Isabulin 71 - AKITUTUKET NAKITETET (NEPEPEKA ISABULIN KA AWARAGASIA)

Akilip naka itwan kani epolooro

¹ Lokapolon, abu eong' nama kon tetere idari ijo eong'; mam akinyekin kelanyo eong'!

² Kanu idolitere ijo, king'arak eong' bobo koyuu eong'. Kiira eong', bobo koyuu eong'!

³ Koraite ijo amoru kang' nama amotakini eong' kidarai eong', etogo lo icasito arwatan lo iyuuni eong' naarai erait ijo nes idari eong' ka akigang'ite eong'.

⁴ Akuju kang', koyuune eong' kamaka lukarokusio, kapugan kalukaarak kalukarokok.

⁵ Lokapolon Akuju, amunokiit eong' ijo; ajaikinosi eong' ka amunokina kama kon ape kekiditeu kang'.

⁶ Ajaikin eong' etee ijo ka akijar kang' kere; idara ijo eong' ape kidounere eong'. Abuni eong' akiturite ijo ng'ini pak.

⁷ Ajaikin akijar kang' erait ibore ni igwapito itung'a lu ipu, kanu ijaikiner ijo irait lokedaran kang' loka agogong'.

⁸ Eturi eong' ijo apaaran kere ka akisiarasiara kuju ka akibusesu kon.

⁹ Mam aking'er eong' kanu amojong'ia eong' kipokona; mam akinyekin eong' kanu kipokona amamuna eong' agogong'.

¹⁰ Ekotosi ipading'atin kang' akiyara eong'; inerasi ka akitemeteme ekipone loka akiyara eong'

¹¹ Ebalasi, “Enyeki Akuju nesi; kalototo kekamutu nesi; emam itwan ebeikini ayuuni nesi.”

¹² Mam ajaus nama elwana ecut, Okwai Akuju; Akuju kang', kobuu atipet koyuune eong'!

¹³ Elipit eong' kilanyai ng'ulu kere luketijiyete eong' bobo komudiare kesi. Kitisilikine ng'ulu kere lu etamakiito akikang'as eong'.

¹⁴ Ajaikin eong' amunokiit ijo ng'ini paaran; abuni eong' akiturite ijo cut.

¹⁵ Abuni eong' ejori kuju ka ajokun kon; ng'ini paaran abuni eong' ejori kuju ka akiyuun kon, konye edeparit nu abeikiit eong' akijen.

¹⁶ Abuni eong' alosite kagogong' ka Lokapolon Akuju; abuni eong' ejori kuju ka ajokus kon, nakon bon.

¹⁷ Isisianaki ijo eong' ape ka ekiditeu kang', bobo aring'a eong' etolosit ejori kuju ka asoma kon kanu epoloko.

¹⁸ Mam akinyekin eong', Okwai Akuju! Arait eong' emojong'it loka akoruo, kalimonoki eong' auri na ebuuti kuju ka apedor kon.

¹⁹ Adolite kon, Okwai Akuju edoli kuju. Isoma ijo iboro lukapolok noi; emam itwan bala ijo.

²⁰ Ijukaki ijo eong' ican, konye ibuni ijo akinyakun agogong' kang'; ibuni ijo ayuuni eong' kates.

²¹ Ibuni ijo ainakin eyong'ete itung'a eong' adepar sek; ka akitililim eong' bobo.

²² Teni abuni eong' akiturite ijo ka auleru; abuni eong' akiturite amunokina kon, Akuju kang'. Abuni akikut auleru eruko eong' aking'aing'a luka akiturite ijo.

²³ Aceluni eong' kalakara, erukokiit eong' ijo ikirukesinoi luka akiturite ijo, bobo ebuni eporoto kang' akitama ijo naarai iyuu ijo eong'.

²⁴ Abuni eong' ejori kuju ka adolite kon apaarasia kere, naarai ng'ulu lu atamakiito akikang'as eong' elanyi bobo etisilikin kesi.