Isabulin 72 - AKITUTUKET NAKITETET (NEPEPEKA ISABULIN KA AWARAGASIA)

Akilip kanuka Ejakait

Ekiruke ka Solomon.

¹ Kisisianak ejakait atubonokin kadolite kon, Okwai Akuju; komorata ka nesi adolite kon kelope,

² tetere ebuni nesi akipuga itung'a kon kadolite ka ayaite kadolite lu isicanio.

³ Elipit eong' koinutu imoru itung'a kon apedor naka akitolosite kojokan, kilelebun adolite omoru.

⁴ Elipit eong' kotubonoki ejakait lukapalapalak kadolite; elipit eong' king'araki nesi ng'ulu lu ejaasi ka akadadu ka akilanya ng'ulu lu isicanete kesi.

⁵ Elipit eong' kimaata itung'a kon ijo kapakio kon kere kanuka acaus ka akolong', kapakio kere kanuka acaus kelapa, kokaru kere kaluko king'aren.

⁶ Elipit eong' korau ejakait bala akiru kamaata, bala akaswet edokiit amaata.

⁷ Elipit eong' kojaikin adolite kakijar keng', bobo elipit eong' kojaikin akitoloto kojokan kapakio kere kanu ebunia elapa acaus.

⁸ Ebuni ajakaanut keng' ageun ka akare kadolore akare, ebuni ageun ko Yufrets kadolore osial ka akwap.

⁹ Ebunete itung'a luko moding' aluronokin nesi; ebunete ipading'atin keng' akibironokin kwap.

¹⁰ Ebunete ijakaa luko Spein nepepe kaluka alarosinoi kanu igalikiito akipi ainakin nesi idutan; ebunete ijakaa luko Sieba kaluko Seba ainuni nesi ileman.

¹¹ Ebunete ijakaa kere aluronokin nesi; ebunete akwapin kere akijaanakin nesi.

¹² Ebuni nesi ayuuni lukapalapalak lu imaete nesi, nepepe ka ng'ulu kalu ejaasi ka akadadu bobo kong'eritete itung'a kesi.

¹³ Isonie nesi itung'a lu emam kejaasi ka agogong'u bobo kopalipalito; eyuuni nesi ng'ulu lu ejaasi ka akadadu.

¹⁴ Eyuuni nesi kesi kakisicanio bobo kamaka ng'ulu kalu itijiyete kesi; itiminaarit akijar kes kama keng'.

¹⁵ Ejakait kojara kokaru kere! Elipit eong' koinakine nesi esawabu loko Sieba; kilipakine nesi ikaru kere; kodum nesi asulwany ka Akuju ng'ini pak!

¹⁶ Elipit eong' kojaikin ekinyomit epolo akwap; elipit eong' korapata iraan imoru, kidooto bala ng'ulu luko Lebanon. Kinyek kilelebunosi itung'a oreria lukapolok, bala amaata nu ileleba inya.

¹⁷ Kinyek kiitutete ekiror ka ejakait ng'ini pak; kinyek kojaikin ajenuna keng' kapakio kere kanuka acaus ka akolong'. Kinyek king'itata akwapin kere Akuju kisulwanyik kesi kwape esulwanyikina nesi ejakait.

¹⁸ Keturwoto Lokapolon, Akuju loko Israel! Nesi bon nes isomae iboro luka aumosia.

¹⁹ Keturwoto ekiror keng' loka akibusesu ikaru kere! Kinyek kilelebun akibusesu keng' akwap kere. Ikote nepeneni! Ikote nepeneni!

²⁰ Lo nes esial ka alipasia ka Daudi okoku ka Yese.