketwaani ikaru kere.

¹⁹ Lokapolon kobu! Mam aisikin itwan ipede konuang' ijo! Koyau, okwai Loapolon! Mam aisikin etwan kilanya; kinyek akwapin kotubokina koking'aren kon.

²⁰ Koinaki kesi kojaasi ka akurianu, Okwai Lokapolon; koinaki itung'a kojenutu kotoma akurianu ebe eraito kesi lu etwakete.