Isabulin 89 - AKITUTUKET NAKITETET (NEPEPEKA ISABULIN KA AWARAGASIA)

Ekiruke kapak kanaka ican ka akwap

Amaskil ka Etan ajena ka Esra.

¹ Okwai Lokapolon abuni eong' ekiruke ng'in pak kuju ka amina kon kana emam esial; abuni eong' alimonor kuju ka amuno kon ikaru kere.

² Ajeni eong' ebe amina kon na emam esial ebuni akitoloto apakio kere, bobo ebe amuno kon ideun ejii bala kuju.

³ Ibu ijo kotema, “Etene eong' akitutuket nepepe ka etwan kalo abu eong' kaseu; esumuniki eong' lokejaanakinan kang' Daudi,

⁴ ‘Ipe kamaka auri kon nes ebuni araun ejakait; abuni eong' akidara apugan naka auri kon ikaru kere.’ ”

⁵ Kirukok kuju iboro lu isomae ijo; lukalaunak irukosi kuju ka amuno kon, Lokapolon.

⁶ Emam itwan ipede kokuju erait bala ijo, Lokapolon; emam imalaikat ipede iiriaka ka ijo.

⁷ Kikurianite ijo kobarasa ka lukalaunak; bobo kesi kere lukimanakiito ijo ejaasi ka akurianu.

⁸ Okwai Lokapolon Akuju loka agogong' kere, emam itwan ipede ejaasi ka agogong' bala ijo; koboro kere imunokina ijo, Okwai Lokapolon.

⁹ Ipugae ijo akare naka agogong'; itataunene ijo tii ikokoron keng' lukadedeng'ak.

¹⁰ Ibu ijo kipirica emun Raab ka akiyara; ibu ijo kisiarak ipading'atin kon ka agogong' kon.

¹¹ Kuju eraito nakon, akwap de erait nakon; ijo nes ijeuni akwap nepepe ka iboro kere lu ejaasi toma akwap.

¹² Ibu ijo kosub agolitomei ka ng'alakimak; Emoru loko Tabor nepepe ka Emoru loko Amon kirukokiito ijo kalakara.

¹³ Ijaasi ijo ka agogong' noi! Ikoni agogong' kon epolo ai!

¹⁴ Agwoetait naka ajakaanut kon erait adolite ka asoma nu itemokina; amina nepepe ka amuno itodiara kamaka nu isomae ijo kere.

¹⁵ Ejaasi ka asulwany itung'a lu ejenete akimaa ijo ka ikirukesinoi elakara, lu iboete kotoma acaus naka ajokus kon, Okwai Akuju Lokapolon.

¹⁶ Elakara kesi apaaran kere kanu kon, ka akiturite ijo kanuka adolite kon.

¹⁷ Iinaki ijo siong' agogong' kon naka akilanya; kamina kon idumunete siong' apedor naka akilanya.

¹⁸ Okwai, Akuju Lokapolon, ijo nes ebuku kosi, elomuut ejakait kosi kama kon, Okwai Lokalaunan loko Israel.

Asumunikinete ka Akuju namaka Daudi

¹⁹ Koruja sek, ibu ijo kolimok lokejaanakinan kon loka amuno, “Egwaaki eong' apugan namaka epe kalo ejaasi ka agogong', ainaki eong' apugan epe lo aseun alomun ko otung'a.

²⁰ Adau eong' adumun Daudi, lokejaanakinan kang'; enyonyoiki eong' nesi kakinyet kang' nakalaunan.

²¹ Ejaikinosi agogong' kang' ka nesi ng'ini pak, ebuni apedor kang' akisicata nesi.

²² Mam cut ipading'atin keng' kilanyete nesi; luka arokusio mam kisicanete nesi.

²³ Abuni eong' akipiricar ipading'atin keng'; ka akiyara ng'ulu kere lu mam keminasi nesi.

²⁴ Abuni eong' amina nesi ka ayong'ite nesi; ng'ini paki abuni eong' ainakin nesi apedor naka akilanya.

²⁵ Abuni eong' akiyatakin ajakaanut keng' ageun ka akare kanako Mediterenian adolore Ang'olol nako Yufrets.

²⁶ Ebuni nesi alimokin eong', ‘Irait ijo papa kang' ka Akuju kang'; irait ijo lokedaran kang' ka lokeyuunan kang'.’

²⁷ Etarauni eong' nesi esapat kang' losodit, lo epolo kamaka ijakaa kere.

²⁸ Abuni eong' ng'ini paki asoma nu esumuniki eong' nesi, bobo akitutuket kang' ka nesi ebuni akideun ikaru kere.

²⁹ Enyekini eong' auri keng' naka lukepugak kitoloto ikaru kere; nepepe ka apugan keng' bala kuju.”

³⁰ “Konye kenwang'ata luka auri keng' ekisil kang', keng'eroto kesi akigwapite acorasia kang',

³¹ keng'eroto kesi akitup acorasia kang' ka aking'ere ayong'ite ikisila kang',

³² abuni eong' akitisilaar kesi kanuka arokusio kes; abuni eong' akisicana kesi kanuka arokusio kes.

³³ Konye mam eong' kenyekini amina Daudi kere de aking'er asoma nu esumuniki eong' nesi.

³⁴ Mam eong' kabili akitutuket kang' ka nesi, kere de akibelokin akirot apede na abu eong' ketumunik nesi.”

³⁵ “Eyapoki eong' katipe bon kalaus kang'; mam eong' keng'alakini Daudi.

³⁶ Ebuni ajena keng' akideun ikaru kere; ebuni apugan keng' akideun bala akolong'.

³⁷ Ebuni akideun ikaru kere bala elapa, elomuni kokuju.”

Akimonyo kanuka Akilanyo ka Ejakait

³⁸ Konye icakaa ijo bobo ing'ere ijo, inyunyuraki ijo ejakait kon lo inyonyoikiite.

³⁹ Ibili ijo akitutuket kon na ibu ijo kipiak ka lokejaanakinan kon; icakaki ijo abokoki keng' toma apua.

⁴⁰ Itijaki ijo kwap arwatan nuka ere keng' lokapolon, ibilibili ijo ang'opesia keng'.

⁴¹ Ekokoete ng'ulu kere lu etubitosi kaneni iboro keng'; ekwenatatare ipadukotin keng' kere nesi.

⁴² Iinaki ijo ipading'atin keng' apedor naka akilanya; italaka ijo ipading'atin keng' kere.

⁴³ Iinaki ijo ijiito keng' abutung'ung'; inaki ijo ilanyo nesi kojie.

⁴⁴ Idema ijo nesi apolou keng' naka araus ejakait, kosodi ijo akibirokin kwap apugan keng'.

⁴⁵ Ituriana ijo apaarasia keng' nuka araus nikatumunan, kosodi ijo akirapa nesi ka asilutu.

Alipasit naka akote Alakunio

⁴⁶ Lokapolon, ibuni ijo ang'opite ikaru kere? Ebuni anyunyura kon akinepe bala akimi ka apak kana etia ai?

⁴⁷ Kiitute kwape eurianare akijar kang'; kiitute ebe ibu ijo kosub siong' kere iraito lu itwakete!

⁴⁸ Ng'ai ebeikiit akijar komam ketwani? Ng'ai ebeikini ayuun akwana keng' katwanare?

⁴⁹ Lokapolon, ani amina kon nakisek na emam esial, na ibu ijo kisumunik Daudi kamunokina kon?

⁵⁰ Kiitute Okwai Lokapolon ekipone lo erasiere lokejaanakinan kon; ekipone lo ekanyia eong' araton alomun kotung'a kalu mam kiminasi ijo.

⁵¹ Erasiete ipading'atin kon ejakait kon lo eseute, Okwai Lokapolon! Erasiete kesi nesi kang'in alaro kana elosi nesi.

⁵² Kiturwoi Lokapolon ikaru kere! Ikote nepeneni! Ikote nepeneni!