Isabulin 78 - AKITUTUKET NAKITETET (NEPEPEKA ISABULIN KA AWARAGASIA)

Akuju nepepe ka Itung'a keng'

Amaskil ka Asaf.

¹ Itung'a kang', kopuputu akisisianakino kang', bobo kotupata nu enera eong'.

² Abuni eong' akitosoma awaragasia ka akitemeteme aumosia ageun sek,

³ iboro lu eirasi siong' ka ajenun, iboro lu abutu luka asonya kosi kolimokisi siong'.

⁴ Mam siong' kegwaete kodwe kosi; ibunete siong' alimokin auri na etupakini kuju ka agogong' ka Lokapolon nepepe ka asomisio keng' nukapolok nepepe ka iboro luka aumosia lu esoma nesi.

⁵ Abu nesi koinaki itung'a luko Israel ikisila ka ainakin auri ka Yakobo acorasia. Abu nesi kicoraki luka asonya wok akisisianakin idwe kes ikisila keng',

⁶ tetere auri na etupakini isisiaete kesi bobo ebong'okinete kesi alimonokin idwe kes.

⁷ Kokipone kalo ebeikinete kesi de akipiakin amuno kes nama ka Akuju komam kimuruokinete nu esoma nesi, konye koyong'itete kesi ng'ini pak acorasia keng'.

⁸ Mam kesi keraunete bala luka asonya kes, itung'a lu enwang'ito kalu mam keyong'ito, lu mam akiyuun kes Akuju kicasit bobo lu mam abutu kideunosi emunokiito nesi.

⁹ Abutu itung'a luko Efraim irumito akabwai ka ikojoi, kokerata apaaran naka ejie.

¹⁰ Amam kesi abutu koricata akitutuket kes ka Akuju; abutu kesi kong'eroto akiyong' ekisil keng'.

¹¹ Abutu kesi kimuruokisi nu abu nesi kisoma, aumosia nu abutu kesi kwanyutu nesi isomae.

¹² Itetee luka asonya kes, abu Akuju kisoma aumosia kajelukot kanako Soan ka akwap kanako Misiri.

¹³ Abu nesi kotiak akare kosodi nes akitutuboor kesi; abu nesi kitogwo akipi bala arwatan.

¹⁴ Paran king'arenik nesi kesi kidowon bobo akware kere king'arenik nesi kesi ka acaus ka akimi.

¹⁵ Abu nesi kobwang'abwang' amoru kong'aarosi komoding' kosodi ainakini kesi akipi nu alomunete kaneni.

¹⁶ Kitolomuni nesi ecori kataba kosodi ainakin akipi eleleete bala ang'ololo.

¹⁷ Konye kitolototo kesi asoma aronus koking'aren ka Akuju, bobo komoding' komenata kesi lo Eliliara noi.

¹⁸ Kitebeikisi kesi akitama Akuju kokipone kaloka akidiaun ka agogong' inyamen lu akotosi kesi.

¹⁹ Kinerata kesi nukarokok kuju ka Akuju kosodete atemar, “Ebeikini Akuju ayaun inyamen ko moding'?

²⁰ Erait abeite ebe kinomo nesi ataba. Kosodete akipi abukun; konye ebeikini nesi bobo ainakin oni emugati ka ainakin itung'a keng' akiring'?”

²¹ Kanuka ng'unu konyunyurari Lokapolon na eirara nesi kesi; abu nesi kolomik itung'a keng' ka akimi, kosodi anyunyura keng' kuju kes akiyatakin,

²² naarai amam kesi akiyuun nesi bobo amam amunokiito ebe kebeikini nesi ayuuni kesi.

²³ Konye abu nesi kinerata ka akuju kokuju kicorakini nesi ikekia keng' kong'aarosi;

²⁴ abu nesi koinaki kesi emaana kokipone kaloka akijukakin kesi emaana alomun kokuju konyamata.

²⁵ Kanuka ng'un abutu kesi konyamata inyamen luka imalaikan, kosodi Akuju ainakin kesi iboro kere lu kekotosi kesi.

²⁶ Bobo abu nesi koinaki ekuwam loko kide akikutu, bobo kapedor keng' kiguruok nesi ekuwam loko ng'alakimak;

²⁷ kosodi nesi akijukakin itung'a keng' ikwenyi, ipu bala asing'e kong'eleja;

²⁸ abutu kesi kodoto kiding' ka ekambi imanakiito ayemai.

²⁹ Kanuka ng'un abutu itung'a konyamata ka akimonikin; abu Akuju koinaki kesi nu akotosi kesi.

³⁰ Konye aring'a kesi kimonikina bobo etolosito kesi akinyam,

³¹ konyunyurar Akuju ka kesi kosodi akiyara ikiliok kes luka agogong' noi, isapa lukajokak noi ko Israel.

³² Konye kong'in de abutu itung'a kitolototo asoma arokusio; amam kesi abutu komunokisi nesi konye esomate nesi aumosia.

³³ Kanuka ng'un kong'etak nesi aparasia kes bala akiyeng'ar bobo kang'etakin akijar kes ka amudiaro kana eng'esun.

³⁴ Ng'ini kere na aaria nesi ice kama kes, kobong'unete luce nama keng'; isilarete kesi arokusio kes kosodete akilip nesi kokipone kalo elae.

³⁵ Iitunete kesi ebe Akuju nes kerait lokedaran kes, ebe kebu loka Apedor kere king'arak kesi.

³⁶ Konye akiro kes kere araito aliokonu; emam ibore ipede niketemarito kesi kerait abeite.

³⁷ Mam kesi ayong'ito nesi; mam kesi amunokina kotoma akitup akitutuket na etenito kesi ka nesi.

³⁸ Konye ajaasi Akuju ka asyanut kamaka itung'a keng'. Abu nesi korumak aronus kes, bobo mam nesi abu komudia kesi. Irwana ipu abu nesi kireboki anyunyura keng' bobo mam akinyekin adedeng'u keng' kinepu.

³⁹ Kiitu nesi ebe araito kesi lu etwakete, bala ekuwam lo ekutuni kosodi atubor.

⁴⁰ Irwana emosai abutu kesi komenata nesi komoding'; irwana emosai abutu kesi kitakadikisi nesi!

⁴¹ Irwana ipu abutu kesi kotamata Akuju ka ainun apipilu Akuju Lokalaunan loko Israel.

⁴² Abutu kesi kimurwokisi apedor keng' nakapolon nepepe ka apaaran na ayuuna nesi kesi kamaka ipading'atin kes

⁴³ ka asoma keng' nukapolok nepepe ka aumosia kajelukot kanako Soan ka akwap kanako Misiri.

⁴⁴ Abu nesi kibeloki ang'ololon ka akitaraun awokot bobo amam itung'a luko Misiri akipi nu matan.

⁴⁵ Abu nesi kijukia icucu nama kes lu abutu kisicanata kesi nepepe ka adodokia nu abutu komunautu akwap kes.

⁴⁶ Abu nesi kijukia emase konyama iraana kes ka amunaun amaata kes.

⁴⁷ Abu nesi komunau amaata kes nuka emusabibu ka akako ka ikaereren kes ka akaterot kana epolo noi.

⁴⁸ Abu nesi kwaara akituk kes ka akako ka akiyara amerekekin kes ka ekipyei.

⁴⁹ Abu nesi kijukaki kesi anyunyura keng' na apolo noi, ka eding', ka icani, nepepe ka atukot naka imalaikan kalukaarak.

⁵⁰ Amam nesi abu kireboki anyunyura keng' kere de akinyekin kesi, konye abu kwaara kesi kican.

⁵¹ Abu nesi kwaara isapa lusodit luka itogoi kere luko Misiri.

⁵² Kosodi nesi aking'arenikin itung'a keng' alomar king'a bala lokecokon ka ayaite itung'a itorito moding'.

⁵³ Abu nesi koyaa kesi kojokan, konye amam kesi abutu kokuriakaarosi; konye abu akare kibubulaun opading'atin kes.

⁵⁴ Abu nesi koyaa kesi akwap keng' nakalaunan, omoru lu abu nesi elope komariau.

⁵⁵ Abu nesi kireng'ia king'a itung'a lu eboyete kaneni itolosito itung'a keng'; abu nesi kotiakatiakak itekerio luko Israel amaata ka itung'a kalu eboyete kaneni ka ainakin itung'a itogoi kes.

⁵⁶ Konye abutu kesi konwang'ata Akuju loka Apedor kere ka atamatama nesi. Amam kesi abutu koyong'ata acorasia keng',

⁵⁷ konye amam kesi ajaasi ka ayong'ara kwape ka luka asonya kes, amam cut abeikiite amunokin kesi kwape ka ekojo kalo ekudit.

⁵⁸ Abutu kesi kitakadikisi nesi kokipone kaloka akiduk alarosinoi nama elipiata itung'a lu emam keminasi Akuju, kosodete kesi akitakadikin nesi akitoro aputon kes.

⁵⁹ Abu Akuju konyunyuraar noi na aanyuna ng'unu, kosodi nesi aking'er itung'a keng' noi.

⁶⁰ Abu nesi kinyeki ayema keng' ko Silo, ere lo eboya nesi kokiding' wok.

⁶¹ Abu nesi kojalaki ipading'atin kosi ikamarete Asaduk naka Akitutuket toma, akitodiaret naka agogong' keng' nepepe ka akibusesu.

⁶² Abu nesi konyunyuraki itung'a keng' kajalakin aarete kesi ipading'atin kes.

⁶³ Apon kwarai isapa kojie, komamunete apesur itung'a lukamanyak kesi.

⁶⁴ Apon kwarai isaseredootin kojie, kiteng'erete apuseru kes akimonyo.

⁶⁵ Kosiel, konyouni Lokapolon bala anyoun kajoo; arait nesi bala etwan lo ajaasi ka agogong' lo etalakarit nesi ajon.

⁶⁶ Abu nesi kiteker ipading'atin keng'; ka akitisilikin kesi cut.

⁶⁷ Konye abu nesi kong'er auri ka Yosef; amam nesi abu koseu ekitekere ka Efraim.

⁶⁸ Konye abu nesi koseu ekitekere ka Yuda nepepe ka Emoru loko Sayon, lo amina nesi noi.

⁶⁹ Abu nesi kodukoki Etogo keng' ng'ina bala ere keng' kokuju; abu nesi kisicata bala akwap alope icasit apakio kere.

⁷⁰ Abu nesi koseu Daudi lokejaanakinan keng'; ka alemun nesi kasoma kanuka acoko amerekekin.

⁷¹ Alemuni nesi Daudi kasoma kanuka acoko amerekekin ka ikalei; ka ainakin nesi asoma nuka acoko itung'a luko okitekere ka Yakobo, itung'a keng'. Acoko Israel, itung'a ka Akuju kelope.

⁷² Abu Daudi kisisianak kesi ko otau keng' kere, kosodi nesi apolokiite kesi kojokan noi.