Isabulin 84 - AKITUTUKET NAKITETET (NEPEPEKA ISABULIN KA AWARAGASIA)

Akimuite Etogo ka Akuju

Nama kalo epolokiit ekiruke: Atupa ka Gitit. Ekiruke ka Isapa ka Kora.

¹ Itiminaarit noi alaro na iboya ijo, Okwai Lokapolon loka agogong' kere!

² Emina emoyo kang' noi ajaus otogo ka Lokapolon; Ituriete etau kang' nepepe ka akwana kang' Akuju lo ejari ka ailel.

³ Atikere adulai de adukoto itogoi kes, ikapuladin de ejaasi ka itogoi kes kikulopek nama igwaakinete kesi idwe kes akidunya ka altarin kon, Okwai Lokapolon loka Agogong' kere, ejakait kang' ka Akuju kang'.

⁴ Ejaasi ka asulwanyi noi ng'ulu lu iboete ko Otogo kon, ng'ulu lu iturete ijo ng'ini pak.

⁵ Ejaasi ka asulwanyi itung'a lu ejii agogong' kes toma kon, ng'ulu lu elokokina alosite Moru loko Sayon.

⁶ Etubitosi kesi ka ajesat kana ewonit nako Baka, itaraunete alaro ng'ini naka icorin; ilelebi akiru naka esial ka ekaru alaro ng'ini kabwalin.

⁷ Itolosito kesi akicasite ng'ini pak; ebunete kesi anyun Akuju loka akujun ko Sayon.

⁸ Okwai Lokapolon Akuju loka Agogong' kere, kiira akilip kang'; kiira, Okwai Akuju ka Yakobo!

⁹ Kong'olek, kiira Okwai Akuju ebuku kosi; Kisulwanyiki ejakait lo inyonyoik ijo.

¹⁰ Ajaus Otogo kon apaaran ape ejaasi ka adumunet adepar ajaus alaro ace apaarasia aritat ape. Ejokuna eong' araus ekedaran korute ka etogo ka Akuju kang' adepar akiboi kayemai kaluka arokusio.

¹¹ Erait Lokapolon Akuju akolong' ka ebuku; einanikini nesi oni akibusesu ka apolou. Mam Lokapolon kimiki ng'ulu lu edolito ibore kijokin nikajokan.

¹² Okwai Lokapolon loka apedor kere, isulwanyikiite etwan lo emunokiit ijo!