Isabulin 88 - AKITUTUKET NAKITETET (NEPEPEKA ISABULIN KA AWARAGASIA)

Akimonyo naka akote aking'arasit

Ekiruke. Ekiruke ka Isapa ka Kora. Nama kalo epolokiit ekiruke: Atupa ka Maalat Leanot. Amaskil ka Eman ajena ka Esra.

¹ Okwai Lokapolon Akuju kang', lokeyunan kang', amonyi eong' ng'ini paaran aking'arasit, amonyakiit eong' ijo kware.

² Kiira akilip kang'; kiira akilip kang' naka akote aking'arasit!

³ Ileleba icani noi akwana kang', apu eong' atwanare.

⁴ Imario eong' bala ni apu atwanare; adaun agogong' kang' kere.

⁵ Emuruokin eong' kanaka lukatwak bala lukepon kwarai, lu ejaasi atesin; bala ng'ulu lu kinyeki ijo aking'arakiite kesi.

⁶ Icakaki ijo eong' nama iduloro kaduyon, alarosinoi nu irioko kiduloro.

⁷ Inuyarit eong' anyunyura kon, bobo icikakiito eong' kwap ikokoron kon kijokin.

⁸ Iinaki ijo inyekinete eong' ipoupatin kang'; itarau ijo eong' kama kes ibore ni mam kitalakarit. Agolokin eong' kotoma, bobo mam eong' kabeikiit amotar;

⁹ apasata akonyen kang' akicana. Ng'in paaran eworoe eong' ijo, Okwai Lokapolon. Arwakiit eong' ijo akanin kang'.

¹⁰ Isomakini ijo lukatwak aumosia kon? Enyounete lukatwak akitur ijo?

¹¹ Inerai kuju ka amina kon kana emam esial kotoma ates, kere de amunokina kon kama emudianarere itung'a?

¹² Etakanete aumosia kon kakirionus, kere de ajokus kon kakwap kalu kepon kimuruokine?

¹³ Konye eong', Okwai Lokapolon amonyakiit ijo; ng'in taparacu ebunete alipasia kang' nama kon.

¹⁴ Okwai Lokapolon, inyo icakaria ijo eong'? Inyo ing'opikina ijo eong'?

¹⁵ Ape kekiditeu kang', ecanakin eong' noi apiar atwanare; esicana eong' akitisilaaro kon, adaun eong' cut.

¹⁶ Adau eong' anyunyura kon; adau eong' akitisilaro kon na itukuriani.

¹⁷ Irimokiito kesi eong' bala akaale apaaran kijokin; imanakiito kesi eong' kang'olo wai.

¹⁸ Iinaki ijo atikere ipoupatin kang' eng'erete eong', akirionus nes bon epoupa kang'.