Isabulin 7 - AKITUTUKET NAKITETET (NEPEPEKA ISABULIN KA AWARAGASIA)

Akilip naka Abeite

Asigaion ka Daudi, na kebu nesi kirukok Lokapolon kuju ka Kus lokokitekere ka Benjamin.

¹ Okwai Lokapolon Akuju kang', abu eong' nama kon tetere idari ijo eong'; koyuune eong', kitukuu eong' kamaka itung'a kere kalu ekotosi eong',

² along'u ebunete adakar eong' bala eng'atun nama emam itwan ipede kebeikini ayuuni eong', kosodete kesi anyilinyil eong' kang'ina.

³ Okwai Lokapolon Akuju kang', kesomate eong' nu, kejii aronus apede akanin kang',

⁴ kagamakiit eong' ipoupa kang' aronus, kere de kademit eong' ipading'a kang' emam atenikina

⁵ kinyek ipading'atin kang' komejata eong' ka akikamun eong', kinyek kesi kotubutuboto eong', ka akiyara eong' bobo kinyekisi kesi eong' atwanit!

⁶ Konyou, Okwai Lokapolon kotoma anyunyura kon! Kogwo kirebok adedeng'u ka ipading'atin kang'; kokwenyu, Okwai Akuju kang'; idau ijo atyakun atubokino.

⁷ Kanuka ng'un kotukoki nenipe itung'a kere nama kon, bobo kipuga kesi alomun kokicolong' kon kokuju.

⁸ Etubonokini Lokapolon itung'a kere. Kotubok eong' Okwai Lokapolon atupa ka adolite kang'; bobo atupa ka ajokus na ejii toma kang'.

⁹ Kinyek aronus kalukarokok kong'etakin, kitogogong'o itung'a kon lu edolito, ijo lo itamenene awomowomosia ka itauon, ijo Akuju lo idolit.

¹⁰ Ebuku kang' erait Akuju; lo eyunene lu ideerete kotau.

¹¹ Erait Akuju lokatubonokinan lo edolit, bobo Akuju lo eng'erit aronus ng'ini pak.

¹² Kemam etwan kisilari, ipienar Akuju ekileng' keng'; ekuduni nesi akabwa keng' kosodi akipiakin elokokina;

¹³ elemuni nesi ijisio keng' luarete itarauni nesi ikojoi keng' iboro lu enokete.

¹⁴ Kitee, epotuni itwan nikaronon aronus; bobo epotie nesi nukarokok, kosodi akidoun aliokonu.

¹⁵ Iteni nesi adwi, eboki king'a, kosodi akibirokin adwi na abok nesi.

¹⁶ Ebong'uni aronus akou keng' ka elope, bobo kuju ka akou keng' nes edacakin adedeng'u keng'.

¹⁷ Ainakini eong' Lokapolon akiyalama na itemokina kanuka adolite keng', bobo erukokini eong' ikosio luka akiturite Lokapolon lo Eliliara Noi.