Isabulin 73 - AKITUTUKET NAKITETET (NEPEPEKA ISABULIN KA AWARAGASIA)

Ekitabo Lokiuniet Abeite ka Akuju

Ekiruke ka Asaf

¹ Teni ejokuna Akuju kamaka itung'a kaluko Israel, kamaka ng'ulu kalu ejaasi ka itau lu elayete.

² Konye aapiarit eong' amamuun; apiarit akiyuun kang' adaun agogong'

³ naarai amam luka epogi abutu ketalakaasi eong' apak na etoo eong' ebe itolosito akiro kojokan kama itung'a kalukarokok.

⁴ Mam kesi kepupienenete apipilu; icasito kesi bobo eng'aleete kesi.

⁵ Mam kesi kicanasi bala itung'a luce; mam kesi kejaasi ka ican kalu ejaasi ka itung'a kice.

⁶ Erait epogi bala atipe kes nuko omorising' erapit adedeng'u kesi bala enaga.

⁷ Akonyen kes ebuonoroete kanuka asoma arokusio; elomete akitemetemesio nukarokok kotawon kes.

⁸ Ekwenatatar kesi itung'a luce ka ejori nukarokok; ejaasi kesi ka epogi bobo itemetemete kesi ekipone loka akisicana luce.

⁹ Inerasi kesi nukarokok kuju ka Akuju kalo ejii kuju ka ainakin ng'in itwan ka akwap acorasia nu ededeng'.

¹⁰ Atikere itung'a ka Akuju de igwapito kesi, mam kaanyuto kama kes ibore ipede nikaronon bobo emunokiito kesi ng'in ibore ni ebalasi kesi.

¹¹ Ebalasi kesi, “Mam Akuju kebuni ajenun; Akuju Loka Apedor kere mam kejenuni.”

¹² Ng'olo nes ejautene ka itung'a luka arokusio. Ejaasi kesi ka iboro kalu ipu bobo itolosito ng'in pak akote ice.

¹³ Kanuka ng'un emam atenikina nakedaria eong' akwana kang' kadolite bobo nakang'eria eong' asoma arokusio?

¹⁴ Okwai Akuju, isican ijo eong' aparasia kere; isicana ijo eong' ng'in taparacu.

¹⁵ Kere kenerite eong' akiro bala ng'unu, atia eong' mam kesomae bala epe ka itung'a kon.

¹⁶ Abu eong' katamak akiitununi kuju ka ican kalu, konye ecasit noi kama kang'

¹⁷ akitodol apak na alosia eong' Otogo kon. Kaneni kajenuni eong' ng'unu nu ebunete akisomakin kamaka lukarokusio.

¹⁸ Ibuni ijo akipiakin kesi alarosinoi nu ejurut ka ainakin ibirokinosi kesi atwanare!

¹⁹ Emudiaro kesi atipet; ebunete kesi adaun kokipone kalokaronon.

²⁰ Eraito kesi bala eruja lo edaun taparacu; na inyouna ijo elope, Okwai Lokapolon, ebunete kesi awoli.

²¹ Na arokatatar awomowomosia kang', bobo na eiraritere eong' apipilu,

²² abang'ana eong' bala etyang'; mam eong' abu kekamu ijo.

²³ Konye kong'in de, ajaasi eong' ka ijo ikaru kere, Okwai Akuju! Irumit ijo eong' kakan ka akigang'ite eong'.

²⁴ Iyait ijo eong' kacorasia kon; kosial idiyauni ijo eong' ka akibusesu kon.

²⁵ Ng'ai kokuju ebeikini aking'arakin eong' kemam kerait ijo? Kakwap emam ibore ni eminanarosi ka eong' adepar ijo!

²⁶ Ebeikinete adama kang' ka akwana kang' akipasa, konye Akuju nes agogong' kang'; nesi nes ng'in ibore ni akote eong' ng'in pak.

²⁷ Ng'ulu lu eng'erito ijo ebunete atwakare; ibuni ijo amudiar ng'ulu lu emam kejaasi ka amuno kama kon.

²⁸ Konye eong', kajokokiit akidunya ka Akuju, ijo Lokapolon Akuju loka Apedor kere nes akijar kang'. Abuni eong' akisiarasiara kuju ka akiro kere kanu abu kisoma!