Isabulin 81 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loko opucit

Nama kalo epolokiit ekiruke. Atupa ka Gittit. Ekiruke ka Saf.

¹ Kirukokisi keporoto kaloko kuju, Akuju lokegang'an wok; keturoto ka ailel Akuju ka Yakobo!

² Kirukoto, bobo koboliata itamburinin; koramata atenuso, koboliata aulerun nepepe ka akinandai nuka acela kana epupo ejokuna noi.

³ Kokutata arupepen apaki na egeuna elapa lokitetet, apaki na etakania elapa kijokin, apaki naka epucit wok.

⁴ Lo nes ekisil ko Israel, acorasit alomun kamaka Akuju ka Yakobo.

⁵ Abu nesi koinaki itung'a luko Israel acorasit ng'in na alomikina nesi akwap nako Misiri. Apupi eong' eporoto lo mam eong' kajeni ebala,

⁶ “Abu eong' kalema alang'iru kokoper kon; abu eong' kalema amatofali kakanin kon.

⁷ Apaki na ijaare ijo ocani, ibu ijo konyarau eong', kasodi eong' ayuun ijo. Abu eong' kenyakaki ijo kotoma akiruruma kidowon. Abu eong' katama ijo kotoma akipi nuko Meriba.

⁸ Itung'a kang', kiirasi acorasia kang'; kere cut apupokin osi eong', okwai Israel!

⁹ Mam cut akimaa bobo akuju ace. Mam cut akukokin akuju ace.

¹⁰ Erait eong' nes Lokapolon Akuju kon, lokeyauni ijo alomun kakwap kanako Misiri. Kong'aa akituk kon, ketani eong' ijo.”

¹¹ “Konye mam itung'a kang' apupokin eong'; Kong'eri Israel eong' cut.

¹² Kanuka ng'un, kenyekini eong' kesi kideunosi kakicasite kitawon kes, kisomata nu ekotosi kesi ikulopek.

¹³ Kere cut itung'a kang' apupun eong'; kere cut kesi akigwapa irotin kang'!

¹⁴ Tia eong' elanyi ipading'atin kes atipet, ka akilanya ipading'atin kes kere.

¹⁵ Tia ng'ulu lu ereito eong' ebeikiito akukumikin eong' ka akurianu; bobo tia akisicanio kes erauni naka ikaru kere.

¹⁶ Tia eong' etani ijo ka engano kalo idupukuk noi, ka akisimonikin ijo ka asig kanaka ataaba.”