Isabulin 68 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka akwap loka akilanya

Nama kalo epolokiit ekiruke. Ekiruke ka Daudi.

¹ Konyou Akuju, kisiarakinosi ipading'atin keng'. Komotarosi kama keng' ng'ulu lu ereito nesi.

² Kwape ekutarere apuru, nes ekipone lo ireng'iara nesi kesi; kwape ecalarere eminaa koking'aren ka akimi, nes ekipone lo etwakiata lukarokok koking'aren ka Akuju!

³ Konye lu edolito elakara kojaasi ka ailel koking'aren ka Akuju; ecelasi kesi ka ailel ka ekiruke kalakara.

⁴ Kirukokisi Akuju, kiturwoto ekiror keng'; kirukokisi nesi ekiruke, nesi lo itorit odowon. Erait ekiror keng' Lokapolon. Kolakara koking'aren keng'.

⁵ Akuju lo iboe kalaro keng' kanakalaunan, erait papa keng' kaikokioko kiton lo idari apuseru.

⁶ Einanakini Akuju lukapalapalak ere lokibois, bobo elacanakini nesi lu eyenite ka ainakin kesi apedor naka akitoloto kojokan. Konye luka ikamenak ebunete akiboi ka akwap kana ewonit.

⁷ Okwai Akuju, na iyaitere ijo itung'a kon, na ilosia ijo komoding',

⁸ abu akwap kijang'ajang'akin, abutu idowon kobukutu kwap akiru; kanuka ajaus ka Akuju kaloko Sinai, bobo kanuka ajaus kon Akuju loko Israel!

⁹ Ibu ijo koinak akiru na apolo noi adoore, ibu ijo kitojokon akwap kon na aronare.

¹⁰ Apotu itung'a kon kodukoto ireria neni; kajokus kon, Okwai Akuju ibu ijo koinaki lukapalapalak akiisite kes.

¹¹ Abu Lokapolon kolemu acorasia, kosodete aberu nu ipu akitodiar akiro nukajokak.

¹² “Ekerete, ekerete, ijakaa nepepe ka ajore kes!” Apotu aberu nu ajaasi oreria kokorata iboro lukikamite:

¹³ Atikere kideuna kesi katamaujo kamerekekin; ajaasi aputon nuka aleur nu arapite kepuesa ka abenokoka kes nu imilimiliete erapite kesawabu.

¹⁴ Na asuria Akuju loka apedor kere ijakaa kang'ina, abutu akako kodacakinosi moru loko Salmon.

¹⁵ Okwai emoru lokapolon, emoru loko Basan; Okwai emoru lo ejaasi kaculurun kanu ipu, emoru loko Basan!

¹⁶ Inyo kitere ijo kakadakiite emoru lo abu Akuju koseu akiboi kokuju keng'? Ebuni Akuju akiboi kaneni ikaru kere!

¹⁷ Ejaasi nesi ka agarin keng' aritai ka aritai nu eritosi afarasin, kobuni Lokapolon alomun ko Sinai, alaro keng' nakalaunan.

¹⁸ Edoki nesi kuju omoru, eyarit itung'a lu ikamuute; idiaunene nesi idutan alomun kotung'a lukamenak. Ebuni Lokapolon Akuju akiboi kang'ina.

¹⁹ Kiturwoi Lokapolon, lo edakit alang'iru wok ng'in paaran; erait Akuju ayuuno wok.

²⁰ Akuju wok erait Akuju lokayuunan; erait nesi Lokapolon Akuju wok, lokayuunan oni katwanare.

²¹ Teni ebuni Akuju akipiricanar akwes ka ipading'atin keng', akwes kang'ulu kalu itolosito korotin kes kalukarokok.

²² Abu Lokapolon kotema, “Enyakuni eong' ipading'atin kus alomun ko Basan; enyakuni eong' kesi alomun kotoma akaren,

²³ tetere ijo ilosi akejen kon kawokot kipading'atin kon, tetere ing'okwo kon enyemete ka akimata ka akilesikin.”

²⁴ Okwai Akuju, iteete itung'a kere asiirit kon naka akilanya, asiirit naka Akuju, ejakait kang' eyarit otogo keng'.

²⁵ Lukerukok ejaasi king'aren, lukaboliak iboro luka ekurike ejaasi kau, kokiding' ejaasi aberu nucik iyekete isiman.

²⁶ “Kiturwoto Akuju kakiriames kanakapolon naka itung'a. Kiturwoto Lokapolon, osi auri naka Yakobo!”

²⁷ Losodit erait Benjamin, loci kama kes; kotupakinete lukayaitok luko Yuda ka atukot kes, kotupakinete lukayaitok luka Sabulon nepepe ka Naftal.

²⁸ Kitodia apedor kon, Okwai Akuju, apedor kon na itosoma ijo kanu kosi.

²⁹ Kanuka etogo kon ko Yerusalem, einunenete ijakaa ijo idutan.

³⁰ Kiretak ityeng' ng'ulu lu iboyete kotoma abwa, ikorwa ka imong'in, akitodolo nama kiyong'iata ijo akwapin ng'un ka ainakin ijo emusolo. Kisiarak itung'a ng'ulu lu eminasi ejie!

³¹ Elomunete ikiyakia ko Misiri; einunete itung'a luko Itopia Akuju abara kes.

³² Kirukokisi Akuju, osi ajakaanun nuka akwap, kiturwoto Lokapolon,

³³ nesi lo itorit kuju, akujun nu mojong'. Kopupokisi nesi irurumae ka agogong'.

³⁴ Kisiarasiarata kuju ka apedor ka Akuju; ejii akipugaa keng' Israel, ejii apolou keng' kuju.

³⁵ Itukuriani Akuju kalaro keng' kanakalaunan, teni erait nesi Akuju loko Israel! Einanakini nesi itung'a keng' agogong' ka apedor. Kiturwoi Akuju!