Isabulin 69 - AKITUTUKET NAKITETET (NEPEPEKA ISABULIN KA AWARAGASIA)

Akilip naka akote aking'arasit

Nama kalo epolokiit ekiruke: Atupa ka aturo nuka apecelun. Ekiruke ka Daudi.

¹ Koyuune eong', Okwai Akuju! Adolokisi akipi omorising' kang';

² Alumi eong' kopoci, bobo emam alaro na icasit; ajii eong' toma akipi nu iduloro, bobo aaputi ikokoron ka akare akilikor eong'.

³ Apas eong' akimony king'arakine eong', apipilaar eporoto kang'. Apasata akonyen kang', akote aking'arasit kon.

⁴ Ng'ulu lu ereito eong' emam atenikina ipuaka noi adepar itima luka akou kang'. Inerasi ipading'atin kang' aliokonu kuju kang'; ejaasi kesi ka agogong'u noi bobo ekotosi akiyara eong'. Abutu kesi koinakisi enyakari eong' iboro lu mam eong' kakokoit.

⁵ Mam arokusio kang', Okwai Akuju kigwaite kama kon; ijeni ijo ekipone lo ajaikinototore eong' ka abang'anut.

⁶ Mam akinyekin eong' etisilikini ng'ulu lu emunokiito ijo, Akuju Lokapolon Loka Apedor kere! Mam ajalakin eong' etisilikini ng'ulu lu imaete ijo, Okwai Akuju loko Israel!

⁷ Erait kanu kon nes erasiere eong', kanuka ng'un arapa eong' asilutu.

⁸ Arait eong' bala ilong'ait kamaka ajena kang', bala ilong'ait ko otogo kang'.

⁹ Alemuna kang' ajaus Otogo kon icwei kotoma kang' bala akimi; araton nakirasio ijo ebong'i nama kang'.

¹⁰ Ayong'ara eong' kokipone kaloka akilip emam akinyama, korasiete itung'a eong';

¹¹ anapit eong' inapen luka akimony, bobo ekwanatatare kesi eong'.

¹² Inerasi kesi kuju kang' korotin, ikamerak de ejeete ikirukesinoi kuju kang'.

¹³ Konye eong' abuni akimaa ijo, Lokapolon; kobong'okine eong', Akuju kapaki kana iseuni ijo. Kobong'okine eong' kanuka amina kon kana emam esiel kana epolo, kanu iricitere ijo asumunet kon naka ayuuni itung'a.

¹⁴ Koyuune eong' kakilumu kopoci; kidara eong' koking'aren ka ipading'atin kang', kidara eong' kakipi kanu ipu.

¹⁵ Mam akinyekin akaale edakari eong'; mam akinyekin eong' alumi kaduyon, kere de alumi ka ates.

¹⁶ Kobong'okine eong', Okwai Lokapolon, kanu ejokunare amina kon na emam esial; kotoma asyanut kon na epolo kobong'okine eong'.

¹⁷ Mam ang'opikin lokejaanakinan kon; ajii eong' ocani lu ipu noi — kinyakakine eong' kipokona!

¹⁸ Kobu nama kang' koyuune eong'; koyuune eong' kopading'atin kang'.

¹⁹ Ijeni ijo ekipone lo erasiere eong', ekipone lo itisilikiitere kanwang'ite eong; ijeni ijo ipading'atin kang' kere.

²⁰ Abilata araton etau kang', bobo apasa eong'. Abu eong' kedara akitimio', konya komamuuni; aking'aing'ao konye komamuuni.

²¹ Na ajaatatare eong' ka eteng'e abutu kesi koinakisi eong' esumu; na eiraritere eong' akure abutu kesi koinakisi eong' esiki.

²² Kinyek korautu ipucin kes aloketa kama kes, bobo kolokutu kesi apaarasia kes nuka ipucin ka lukapolok.

²³ Kinomo kesi kamudukaanut! Kitononok ang'abes kes!

²⁴ Kubukoki kesi anyunyura kon; kinyek kodau kesi anyunyura kon.

²⁵ Kinyek kideunosi ikambin kes emam itwan ipede; kenyek komam itwan ipede ni ideun ejari kayemai kes.

²⁶ Isicanete kesi ng'ulu lu idau ijo akisicana; inerasi kesi kuju ka akisicanio kang'ulu kalu idau ijo ainakin ajimii.

²⁷ Kisican kesi kanuka arokusio kes kere; mam cut arimakin kesi.

²⁸ Kinyek komwatare iroria kes kokitabo kalu ejarete; mam akimarakin kesi toma asiirit naka itung'a kon.

²⁹ Konye apupi eong' apipilu noi bobo apas eong'; kikiare eong' kuju, Okwai Akuju, bobo koyuune eong'!

³⁰ Abuni eong' akiturite Akuju ka ekiruke; abuni eong' alimonor apolou keng' kokipone kaloka akiyalamikin nesi.

³¹ Ebunete nu akitiminaar Lokapolon adepar alemikin nesi akituk, adepar alemikin nesi emong' lo epolo noi.

³² Na anyunata itung'a lu isicanio akiro nu, elakarosi; ng'ulu lu imaete Akuju ebunio akisicata kesi.

³³ Epupi Lokapolon lukapalapalak bobo mam kimuruonokini itung'a keng' lu ejaasi aenis.

³⁴ Kiturwoto Akuju, Okwai kuju ka akwap, akaren ka iboro kere lu ejarete lu ejaasi toma.

³⁵ Ebuni nesi ayuuni Yerusalem, ka akiduk bobo itaunin luko Yuda. Ebunete itung'a keng' akiboi kang'ina ka akirum akwap;

³⁶ ebuni auri naka lukejaanakinak keng' akirum akwap, bobo ebunete ng'ulu lu eminasi nesi akiboi kang'ina.