Isabulin 86 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka aking'arasit

Akilip ka Daudi.

¹ Kopupok eong', Lokapolon, kinyakakine eong', naarai apalipapalit eong', bobo ajaasi eong' kakadadu.

² Kidara eong' naarai ayong'it eong' ijo; koyuu eong' lokejaanakinan kon lo emunokiit ijo.

³ Irait ijo Akuju kang', kanuka ng'un kisoni eong'; naarai elipi eong' ijo ng'ini pak.

⁴ Kitalaka lokejaanakinan kon, naarai alipasia kang' ayauti eong' nama kon.

⁵ Ijokuna ijo, Okwai Lokapolon bobo irimana ijo, ileleba toma kon amina na emam esial kamaka ng'ulu kere kalu ilipete ijo.

⁶ Kiira, Okwai Lokapolon, akilip kang'; kiira akimonyo kang' naka akote aking'arasit.

⁷ Apaaran naka icani kang' eworokini eong' ijo, naarai ibong'onokini ijo.

⁸ Emam akuju bala ijo, Okwai Lokapolon, emam itwan ebeikini asoma nu isomae ijo.

⁹ Ebunete akwapin kere nu isubu ijo aluronokin ijo Okwai Lokapolon; ebunete akiturite apolou kon.

¹⁰ Ipolo ijo bobo isomae ijo iboro luka aumosia; ijo bon nes Akuju.

¹¹ Kisisianakine eong' Lokapolon nu ikote ijo eong' kesoma, kayong'i eong' ijo kamunokina; kisisianakine eong' ayong'ite ijo kalemuna cut.

¹² Keturi eong' ijo Okwai Lokapolon Akuju kang', ketau kang' kere, abuni eong' akitur ekiror kon ikaru kere.

¹³ Epolo noi amina kon kama kang' na emam esial; Iyuu ijo emoyo kang' alomun kokwap kates.

¹⁴ Okwai Akuju agwaata lukepogi akitijii eong'; ekote akatong'otong'ot naka lukaarak akiyara eong', bobo mam cut keyong'ito ijo.

¹⁵ Konye ijo, Okwai Lokapolon irait Akuju lo ijaasi ka akisoni ka asianut; mam ijo kinyunyuranar atipet, ng'ini pak ijaasi ijo ka amina kiton amunokina.

¹⁶ Kibeleun nama kang' kisoni eong'; koinakine eong' lokejaanakinan kon agogong' kon, koyu okoku ka nakejaanakinan kon.

¹⁷ Kitodikine eong' akitodiaret naka ajokus kon kama kang', Lokapolon; tetere ng'ulu lu ereito eong' ebunete aanyun ka asilikin kanyutu kesi ebe ing'araki ijo eong' bobo ing'aing'a ijo eong'.