Isabulin 85 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka ejautene lo ejokuna ka Akwap

Nama kalo epolokiit ekiruke. Ekiruke ka Isapa ka Kora.

¹ Lokapolon, abu kisoni ijo akwap kon; ing'araki ijo Israel kisoma kojokan bobo.

² Irimaki ijo arokusio ka itung'a kon, ibu ijo korimaki arokusio kes.

³ Ibu ijo kinyeki anyunyurakiite kesi kosodi ijo akirebokin adedeng' kon.

⁴ Kinyaku siong' bobo, Okwai Akuju ekayuunan kosi, kinyeki anyunyurakiite siong'!

⁵ Ibuni ijo adedeng'ikiite siong' ikaru kere? Ibuni ijo akituujate adedeng' kon kauri kere?

⁶ Kisicata siong' bobo, kasodete siong' itung'a kon akiturite ijo.

⁷ Kitoodik siong' amina kon na emam esial, Okwai Lokapolon, bobo koinaki siong' aking'arasit kon na iyuuni.

⁸ Apupi eong' nu ebala Lokapolon Akuju; isumunikiit nesi oni aipuc, oni itung'a keng' kelope, kemam oni kibong'okinete irotin wok luka abang'aanut.

⁹ Teni elokokina nesi ayuun ng'ulu lu eyong'ito nesi, bobo ebuni akibusesu keng' na iyuuni akideun kakwap wok.

¹⁰ Ebunete amina ka amuno akiriamakin; adolite nepepe ka aipuc ebunete anuinikin.

¹¹ Ayong'ara naka etung'anan ebuni adolore kuju alomun kokwap, bobo adolite ka Akuju ebuni akitere kwap alomun kokuju.

¹² Ebuni Lokapolon ainakin oni itolosito kojokan, bobo akwap wok ebuni akigwaakin idwenyan ipu.

¹³ Ebuni adolite aking'arenikin Akuju ka akitenakin nesi eroto.