Isabulin 80 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka ainyakakinet ka akwap

Nama kalo epolokiit ekiruke: Atupa ka ikorom. Akijen ka Asaf. Ekiruke.

¹ Kiira siong', Okwai Lokejokon loko Israel, ijo lo iyait Yosef bala ibaren! Ijo lo iboe kokuju ka iboro kalu ejaasi ka abenokoka kojii icae

² koking'aren ka Efraim, Benjamin kiton Manase! Kitodia agogong' kon, kobuu koyuu siong'!

³ Kinyaku siong' nama kon, Okwai Akuju! Kisoni siong', kasodete siong' ayuuno.

⁴ Okwai Lokapolon Akuju, Akuju loka ajore, iyaari ijo apaki na etia ai inyunyurakiit ijo alipasia nuka itung'a kon?

⁵ Itarau ijo akituur inyamen kosi; itamata ijo siong' akiyo nu ipu noi.

⁶ Ijalaki ijo ipadukotin kosi kinwang'ito siong'; kakwenatatare ipading'atin kosi siong'.

⁷ Kinyaku siong' Okwai Akuju loka Agogong'! Kisoni siong' tetere kayuuno siong' ayuuno!

⁸ Ibu ijo koyau emusabibu alomun ko Misiri; ibu ijo kireng'ia akwapin nuce ka akiraikin siong' akwap kes.

⁹ Ibu ijo kitene akwap kanu kosi; abutu akatagor kosi kidulorosi kwap ka akilelebun akwap.

¹⁰ Abu etolim keng' korapa imoru, koraunete akwii keng' bala isidai lukapolok.

¹¹ Abutu ateniek keng' kipasarosi akare, nepepe ka akare nako Yufrets.

¹² Inyo kibirokinata osi kwap arwatan nu emanamanakiito? Itwan kere ni etubitoi tar kodeng' araito keng'.

¹³ Icakicakiete ipegei luko moding', bobo iboro kere lu ejarete enyemete araito ng'unu.

¹⁴ Kobong'u bobo nama kosi, Okwai Akuju loka Agogong' kere! Kong'oleu kwap alomun kokuju; kidara emusabibu lo,

¹⁵ lo ibu ijo kiraik kakani kon kanakoteten, ng'olo lo ibu ijo kitopolou icasit noi!

¹⁶ Itung'a ng'ulu lu kicweikinete ka ajepakin kwap; kong'oleki kesi kanyunyura kotwakata.

¹⁷ Kinyek kidara akani kon etung'anan lo ejii akani kon nakoteten, okoku ka etwan lo isicata ijo kanu kon kelope.

¹⁸ Mam siong' bobo cut kinyekinete ijo; kitajara siong', kasodete siong' akitur ijo.

¹⁹ Kinyaku siong', Okwai Lokapolon Akuju loka agogong' kere! Kisoni siong', tetere kayuuno siong'.