Isabulin 66 - AKITUTUKET NAKITETET (NEPEPEKA ISABULIN KA AWARAGASIA)

Ekiruke loka Akitur ka Akiyalama

Nama kalo epolokiit ekiruke. Ekiruke.

¹ Kiturwoto Akuju ka ailel, osi itung'a kere luka akwap!

² Kiturwoto kuju ka akibusesu ka ekiror keng', koinakisi nesi akiturite naka akibusesu!

³ Kolimokisi Akuju, “Eraito asomisio kon nuka akitim koni! Epolo apedor kon noi akitodolo nama ekuriakitotore ipading'atin kon.

⁴ Kimae akwap kere ijo; irukosi kesi iturete ijo, irukosi kesi iturete ekiror kon.”

⁵ Kobuutu kwanyutu nu esoma Akuju, esoma nesi nuka aumosit kokiding' ka itung'a.

⁶ Abu nesi kibeloki akare korauni akwap na ewonit; kodokarete itung'a ang'olol kakejen. Kaneni kajaikin siong' ka ailel.

⁷ Ipugae nesi ikaru kere kapedor keng' kana epolo noi; iteete akonyen keng' akwapin. Mam aisikin ikamenak itepegete nesi.

⁸ Keturwoto Akuju, Okwai akwapin kere; kinyekisi kopupune iporotoi luka akitur nesi.

⁹ Ainaki nesi oni akijar, bobo mam nesi abu kinyeki oni ebirorosi.

¹⁰ Itama ijo siong', okwai Akuju; itama ijo siong' kwape italaunere epuesa ka akim.

¹¹ Ijalaki ijo siong' ebirokinosi toma oregi, ka ainakin siong' akidak alang'iru na epolo kakaulon kosi.

¹² Ijalaki ijo itung'a kipudata siong'; etoroto siong' toma akimi kiton akipi;

¹³ Abuni eong' toma otogo kon ka idutan lukicwaa; ataci eong' ijo nu etumunikiit eong' ijo.

¹⁴ Ainakini eong' ijo nu esumunikiit eong' elope ebe alemuni eong', apaki na ajaare eong' ocani.

¹⁵ Alemikini eong' ijo ibaren lu etumito eraito ibaren lukicwaa, ka apuru naka isubanit ka imerekekin; alemuni eong' imong'in nepepe ka akinei eraito ileman lukicwaa.

¹⁶ Kobuutu kiirasi, osi kere lu iyong'ito Akuju, kasodi eong' alimokin osi nu esomaki nesi eong'.

¹⁷ Abu eong' kamonyaki nesi koporoto kaloko kuju, ketur eong' nesi ka ikirukesinoi.

¹⁸ Kere kajaasi eong' ka arokusio kotau kang', tia Lokapolon mam kiirarit eong'.

¹⁹ Konye teni eira Akuju eong'; eira nesi alipasia kang'.

²⁰ Kituruoi Akuju naarai amam nesi abu kong'er alipasia kang', kere de alemar amina keng' kama kang'!