Isabulin 76 - AKITUTUKET NAKITETET (NEPEPEKA ISABULIN KA AWARAGASIA)

Akuju Ekelanyan

Nama kalo epolokit ekiruke: Nepepe ka iboro kalu kaunoi. Ekiruke ka Saf.

¹ Ejenuna Akuju ko Yuda; eyong'ite ekiror keng'iko Israel.

² Ejaasi nesi ka ere keng' Yerusalem; iboye nesi Komoru kaloko Sayon.

³ Abu nesi kobilibil ikojoi ka epading', ibukui kes ka ileng'ia kes lukaujak, eebo, ijiito kes kere.

⁴ Ikoni ijo ijaasi ka akibusesu ai, Okwai Akuju! Ikoni ijo ileleba ang'osibib ai, ibong'uni ijo komoru nama idong'ora ijo lukitijiete ijo.

⁵ Luka ajore kes lu etitinyi ademar ng'in iboro ni kejaasi ka kesi bobo kipokona ejotoete ajoo nuka atwanare; agogong' kes kere nepepe ka akijene kes amam adumunet.

⁶ Na imania ijo kesi, Okwai Akuju ka Yakobo, afarasin nepepe kaluketekerak kes abutu kibirokinosi kwap ka atwanare.

⁷ Konye ijo Lokapolon, kikuriaka ijo itung'a kere. Emam ipede ebeikini akigwo koking'aren kon na inyunyura ijo.

⁸ Ibu ijo kitodia atubonokino kon alomun kokuju; abu akwap kokurianar kataun tii,

⁹ na inyouna ijo kuju atubonokin itung'a, kanuka ayuuni kere lu imakite kakwap.

¹⁰ Anyunyura ka etung'anan eyauni akiturite na epolo nama kon; ng'ulu lu abutu kokuwata kojie ebunete akinumunum ipucin kon.

¹¹ Koinak Lokapolon Akuju kon nu ibu ijo kisumunik nesi; koinutu nesi idutan, osi akwapin kere nu aapete. Einakiit Akuju ng'in itwan akurianu nesi;

¹² iyapeperauni nesi idwe ka ijakaa. Kosodi akitukurian ijakaa lukapolok.