Isabulin 79 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka alakunio ka akwap

Ekiruke ka Asaf.

¹ Okwai Akuju, alomikisi itung'a lukarokok akwap kon. Etoronata Etogo kon lokalaunan ka akinyekin Yerusalem erait akapong'or.

² Enyekinata kesi atarukon konyamata awate ka itung'a kon kaluketwakata, enyekinata kesi awate ka lukejaanakinak kon eraunete inyamen kityeng' kaluko moding'.

³ Ebukete kesi awokot ka itung'a kon bala akipi ko Yerusalem; bobo amam itwan edeuna akinuk kesi.

⁴ Irautu siong' asilut kamaka ipading'atin kosi, ekwenatatar bobo ikacuuto siong' lu imanakiito siong';

⁵ Lokapolon, ibuni ijo anyunyurakiite siong' ikaru kere? Ebuni adedeng' kon naka akadakiite akitolosite akicwe bala akimi?

⁶ Konyunyurak akwapin nu emam kimaete ijo, nepepe ka itung'a kijokin lu mam keyong'ito ekiror kon.

⁷ Naarai aarata kesi Yakobo, itung'a kon; amudiasi kesi akwap kon.

⁸ Mam akisicana siong' kanuka arokusio kaluka asonya kosi. Kinyek kobuu nama kosi akisoni kon atipet naarai etamamuun siong' cut.

⁹ King'araki siong', Okwai Akuju lakeyuunan kosi; koyuu siong' bobo korimaki arokusio kosi tetere eyong'io ekiror kon.

¹⁰ Inyo ing'isitetere akwapin siong', “Wali ejii Akuju kus?” Kinyek kaanyutu siong' ijo isicani akwapin kanuka abukonor awokot ka lukejaanakinak kon.

¹¹ Kinyeki kodolok ijo akimonyo naka apipilu naka itung'a kalu ejaasi aenis, koyuu kagogong' kon kana epolo ng'ulu lu etubokiite atwanare.

¹² Okwai Lokapolon, kitataca irwan akanykaare akwapin ng'unu nu anwang'ito ijo!

¹³ Kasodete siong' itung'a kon lu iraito amerekekin nuka esipan kon akiyalamikin ijo ikaru kere, ka akitur ijo apakio kere.